گوادر ءِ آپ ءِ جیڑھ مرچیگینے نہ اِنت بلے چو کہ گوادر 1958 ( وہدے نواب بگٹی وزیرِ دفاع اَت ) پاکستان ءَ ھوار بوھگ ءَ پیسر گوادر ءِ جہہ منند ھنچو نہ اَت انت ( نوں سرکاری دپتر ، آرمی ، نیول ءُ کوسٹ گارڈ ءِ کیمپانی بوھگ گوں دری بیپاری مردماں ھوار ) گوادر ءِ جاہہ منند
(آبادی ) سے ھمنچک بوتگ پدا آ زمانگ ءِ ابرم ءِ موصمانی تہا ( ایٹم ءُ ہائیڈروجن بمبانی تراک ، کاربن ءُ مونوں آکسائیڈ گیس ) ھنچو بدلی سدلی ہم نبوتگ اے وڑا آ دور ءَ ھور ءُ باران گیشتر بوتگ اَنت ۔پمیشکہ چو اے وڑیں آپی جیڑھ ءَ نہ یتکگ کہ گوستگیں دہ سالانی میان ءَ گوادر ءِ مھلوک آماچ انت ۔ادا اے گپ گیرام کنگی نہ اِ نت کہ گوادر دنیا ءِ ایوکیں شہر نہ اِنت کہ بے آپی ءِ آماچ اِنت زر ءِ نزیک گورانی دنیا ءِ دراہیں شہرانی حال ہمیش انت بلے ایندگہ جاہ ءُ دواراں چو کہ بنی آدم ارزشت ءُ بستارے واھند اَنت پمیشکہ اودے واک دار ءُ مھلوک ءِ رھشوناں پیسریگی پیش بندی کتگ ءُ مھلوک ءَ چہ دُور ءُ دراجیں کور ءُ ڈیماں آپ دئیگ بوھگان انت چو کہ پاکستان ءَ کراچی شہر ءَ چہ حب ڈیم کینجیر جھیل ، سندھ ءِ کور ءَ آپ دئیگ بوھگان انت ہمے درگت ءَ وت گوادر ءِ ( پہ چین ، آرم فورسزانی کیمپ ءُ دری بیپاریانی ) حاتر ءَ میرانی ڈیم بندگ بوت بندات ءَ کہ عالمی واکانی حیال ءُ لیکھانی رِدا 2005 ءَ گوادر پورٹ ءَ بنداتی درچ ءَ کار بنا کت بلے بازیں جیڑھانی پیش در ءَ اے کار چو آوڑا دیم ءَ شت نبوت انت کہ رؤگی اَت پمیشکہ میرانی ڈیم سرکاری سند ءَ کشت ءُ کشاری پیش بندی ءَ پیش دارگ بوت ۔
اے دراہیں گپ ( Balocistan geopolitices stratagy ) نامی ایں کتاب ءَ گشگ بوتگ انت نوں ہرکس ءُ ناکس سہی اِنت کہ پنجاب ءِ موٹروے ءُ ایندگہ دگانی جوڑ کنگ ءِ مول ءُ مراد ھمے گوادر ۔کاشغر دگ ءِ بنداتی کار بوتگ انت کہ آہانی تہا گھنہ پُل ، ہوشاپ ، پنجگور دگ ، گوادر ،تربت دگ حالاں کہ تربت مند دگ ہم ھمے پیش بندی ءِ بہر بوتگ انت ۔بلے ھنچو کہ مرچی روکپتی ءُ رودرآتکی دگ ءِ جیڑھ چہ بنجاہی حکومت ءِ نیمگ ءَ چیر ءُ اندیم کنگ بوھگان انت ھمے وڑا اے کارانی بنداتءُ مول مراد پہنیام کنگ بوتگ ات انت۔ بژنی گپ ایش انت کہ ا ے دراہیں پیش بندی ءِ تہا گوادر ءِ مھلوک ءِ ھچ بستار ءُ ارزشتے نیست ۔نہ آہانی آپ ءُ نان لڈگ بابت ءَ بنجاہی حکومت ءَ پیش بندی یے کتگ ( البت اے دراہیں پیش بندیاں بلوچ پارلیمانی لیڈر ءُ رھشون سہی ءُ سرپد انت
بلے اے گپ گوں ورکراں کنگ نہ بنت ) بنجاہی سرکار وتی جاگہہ ء ،َ گوادر ءِ آپ ءِ جیڑھ ءَ اگاں بلوٹ ات وت دمگی ( صوبائی ) سرکار گوں وتی وسیلہاں گش ءُ گیوار کت کنت ۔ گوادر ءِ آپ ءِ جیڑھ ھنچو مزن نہ انت کہ پیش دارگ بوھگان انت البت اے پیش بندی ءِ تہا گوادر ءِ جہہ مننداں چہ گوادر شہر ءِ تہا لڈینگ ء ُ نگور ءُ ایندگہ دمگاں جاہ منند کنگ ءِ پندل ہم ھوار انت تنکہ باندا چین ءُ بنجاہی حکومت ءَ شہر ءِ تہا جاہ منندیں مردماں لڈینگ مزنیں جنجالے مبیت اگاں ناں گوادر شہرءِ مردماں آپ پجارینگ مزنیں جیڑھ یے نہ انت ( اے ھمے نیدل ءِ عکس اِنت کہ لیاری ءَ گینگ واری ءِ نام ءَ کنگ بوھگان اِنت ) ایشی ءِ گشواری ءِ حاترا زر ءِ آپ ءَ را وش کنگ بوت کنت ، آنکڑہ ڈیم ءَ را جوان ءُ گہتر کنگ بوت کنت ءُ پدا گوادر چہ میرانی ڈیم ءَ ہم آپ پجارینگ بوت کنت کہ باندا اگاں چین پورٹ ءَ دست ءَ بزور ات آئی ءِ آپ ءِ مستریں وسیلہ ھمے ڈیم نامینگ بوتگ بلے گپ ایش انت کہ مروچی پرچہ ناں ؟ ھمے بنکی گپ انت کہ بلوچ پارلیمانی پارٹیانی ورکر وتی کماش ءُ
رھشوناں جست بکن انت ۔رئیسانی حکومت ءِ دور ءَ وھدے گودار ءِ آپ ءِ جیڑھ ءَ وتی سر چست کت ءُ ڈیزلی ٹینکرے ءِ آپ ءِ نیاد 25,000 ات گڑا کیچ ءِ پیسریگیں وزیرے ءَ ھمے بھتام جتگ ات کہ حکومت لوٹ ات کہ گوادر ءَ چہ میرانی ڈیم ءَ آپ بدنت بلے میرانی ڈیم ءِ کش ءُ گور ءِ زمیندار (کہ ماں اسٹیبلشمنٹ ءَ آہانی واک ءُ حبر چہ آپیسریگیں وزیراں گیش اَت)
نیلنت کہ آھانی ڈگار ھشک بنت ۔نیلگ ءِ گپِ تہا چنچو راستی ہست اے گپ ءَ ھما وزیر بزانت بلے ھمے وزیر ءِ اے گپ وتی جاہ ءَ راست انت کہ میرانی ڈیم ءِ کش ءُ گور ءِ زمیندار ھما انت کہ آہانی سیادی یک ھواری ءَ گوں یک بلوچ پارلیمانی پارٹی یے ءَ ہست انت۔ اے گپ ءَ ابید ڈاکٹر عبد اُلمالک ءِ دور ءَ کوئٹہ ، چاغی ، نوشکے ، قلات ، خاران ءِ ضلعاں جشن ءُ لیب ءُ گوازیانی سرا کہ کروڑاں کلدار ھرچ کنگ بوتگ ات کہ آئی ءِ تہا کوئٹہ ءِ جشن ءَ شاہد آفریدی ءَ پہ یک روچے ءِ لیب ءَ یک کروڑ کلدار دئیگ بوتگ ات ۔اگاں اے دراہیں جشنانی ذرانی نیم وزیرِ اعلیٰ ءَ گوادر ءِ سرا ھرچ بکتین انت مرچی گوادر ءَ آپ ءِ جیڑھ نبوتگ ات۔بلے بل اشی ءَ ءُ بزور آئی ءَ ! وھدے رئیسانی حکومت ءِ تہا گوادر ءِ آپ ءِ جیڑھ پاد آتک گڈا اولی پارٹی نیشنل پارٹی ات کہ آئی ءَ گوادر ءِ مھلوک ءِ حاتر ءَ بی این پی ( عوامی ) ءِ حکومت ءَ رایر جت ءُ آہاناں نابود ءُ بے سنچ گشت بلے گندگ بوت کہ وھدے ھمے پارٹی وت کہ حکومت ءَ آتک بلوچستان ءِ وزراتِ اعلیٰ ءِ اُگدہ دست گپت کہ پاکستان ءِ پارلیمان ءِ بن دپتر ءِ تہا اولی رندا مکران ءِ ونڈا کپتگ ات ۔ءُ آہاں وتی ووٹ ہم گوادر ءِ نام ءَ گپت انت کہ بی این پی ( عوامی ) ءَ بہا کتگ ، اے ایمرجنسی ءُ میرٹ ءِ حکومت دو سال ءُ نیم برجاہ ات بلے گوادر ءِ آپ ءِ جیڑھ گشوار نبوت ۔ اگاں اے دوسال ءُ نیم ءَ ایوکا نیشنل پارٹی ، بی این پی ( مینگل ) ءُ عوامی ءِ ھما سنیٹر ، ایم ، این ، اے ، وزیر ءُ ایم پی اے کہ آہانی سیادی گوں مکرن ءَ انت تہنا وتی یک سالے ءِ دیم روی فنڈز ( تنخواہ ءُ ایندگہ مراعات ءُ فنڈزاناں) گوادرءِ عشق ءُ محبت ءَ بداتیناں ( اے درساں گودار ءَ پہ وتءَ پلاٹ ءُ زمین گپتگ ) تنیگہ گودار ءِ آپ ءِ جیڑھ گشوار بوتگ ات ۔ نوں اے درگت ءَ گوادر ءِ ھندی ( علاقائی ) رھشون باریں وتی برز ی رھشوناں میار ترینت
کت کن انت یا ناں اے گپ گوادر ءِ آپ ءِ جیڑھ ءَ گشوار کنگ ءَ بستار ے داریت۔ گُشتانک دے گُپتار ءُ گالاں باز کن
من مرتگاں مہرے شُد ءَ تو واز کن
