اے وشیں گپے کہ ایران ءِ کماش ( صدر ) حسن روحانی دو روچی تر ءُ تاب ءَ آدینگ ءِ روچ ءَ اسلام آباد ءَ آتک ۔ آئی ءَ را پاکستان ءِ تر ءُ تاب ءِ حاترا پاکستان ءِ وزیر اعظم نواز شریف ءَ وتی تہران ءِ تر ءُ تاب ءِ وھداں لوٹ اِتگ اَت کہ آئی ءَ منتگ اَت ۔کماش روحانی ءَ گوں وت ءَ یک مزنیں ڈل ( وفد ) ے آؤرتگ اَت گوں ۔ھنچو کہ گمان اَت چہ اے تر ءُ تاب ءَ بازیں معاھدانی سرا دستخط کنگ بوت ۔آئی ءِ ڈل ءِ تہابیپاری ءُ کار جاھ دارانی مزنیں بہرے ھوار اَت ۔
ایران ا یوکا مئے ہمساھگ نہ اِنت بلکیں براتیں ، اسلامی ءُ دوستیں ملکے کہ گو آئی ءَ مئے 900 کلو میٹر یک لٹے ( سیمسرے ) ھست اِنت ۔
ایشی ءِ ھواری 3000 کلو میٹر ءِ مکران تیاب کہ آئی ءِ گیشتریں بہر وت ایران ءِ گوْرااِنت ءُ نیم پاکستان ءِ ۔
سارتیں جنگ پہ گچینی شہنشاہ ایران ءِ وھداں پاکستان ءُ ایران دوئیں امریکا ءِ چیر دستی لشکری منگ نامہانی تہا ھوار اَت اَنت۔
عراق ءِ آشوب ءَ پد اے معاھدانی ءِ نام بغداد پیکٹ ءَ چہ بدل کنگ بوت ءُ Cento نامینگ بوت۔ایران ءِ آشوب ءَ پد اے معاھدانی چہ وت ءَ ھلاس بوت ۔ اے دراجیں مُدّت ءَ پاکستان ءُ ایران ءِ سیادی ( تعلقات ) براھندگی ، دوستیں ، اسلامی ءُ ہمساھگی بوتگ اَنت بلے اے سیادی ایوکا راجمانی ( سیاسی ) بوتگ اَنت ، چد ءُ دیم نہ شتگ اَنت ۔ایران ءِ آشوب ءَ پد ایران کار کرت ءُ پیش بندی بدل بوت اَنت ءُ ایران یک شل ءَ چہ راجمانی سیادیاں گیش بیپاری سیادیاں بستار ءُ ارزشت دیان بوتگ۔بلے اے درچ ءَ پاکستان ءِ تب ءُ میل جتابوتگ ءُ انگت ھست اِنت کہ آئی ءِ تب نہ راجمانی اِنت ءُ ننکہ بیپاری ، گوستگیں 30 سالاں ایران یک دست ءَ پاکستان ءَ را پہ بیپارءِ حاترا زور پر دئیگ ءَ بوتگ بلے پاکستان ءِ واک داراں مدام چہ بیپار ءَ جان دُز اِتگ ءُ شپکی دیمروئی داتگ تنکہ مردم رھبند ءِ سرا مالی دیمروئی کرت مکن اَنت ۔
پاکستان ءَ اے جیڑھ بہہ پہ سنگینی نہ ذرتگ کہ ایران ءِ ٹیل کانود ءِ ر وداآرگ بہ بیت تنکہ ریاست ءَ را ٹیکس برس ایت دمگی ءُ بنجاہی حکومت ءِ مالی جاور گہتر تر بہ بنت ۔پاکستان ءِ واک دار تنیگہ ٹیل ءُ ایندگہ شپکی چیزانی کماشی ءَ کنگان اَنت کہ اشانی نپ ءُ سِیت ءُ ایوکا شپک ءُ سیمسری
