گوستگیں روچ ءَ پیش بندی ،دیمروئی ،گہتری ءِ واجہ احسن اقبال ءَ گوں چین ءِ راجی دیمروئی ءُُ گہتری ءِ چئیر مین شاؤشی ءَ ماں اسلام آباد گند ءُُ نند کت ءُُ یک برے پدا ماں گوادر دریمروئی کارانی سرا چار ءُُ ٹپاس کت ءُُ حالانی ردا دوئیں رھشوناں پاک چین اقتصادی راھداری ءِ سر گپ ءُُ تران کت ۔اے گنند ءُُ نند ءَ اے رندی پدا گشگ بوتگ کہ اے راھداری دو سال ءِ میان ءَ سرجم بیت۔ اے گپ وا پکا انت کہ چین ءُُ پاکستان ھرچ وڑا جہد کناں کہ گوادر پورٹ داں ۲۰۲۰ ءَ کار بنا بکنت پرچکہ اگاں ۲۰۲۰ داں اے کار سرجم کنگ نہ بوت گڈا دنیا اے دمگ ءَ مجبور بیت کہ چاھہبا را ہ ءَ وتی بیپار ءَ دیم ءَ ببارت ءُُ اگاں اے وڑ بوت گڈا عالمی تک ءَ پاکستان ءِ آشرپ ءُُ عزت نہ رک ایت کہ آئی ءَ پاکستان ۲۰۲۰ ءَ پد ماں دنیا ءَ چین ءِ چست ءُُ ایراں پد دلمانگ انت پمشکہ پاکستان ءِ حکومت ءُُ واکدار دم پہ ساھت اے گپ ءَ جن انت کہ پاک چین واھداری پاکستانءِ بحت بدل کنت بلئے اگاں اے درچ داں ۲۰۲۰ ءَ گوادر پورٹ ءِ کار بنا نہ بوت گڈا دنیا ءِ ایندگہ ملکاں ھوار وت چین پاکستان ءِ کوھن ءُُ کدیمیں دوستی ءَ پراموش بیت ءُُ ایران ءِ دست ءَ گپت کہ پہ پاکستان ءِ مھلوک ءَ جوانیں پالے نہ بیت۔
اے دراھیں پلاننگ ءُُ پیش بندی وتی جاگہہ ءَ بلوچستان ءُُ پہ گنجیں گوادر ءِ مھلوک ءِ گلہ ءُُ زنگ گوں وفاقی ءُُ صوبائی حکومت ءَ ھمیش انت کہ گوں چین واکدارں کہ گپ ءُُ تران بیت ایوکا گوادر دگ ءُُ سڑک ءُُ دیمروئی کارانی سرا گپ ءُُ تران بیت بلئے دومی دست دست ءَ گوادر مھلوک چہ آپ ،سڑک ءُُ دگ بنکی جان سلامتی آسراتی بے روزگاری ءُُ نبشتہ ءِ سل کاریاں چہ پہر یگ انت ۔ایشانی سرا ھچ وڑیں گپ ءُُ تران نہ بیت ھمے سوب انت کہ بلوچ مھلوک وفاق حکومت ءِ گپانی سر ستک نہ کنت ءُُ گچینی گوادر ءِ مھلوک پہ گوادر دیمروئی ءِ ھاترا بازیں شک دلگرانی ءِ آماچ انت دومی دست ءَ گوستگیں سالان راچے دوستانی حکومت ءَ ھو ں جوانین کردے پیش داشت نہ کتگ اے راج گوادر ءِ دیمروئی ءَ دلمانگ انت گڈا پیسرا دوستانی گیش کار وتی کیسگ ءُُ لاپا پرکنگ بوتگ ءُُ دومی نیمگ ءَ اے حکومت ءِ میان بلوچستان ءَ مھلوک ءُُ بنجاھی حکومت ءِ میان ءَ دوری گیشترودی کنگ بوتگ انت بلئے اگاں نونیں حکومت گوادر پدا مکران ءُُ پدا بلوچ مھلوک ءِ گلہ ءُُ زنگاں دور بکنت۔
