صوبہانی تہا گورنر ءِ ھند ءُ جاہ وفاق ءِ جہگیر ئیگ انت ۔ صوبہ ءِ ایندگہ چست ءُ ایر ءُ سوڈگانی ڈبہ ویزیر ااعلیٰ ئیگ انت تپاکی ءُ مول ءُ مراداں گوں پاکستان ءِ آئین ءِ رِدا گورنر ءَ صوبہ جیڑھ ءُ جاورانی تہا دزمانجی ءِ ھچ واک ءُ اکتیار نیست چو پاکستان ءِ (کماش ) صدر ئیگ ءَ ا آ تہا دستخطی واک دار انت۔ آئی ءَ سوڈگانی چپ ءُ بدل کنگ ءَ ھچ واک ءُ اکتیار نیست اگاں پاکستان ءِ وزیر اعظم وتی سوڈگ ءِ سمری یے پہ صدر ءَ دیم بدنت گڑا صدر ءَ بید ء دستخط ءَ دگہ کار ءُ روزگار ءِ نیست ۔ ہمے ھال برطانیہ ءِ شہہ بانک ’’ queen ‘‘ ئیگ انت برطانیہ ءِ ھچ سوڈگ بید ء شہہ بانک ءِ دستخط ءَ نبیت بلے پہ شہہ بانک ءَ المی انت کہ ھرچی پارلمینٹ ءُ وزیر اعظم سوڈگ کن انت آئی ءِ سرا لازمی انت کہ دستخط بکنت ۔ھمے ھال پاکستان ءِ صوبہانی تہا گورنرانی انت ۔اے ردیں گپے نہ انت کہ گورنر دارگ گوں سیاسی تپاکی ءُ مول ءُ مراداں گوں بنت بلے گورنر ءِ ھند ءُ جاہ ءَ نندگ ءَ پد گورنرءِ ھند ءُ جاہ ءِ شرپ ءُ میار ہمیش انت کہ ھچ لسانی ،گروہی ، راجی ءُ ھندی ٹولیانی پلہ مرزی ءَ مکنت چو کہ پنجاب ءَ وھدے محمد سرور ءَ وتا بے ریا ءُ رو کت نکت گڑا دزکشی ءِ جار جت ۔دومی نیمگ ءَ سندھ ءِ گورنر عشرت العباد ءِ نزیکی ءُ سیادی گوں ایم کیو ایم ءَ انت بلے عمران فاروق ءِ کوش ءِ کیس ءُ ایم کیو ایم ءِ کماش الطاف حسین ءِ بندیاں پد آئی ءَ گوں وتی اگدہ ’’ گورنری ‘‘ ءَ ھچ وڑیں بے ریاھی نیشت بلکیں پدرا کت کہ آ ایوکا ایم کیو ایم ءِ گورنر نہ انت بلکیں دراہیں سندھ ءِ گورنر انت بلے بلوچستان ءَ اے جیڑہ چپ انت بلوچستان ءِ گورنر ءِ بابت ءَ مردمانی لیکہ اولی روچ ءَ ہمیش ات کہ آ ایوکا یک لسانی ٹولی یے ءِ جہگیر انت بلے سرپدی ایں مردمانی گمان اَت کہ آ وتارا چہ اے پولنگاں دور دارات بلے سے سال ءِ میانجی ءَ ھندی تر ءُ تاب (گورنر تنیگہ ھچ بلوچ دمگ ءِ ترء تاب ءَ نہ شتگ ) حالاں کہ گپ و تران ءَ بازیں صوبائی سوڈگانی بابت ءَ ایوک ءَ وتی پارٹی ءُ لسانی ٹولی ءِ نپ ءُ سیتانی پلہ مرزی ءَ را آئی ءِ بالاد مانگیشکی (متنازعہ ) کتگ۔
افغان لڈوکیں مردم ببنت (گیشتر ہمائی ءِ پارٹی ءِ ووٹر انت )یا چاکر خان یونیورسٹی ءِ نام ءِ جیڑہ ببیت ۔چاکر خان یونیورسٹی برجم کنگ ءِ سوڈگ گوستگیں وزیر اعلیٰ ءِ دورءَ زورگ بوتگ ات اے درگت ءَ اگاں یک لسانی پارٹی یے ءَ شک ءُ پکے است ات باید انت کہ آہاں صوبائی پارلمینٹ ءَ گپ تران بکت انت یا بلّے Bill دیما بیاؤرت انت بلے اے دوئیں کارانی نہ کنگ آہانی نزوریاں پیش دارانت ءُ گورنر ءِ بالاد (شخصیت )ءَ را مانگیشیگی جوڑ کنگ ءَ انت ۔ ھمے افغان لڈوک ءُ مردم شماری ءِ بابت ءَ گورنر ءِ ھند ءُ جاہ تنیگہ پدّر نہ انت ، آئی ءِ اے بے ترک و تواری آئی ءِ پارٹی ءِ پلہ مرزی ءِ سرا ایر انت ۔ پمیشکا دم پہ ساعت بی این پی مینگل ءُ عوامی ءِ رھشون ءُ کارادار زھرشان کن اَنت اے درگت ءَ بلوچستان گِس ( اسمبلی )ءَ استیں پارٹی بائدیں اے گِلہّ ءُ زنگاں دُور کنگ ءِ جھد ءَ بکن اَنت پرچا کہ دور پہ کس ءَ پادار نہ بنت۔
دومی نیمگ ءَ بلوچ پارلیمانی پارٹیانی ایوک ءَ حالانکی تران (خباری بیان )اے پدّر کن انت کہ آ ہوں سک نزور انت یا سک مجبور کنگ بوتگ انت ۔پرچہ کہ چد ءُ پیسرءُ انوں صوبہ ءِ چیف ایگزیکٹیو بلوچ راج دوست (قوم پرست ) بوتگ انت اگاں آہاں مجبوری یے یا نزوری یے دیستگ ات گڑا بایدیں کہ آہاں گوں وتی کارداراں (ورکراں) پہنیام مکنتیں ءُ مہلوک ءِ دیم ءَ بیاؤرت انت پرچہ کہ بازیں جیڑہانی چیردئیگ ءُ اندیم کنگ ( وتی نپے بوت کنت ) پہ راج ءُ سرڈگار ءَ مزنیں تاوانے بیت کہ منافقی ءُ بے ایمانی ءِ شوندار انت۔ھمے درگت ءَ اپس زانت کہ منی واجہ جولاھگے !