سپاھیاناں رسگان اَنت بلکیں ایران ءِ سیمسری دمگاں سیمسری بیپاری جاہ ( مارکیٹ ) جوڑ کنگ ءِ پنت ءُ شون ایران ءِ حکومت ءَ 30 سال ءَ پیسر داتگ اَت بلے پاکستانی واکداراں ایشی ءِ سرا نیشتگ ۔ھمے زوتاں کسٹمز ءِ یک مزن سندیں واکدارے ایران ءَ شتگ اَت آئی ءَ ھود ا ایران ءِ حکومت ءِ شون ءَ را انگت نہ منتگ ءُ گُشتگ کہ بلوچستان ءِ سیمسراں بیپار جاہ ( مارکیٹ ) جوڑ کنگ مبیت اے درگت ءَ بلکیں آ لوٹ اَنت کہ بلوچستان ءُ شپکی پراھاں سِیت مند تر اِنت ۔ایران ءِ کماش ءِ اے تر ءُ تاب یک جوانیں موھے ۔ اے وھداں امریکہ ءَ ہم وتی بندی چہ ایران ءِ سرا ھلاس کتگ اَنت نوں بائدیں دوئیں مُلک جوانی ءَ بیپاری معاہدہ بکن اَنت ۔گوادر ءَ را بائدیں پاکستان ءِ ریلوے ءِ رھبند ءِ ردا گوں کوئٹہ ، زاھدان ریلوے ءَ ھوار گیجگ بہ بیت تنکہ چاھبار پورٹ ءِ بیپار ھمے دگ ءَ کنگ ءَ بہ بیت ءُ پاکستان ءِ سرا ایران باور کت بکنت ءُ دوئیں مُلکانی میان ءَ ریل ءِ سرا بیپار بوت بکنت بلکیں اے درچ ءَ اگاں کوئٹہ ، زاھدان ریل ءِ دگ ءَ را میان اُستمانی سند ءِ جوڑ کنگ بہ بیت گڈا پاکستان درائیں دنیا ءَ ءُ ترکی ءُ ایران ءَ گوں ھمے ریل ءِ راہ ءَ بیپارءَ دیمروئی داتکنت ۔ چہ اے دگ ءَ مال ءِ بر ءُ آر ءِ ھرچ ءُ درچ کمتر بنت ءُ چہ ھمے راہ ءَ پاکستان چہ ایران ءَ ٹیل ہم آؤرت کنت ۔
چرے تر ءُ تاب ءَ بائدیں نپ ءُ سیت زورگ بوتیں ءُ پاکستان چہ ایران ءَ گِروک ( بجلی ) زُورگ ءِ دراہیں معاھداں بکنت تنکہ بلوچستان ءِ سیمسری دمگاں 30 ھزار میگا واٹ گروک (بجلی) زورگ بوت بکنت ۔ اے گپ گیرام کنگ مبیت کہ پاکستان ءِ گروک ءِ یک یونٹے ءِ نرک 12 کلدار اِنت وھدے ایران ھمے نرک ءِ نیم ءَ دئیگ ءَ ساڑی اِنت ۔بائدیں چہ ایران ءَ گروک زورگ بوت اِنت ءُ گشادی ءَ گروک ءِ برگ ءِ لائن ءِ سرا کار کنگ بہ بیت تنکہ یک سالے ءِ نیام ءَ مُلک ءِ دُور ءُ دراجیں دمگاں گروک سر بوت بکنت ءُ لوڑ شیڈنگ دراہیں مُلکءَ ھلاس بہ بیت ۔ اے درچ ءَ پاکستان بائدیں گوں ایران ءَ ھرچ وڑیں جنگ ءُ چوپ ءَ پرھیز بکنت دومی دست ءَ بلوچ پارلیمانی جھگیرانی ہم ذمہ واری اِنت کہ وتی راجی ءُ ڈیھی نپ ءُ سِیتاں بزان اَنت
