نوکیں صوبائی حکومت ءَ وھدے اکتوبر 2013 ءَ سوگند وارت گڈا آئی ءِ اولی جار ھمیش اَت کہ آ درائیں کاراں میرٹ ءِ سرا کنت دومی کار ایش کنگ بوت کہ آئی ءَ وانگ ءُ زانگ ءُ ءِ سرا ایمرجنسی جت ۔ اے درگت ءَ مردماں اُمیت داشت کہ نوکیں حکومت بلکیں بلوچستان ءَ وانگ ءُ زانگ ءِ درچ ءَ جوان تریں گامگیجے بزورایت، اسل ءَ مہلوک ءِ اے اُمیت ءُ واھگ ھشکیں نہ اَت اَنت پرچکہ ’’ وانگی ایمرجنسی ‘‘ ءَ پد اولی رندءَ سیکریٹری سند ءِ مردم چکاس جاہانی ( Exam Hall ) تر ءُ تاب ءَ دارگ بوتگ اَت اَنت ۔دومی نیمگ ءَ کمشنر ، ڈی سی ءُ ایندگہ ھندی ( ضلعی) واکدار ( آفیسر ) پہ چکاسانی چار ءُ ٹپاس دارگ ءُ نامینگ بوت اَنت بلے ذُوت مہلوک ءَ مار اِت کہ اے درائیں گامگیج ایوک ءَ ’’ پاگ ءُ پڑکہ ءُ پچی، ھشکیں ملّگ ءُ ھچی ‘‘ اَنت پرچکہ وہدے کہ مری منگ نامہہ ءِ رِدءَ صوبائی حکومت ءِ اولی وھد ءُ پاس ھلاس بوت گڈا سرکاری دپترانی اے حال ھم دیما آتک کہ اے دوئیں سالاں حکومت وانگ ءُ زانگ ءِ پڈءَ دیمروئی کنگ ءِ بدل ءَ 10 درسد پدی شتگ ۔ اے ھنچیں پاشکیں گپے کہ سرکاری دپتراں تنیگہ رازے زانگ بیت بلے اے ’’ میرٹ ءُ ایمرجنسی ‘‘ ءِ حکیں راز اسکولانی ھیلانکی کتاباں پاشک کت۔ یک نیمگے ڈی سی ءُ کمشنراناں چکاس جاہاں نامینگ بوت نکہ مہلوک ءِ دیم ءَ حکومت ءِ پہ بلوچستان ءِ وانگ ءُ زانگ سنگینی درا ءُ زاھر بہ بیت ءُ دومی نیمگ ءَ اسکولاں وانگ ءِ بنا بوھگ ءَ دو 2 ماہ بوتگ کہ تنیگت ءَ اسکولاں ھیلانکی کتاب سر نہ بوتگ اَنت ۔ حکومت ءَ کہ ھما پبلیشراں پہ اے کتاباں کہ کروڑاں کلدار دنت آہاں تنیگہ اے کتاب نہ چاپ اِتگ اَنت ۔
اے وھد ءَ لس مردمے کجام ھم یک کتاب جاہے ءَ شت ءُ جست کت کنت کہ آئی ءَ را ھمے پسو رسیت کہ کتاب تنیگہ پبلش نہ بوتگ ءُ نہ یتکگ اَنت بوت کنت کہ اے ھیلانکی کتاب داں مئی ءَ چاپ بہ بنت ءُ نیادی ءَ بیا اَنت بلے نوں بلوچستان ءِ داراُلحکومت کوئٹہ ءَ ابید دُور ءُ دراجیں دمگاں کدی سر بنت۔۔۔؟ مھلوک بائدیں اے جست ءَ انوگیں حکومت ءَ بہ کنت ۔ دومی اگاں حکومت دو سال ءِ میانجی ءَ کتاباں چاپ ءُ اسکولاں سر کت نہ کنت گڈا آ چکاسانی وھداں ءُ چکاس جاھاں ڈی سی ءُ کمشنراں ءُ سیکریٹری سند ءِ مردمانی نامینگ ءُ تر ءُ تاب ءِ ڈرامہ ءَ بائدیں بند بہ کنت پرچکہ سوجگر ( طلباء ) ھما وھدءَ ونت ءُ در بُرت کنت کہ آئی ءِ کِرا کتابے بہ بیت وھدے کتاب کہ نیست گڈا سوجگر چہ کجا بوان ایت ؟
نقل ءِ دارگ جوانیں گامگیجے بلے حکومت بائدیں نقل ءَ چہ پیسری کارگیجاں بزانت ءُ اگاں آ نقل ءِ دارگ ءَ سنگین ءُ دل سِتک اِنت گڈا بائدیں کہ ماسٹرانی ٹریننگ ، آہانی وتی جاہاں بوھگ ، کتابانی وھد ءُ پاس چاپگ ءُ اسکولاں رسینگ ءُ اسکولانی تہا دراہیں ھژدری ایں آسراتیانی سر کنگ ءَ سنگین بہ بیت۔
اے درگت ءَ نوکیں وزیر اعلیٰ اول ءَ اے’’ ایجوکیشن ایمرجنسی ءُ میرٹ‘‘ ءِ وت گڈیں گپاں یلہ بدنت ءُ اے دِرچ ءَ سنگینیں گامگیج بزور ایت پرچکہ مدام مہلوک پہ ھشکیں اوگام ءُ گپ ءَ رپینگ بوت نہ کنت ءُ راستی ھرچ وڑءَ مہلوک ءِ دیم ءَ کیت ۔
