افغانستان ءَ بادشاہت ءِ ھلاس بوھگ ءَ پد لکّانی حساب ءَ افغان لڈ ءُ بار کنوک ماں پاکستان ءَ آتک اَنت کہ ایشانی مستریں کساس ماں بلوچستان ءَ جاہ منند بوت چہ افغانستان ءَ ایشانی درآھگ ءِ مستریں سوب اودءَ جنگ ءُ چوپ اَت ءُ دومی ماں پاکستان ءَ وشحال ءُ ماکی رنگ ءَ جوان تریں آکبتے ءِ شوہاز اَت ۔ دومی ماں بلوچستان ءَ برابری لوٹوکیں بازیں زور ءُ طاقتاں آہاناں چہ آہانی کَدّ ءَ گیش وش آہت کنگ اَت۔ البت اے لڈ ءُ بار کنوکیں افغانی کسانیں بہرے ماں کراچی ءُ صوبہ خیبر ءَ ھم جاہ منند بوت ۔
دومی دست ءَ پرے لڈوکیں افغاناں پاکستان ءِ حکومت ءِ میار سک وش ءُ نرم اَت پرچکہ پاکستان حکومت ماں افغانستان ءَ نوک جوڑ بوتگیں سردار داؤد ءِ حکومت ءَ چہ وش نہ اَت ءُ آئی ءَ سویت یونین حلاپ ءَ متحدہ امریکہ ءِ سنگتی ءُ دوزواہی کت ۔ اے درچ ءَ پاکستان ءِ لیڈر وزیر اعظم ذواُلفقار علی بھٹو افغان حکومت ءُ سویت یونین ءِ حلاپءَ دستے دیم ءَ اَت۔ پاکستان ءَ اے لڈوکیں مردم جوانی ءَ وش کت اَنت ءُ پدءَ دنیا ءِ دیم ءَ انچش پیش داشت کہ گُشے افغانستان ھم ھولو کاسٹ ءِ بوتگ آہاناں ھما درائیں آسراتی دئیگ بوت اَنت کہ وت پاکستان ءِ جاہ مننداں نہ رست اَنت ءُ دومی نیمگ ءَ آہاناں بازیں ھند ءُ جاہے چہ حکومت ءِ نیمگ ءَ دئیگ بوت ۔ ایشاناں کیمپانی تہا دارگ ءِ بدل ءَ شہراں جاہ منند کنگ بوت ۔ بلوچستان ءَ اے کار حکومت ءِ ھما پارٹی ءُ لیڈراں کت اَنت کہ بلوچے گیشیں جاہ منندی ( آبادی ) تُرسگان اَتاں بلے اے پارٹی ءُ لیڈراں آکبت ءَ گیرام کنان بلوچے بدواہی ءَ افغان لڈوکاناں جاہ ءُ بستار ءُ واک دات ۔ ھمے درچ ءَ حکومت ءَ امریکہ ءِ ھواری ءَ پہ اے افغان لڈوکاں فوجی ٹریننگ کیمپ جوڑ کت ءُ ایشاناں سویت آرمی دیم ءَ اوشتارینت ۔ ھمے دور پاکستان ءِ نیمگ ءَ اے افغان لڈوکاں شناسی کارڈ ءِ ھوری ءَ درائیں آسراتی دئیگ بوت اَنت ایشاناں تنکہ پاکستانی پاسپورٹ ھم دئیگ بوت کہ اے درائیں دنیا ءَ سپر کت بکن اَنت ءُ دنیاءَ سویت یونین ءِ ھلاپ بوتگیں کارانی تہا امریکہ ءُ ایندگہ ملکانی دست ءَ سبک کت بکن اَنت ۔ پد ءَ رند ءَ گَل ءَ پاکستان ءَ را اے لڈوکاں مردماں پہ دائمی پاکستان جاہ منند گشتگ اَت بلے ادے مہلوک اے گپ نہ ذرتگ ات ءُ ایشانی ادا جاہ منندی ءَ مکن کتگ اَت ۔ پاکستان ءِ حکومت ءَ ھم عالمی گَل ءَ اے لڈوکیں مردمانی پدا افغانستان ءَ واتر کنگ ءِ حاترا گشتگ اَت پرچکہ حکومت ءِ حیال ءَ اے افغان لڈوکیں مردم پاکستان ءِ سلامتی ءُ نیک نامی ءِ حاترا سک تُرسناک اَنت پرچکہ اے وھد ءَ ہاکستان ءِ بازیں ایجنسیانی رپورٹانی رِدا اے افغان پاکستان ءِ تہا نا شری ءَ ھوار دگہ بازیں سِل کاری ءُ درکانودی کاراں ھوار اَنت ۔ تنیگہ ھچ چشیں ناشری ویلے نہ بوتگ کہ آئی ءِ تہا افغان لڈوک ھوار مہ بنت ہرناشری ءَ آہانی دست مان اِنت ۔ ھمے درگت ءَ تنیگہ حکومت ءِ پاکستان ءَ ھزاراں شناسی کارڈ بند کتگ اَنت ۔
اے درچ ءَ انوں تہی کارانی وزیر ءَ جار جتگ کہ ھما درائیں مردم دزگیر کنگ بنت کہ افغان لڈوکیں مردمانی کاگداں دستخط بکن اَنت ۔ بائدیں حکومت اے درائیں افغاناں بشوہازات کہ اے وھد ءَ سرکاری ادارگاں کار کنگان اَنت ءُ وتار ا چیر اش داتگ اے درائیں مردمانی شناسی کارڈ پچ گرگ بہ بنت ءُ ایشاناں دزگیر کنگ بہ بیت دومی نیمگ ءَ ھما پارٹی ءُ لیڈرانی ھم مہار تُرند کنگ بہ بیت کہ آ اے افغان لڈوکیں مردمانی آسرا ءَ وتی جاہ منندی ( آبادی ) ءَ گیش کنگ ءِ پدا اَنت ۔ پرچکہ اے درگت ءَ مستریں گناہگار ھمیش اَنت کہ کسانیں سیاسی نپ ءُ سیتے ءِ حاترا ملک ءَ را ھنچکیں بلاہیں تاوانے دئیگان اَنت ۔
نوں بائدیں بلوچستان ءُ وفاقی حکومت عالمی گَل (U N O ) ءَ بُگش اَنت کہ عالمی گَل افغانستان ءِ تہا کیمپ جوڑ بکنت ءُ اے لڈوکیں مردماں ھمودا افغانستان ءَ ببارت ءُ ھمے کیمپاں جاہ منند بہ کنت چریشی ءَ چہ دنیا ءَ نا شری ( دہشت گردی ) ءِ ھم جوانیں وڑے ءَ گر ءُ دار بوت کنت ءُ پاکستان ءِ دامن ءِ پولنگ ھم شودگ بوت کن اَنت ۔
