من وھدے گُڈی رند ءَ آ ئی ءَ را دیست منءَ را وتسرا وت وتی جند ءِ سرا نزاناں پرچا یکیں وھد ءَ کندگ ہم آتک ءُ گریھوگ ہم ۔۔۔
یکبرے دل ءَ گُشت کہ دپ ءَ پچ کن کوکار ءِ سرا بہ شاکار ءُ ھوک بکن بشان بلے ۔۔۔ بلے سے روچ اَت کہ اسپیت تام ءِ رنگ ہم نہ دیستگ اَت ۔۔۔ دپ ءُ لاپ ءِ تہا اسپیتیں گج ءُ لیتار ءَ ابید ھچی نیست اَت۔۔۔آروچی من آئی ءَ را پُریں پنچ سال ءَ پد دیستگ اَت۔۔۔ لنٹے چہ سرا ھُشک اتاںءُ پُچے سرا چہ پاداں ھیدءَ میچل ءُ تر اَتاں ۔۔۔ پاد ءِ ماتی لنکُک ءِ ناخن ئے چہ گوشت ءَ جتا اَ ت۔ من ءَ سک درد بوت ۔۔۔ ھؤ باز بزگ بوت بلے۔۔۔ بلے نوں آپ چہ سرا گوستگ اَت ۔۔۔
آ ہم یک وھدے اَت کہ مئے پیمیں غریب ءُ بزگانی لوگانی رزان ءُ کوپ ھر روچ پرشتاں بلے آئی ءِ پُچانی استری نہ پرشت بلے آ روچی ۔۔۔ آروچی من دیست کہ آئی ءِ پچانی استری وتی جاہ ءَ آئی ءِ دیم ءِ دو دتّان ہم پرشتگ اتاں ۔۔۔من اُش کتگ اَت کہ زند وتی رنگ ءَ اَنچو مٹّاایت ءُ بدل کنت انچو کہ ورنا ءُ نوک سوریں جنین آدم وتی پُچ ءُ گشاناں بدل کنت آئی ءِ گندگءَ پیسر من ندیستگ اَت بلے گندگ ءَ پد اے ہم دیست ۔۔۔ من وس کت ۔۔۔ من لوٹ اِت ہم بلے منی دل ءَ نزاناں پرچا نہ لوٹ اِت کہ من آئی ءَ گلاش بکناں۔۔۔من باز لوٹ اِت کہ من آئی ءَ گلاش بکناں بُچکاں اَنچو گلاش بکناں کہ انچو ماتے وتی گاریں چُک ءَ مُدتے ءَ پد در بگیج ایت ءُ گلاش بکنت۔چیا کہ آ منی کسانی ءِ شرتریں سنگتاں چہ یکے اَت بلے ۔۔۔بلے آ روچی۔۔۔ آروچی ما ھردو باز مزن بوتگ اتاں ءُ بدل ہم ۔۔۔۔۔۔
گوستگیں مَچ گُنش ءِ گپے ۔۔۔ آ ئی ءِ عمر کساس بیست ءُ نو اَت بلے آ گندگ بیست ءُ شش سال ءِ بوت۔۔۔جان ءَ پُر ناک اَ ت بُرز ءُ چکانٹ ہم۔۔۔میتگ ءِ مردماں آئی ءِ نام برمش کتگ ات ۔ آئی ءِ حقی ایں نام باھوٹ اَت ۔باز نام اَتاں آئی ءِ ۔۔۔جنکاں جتا نام پر کتگ ات سنگت ءُ بچکاں جتا ۔۔۔کالج ءَ جتائیں نامے ءَ زانگ بوت ءُ میتگ ءِ دکان دارانی کِرّا آئی ءِ نام دگرے اَت ۔۔۔۔۔۔ زیبا ات بلے اِنچو ہم نہ کہ ماسی پریاتون ءِ توکی جنک زمرد پرائی وت ءَ آس بہ دنت۔۔۔بَلُک انیپا ءِ کستریں نماسگ وت ءَ بان ءِ کُنٹ ءَ بدرنج ایت۔۔۔ ھؤ اے راستیں گپے زمرد بزاں ماسی پریاتون ءِ توکی جنک ءُ شیری۔۔۔ بَلُک انیپا ءِ کستریں نُماسگ ءَ انچو کتگ اَت پہ برمش ءِ مھرءَ۔۔۔ شیری ءِ سرجمیں نام شربانو اَ ت آئی ءِ مات ھما وھد ءَ بیران بوت وھدے آئی ءِ عمر ایوکا یازدہ سال اَت۔۔۔ بَلُک انیپا بزاں آئی ءِ مزنیں مات
