دو ھپتگ ساری 21 فروری ءَ دراہیں دنیا ءَ ھوار بلوچستان ءَ ماتی زبانانی آلمی روچ برجم دارگ بوت ۔ بلوچستان ءَ پشتو ، سندھی ، سرائیکی ، پنجابی ، ءُ اُردو گُشوک ءُ آہانی راجمانی گلاں اے روچ داشت اَنت ءُ روتاک ء ُ ھپتگی تاکاں اے مراگشانی حال ءُ احوال چاپ ءُ شنگ بوت اَنت ۔بلے اے درگت ءَ یک بژنی گپّے درا بوت کہ ھچ بلوچ راجمانی گل ءِ نیمگ ءَ اے روچ دارگ نبوت بلکیں ءَ بلوچ راجدوستیں راھشوناں چہ یکے ءِ ترانے ( بیانے ) ھم دیم ءَ نہ گوست کہ دلے ءَ اوپارے بروت ۔دومی نیمگ ءَ بلوچ راجدوستیں گلانی گوں وتی کارداراں (ورکراں ) کول ءُ کرار ہمیش اِنت کہ اے بلوچی زبان ءُ بلوچ راج ءِ عاقبت ءِ مانزمان اَنت آہانی جہد لاپ ءُ کیسگ ءِ پُر کنگ نہ اِنت بلکیں بلوچی زبان ءِ پہآزگ ءُ بلوچے میار ءُ دودمان ءِ پہریزگ اِنت ۔سال ءِ 364 روچا ں وتی ماتی زبان ءَ بیھال کنگ ءِ گنجائش بوت کنت پرچیکہ کاروان ءَ ذرمال باز مُچ کت گڑا چہ وتی پروردگار ءَ بے ترانگ بوت۔بلے 21 فروری اگاں یک روچے اے راجدوستیں گل ءُ راھشوناں پہ وتی ماتی زبان ءَ ندر کُتیں گڑا ھونے چہ آزمان ءَ نہ ریتکگ اَت ۔بلے اے راجدوستیں راھشون ءُ گلاں آہانی کاردار (ورکر )جست کت کناں کہ پرچہ کارون وتی گنج ءَ پد چہ وتی داد بخشاں پراموش اِنت اے ہوں بوت کنت کہ آہانی آئین نبشتہ کنوک نوں سی من ھاک ءِ چیرا انت ءُ اے کہ مرچی پارلیمنٹ ءُ سینٹ ءَ نشتگ اَنت اشانی عشق ءُ محبت گوں وتی گنج ءَ اِنت ۔ اشاں گوں زبان ، بلوچی میار ، بلوچی دودمان ، بلوچ ءِ گُل زمین ءُ بلوچ ءِ باندات ءَ گوں ھچ وڑیں مہر ءُ دوستی نیست ۔بلے کارون گوں وتی گنج ءُ ھما وھد سدّک ءُ ایمن اَت کہ آئی ءِ دادبخش چرائی ءَ راضی ءُ وش اَت۔
