دو مارچ بلوچ ربیدگی ءِ روچ ءِ درگت ءَ اولی براں بلوچ ورنا گل ءَ دارگ بنا کت ۔ اے روچ ءِ دارگ ءِ مول ءُ مراد بلوچ ءِ ربیدگ ءَ جہان ءِ راجانی دیم ءَ شون دئیگ اَت ۔ بلوچ افغانستان ءُ ایران ءَ ڈالچار بوھگان اِنت بلوچ کہ دنیا ءَ مستریں ءُ کوھن ترین ءُ مُہر تریں دودماناں یکے ءِ واھند اِنت بلے راجمانی ءُ مالی بے واکی ءِ آماچ بوھگ ءَ مُج ءُ دنزانی تاموراں گار اِنت۔ایشی ءِ مستریں بے بحتی بلوچ ءِ بے رھشونی اِنت بلے بلوچ ءِ دودمان ءِ محکمی آَ آئی ءِ بے رھشونی ، راجمانی ، مالی بے واکی ءَ ابیدہم آگار ءُ بیگواہ بوھگ ءَ نیشتگ ۔1839 ؁ پد اے ایوک ءَ بلوچ ءِ دودمان ءُ زند ءِ میار انت کہ آتنیگہ اے سر ڈگار ءِ سرا زندگ انت بلے نوں بلوچ ءِ بیگواھی ساز ءُ سامان ھنچو سرجم کنگ بوتگ اَنت کہ اگاں پہ وھد اے راجدوست ءُ رھشوناں میار پرینگ نبوت گڑابلوچ ءِ باندات سک وشناک نہ انت ۔دو مارچ ءِ دارگ ءِ مول ءُ مراد بلوچ ءِ دودمان ءَ را دیم ءِ آرگ اِ نت۔ اے روچ ءِ مول مراد ھچبرایش نہ اِنت کہ بلوچ بے جیڑہ ءُ بے جنجال اِنت ۔بلوچ وش حال ءُ وشکام اِنت کہ ڈُل ءُ سُر نا بکنت ءُ دنیا ءَ بُگش ایت کہ آ شاد مان اِنت آئی ءَ را ھچ راجی ، راجمانی ،چاگردی ، ءُ مالی جیڑہ نیست۔بلکیں گپ چو اے وڑا دیم ءَ ھیر کنگ ببیت کہ زوراکیں واکانی نیمگ ءَ کہ بلوچ ءِ زبان ، ربیدگ ، دودمان ، آئی ءِ سرڈگار ، سرڈگار ءِ مادنانی لُٹ ءُ پُل ایر ماد کنگ ءِ راز پاشک ببیت ۔بلوچ ربیدگ ءُ دودمان ءِ جوانیں دروشمے دنیاءِ دیم ءَ پدّر ببیت ننکہ اے وڑیں دروشمے دیم ءَ بئیت کہ بلوچ چہ وتی نگیگیں جاوراں وش ءُ شادمان اِنت ءُ ھچ وڑیں طلب ءُ لوٹ نلوٹ اِت ۔