ءَ پہ مھر آئی ءِ نام شیری بستگ اَت۔شیری چہ زمرد ءُ باھوٹ ھردوئیناں زیبدار ءُ ڈولدار اَت بلے نزاناں کہ پرچا آ انگت ءَ پہ باھوٹ ءَ زمرد ءَ گیش گنوک ءُ ریٹا اَت۔۔۔ بلے باھوٹ۔۔۔ باھوٹءَ را دوئینانی تب نیست اَت ۔۔۔ چیا نیست اَت ؟ ھدا بزانت ۔۔۔زمرد ءَ وت ءَ را پہ باھوٹ ءِ مھر ءِ حاترا سے رند ءَ آس مانداشتگ ات ءُ وت کُشی ءِ جہد کتگ اَت ھمے پیم ءَ شیری ءَ ہم وت ءَ را چار رند ءَ وتی بان ءِ کُنٹ ءَ درتکگ اَ ت بلے نزاناں کہ اے آ دوئینانی بھت اَت یا بد بھتی کہ آ ھردو درائیں رنداں رکیتگ اتاں ۔۔۔ حیر اے جتائیں گپ ءُ ھبر ءُ کسہاں۔۔۔ شیری ءِ مزنیں مات ءَ بازیں بر ءَ باھوٹ ءَ را و تی درائیں مال ءُ دولتانی لالچ داتگ اَت۔۔۔ ھمے پیم ءَ زمرد ءِ مات ءَ ہم ۔۔۔ زمرد ءِ پت ءَ را وھدے حال رست آ پہ وتی جنک ءِ ساہ ءِ گرگ ءَ تیار بوت ۔۔۔ بلے باھوٹ۔۔۔وھد ءِ باھوٹ ءِ کِرّا سُور ءُ آروس ءِ یا زمرد ءُ شیری ءِ نام گپت نزاناں چیا آئی ءِ چم ارس بوت اَنت ءُ چہ دیوان ءَ پاد اتک دگہ نیمگے چہ دیوان ءُ دیوان ءِ مردماں دُور شُت ءُ نِشت ۔۔۔
شپ اَت ۔۔۔ سیاہ ءُ تہاریں شپے اَت زمرد ءِ مات ءَ وتی لوگ واجہ بزاں زمرد ءِ پت راضی کت کہ آ چہ جنک ءِ مرگ ءُ بہنامی ءَ بہتر اِنت باھوٹ ءِ گس ءَ آئی ءِ مِنّت ءُ سماجت ءَ بروت ۔۔۔ باز دیراں پد وھدے زمرد ءِ ماس وتی لوگ و اجہ بزاں زمرد ءِ پت ءِ سرپد کنگ ءَ سوبین بوت گڈا آئی ءَ شکر ءِ دو نفل ونت گوں دروازگ تِکہ بوت ۔۔۔
زمرد ءِ پتءَ باھوٹ ءِ اوتاک ءِ دروازگ ٹُک اِ ت ۔۔۔ کس ءَ پچ نہ کت ۔۔۔دروازگ توکا بند اَ ت ۔۔۔ آ کساس نیم گھنٹہ ءَ داں دروازگ ءِ دپ ءَ اوشتات ، جَلّ اِت ءُ واری واری دروازگ ٹُک اِت ۔۔۔ آئی ءَ دم بُرت۔۔۔ ءُ پُشت ئے ماندات رؤگ ئے بنا کت کہ اوتاک ءِ دروازگ پچ بوت ۔۔۔
باھوٹ ءَ را سبز چکیں چینُکا ءُ جالاری دوچیئیں پُچ گورا اَ ت ۔۔۔۔۔۔ لُنٹ ءِ اَنچو سُہر اَتاں گُشے پان ءِ وارتگ اَت ۔۔۔۔۔۔اوتاک ءِ تہا سبزل سامگی ءِ سوت ءِ توار اَت ۔۔۔۔۔۔ ءُ پلنگ ءِ سرا کریم بخش دَرزی جاندرائی ءَ تچک ات۔۔۔۔۔۔زمرد ءِ پت ھوک کنان ءَ تتک ء دیم پہ و تی لوگءِ نیمگ ءَ ۔۔۔۔۔۔۔۔۔
