وزیر اعلیٰ نواب ثنا اللہ زہری ءُُ صوبائی وزیر سردار اسلم بزنجو ءَ یکجاھیں دیوانے گوں وزیر اعظم ءَ کتگ ،ھمے مجلس ءِ تہا وزیر اعظم ءَ جار جتگ ات کہ خضدار بلوچستان ءِ دومی مستریں شہر انت ایشی ءَ ایل پی جی ءِ کمک ءَ گیس دئیگ بہ بیت۔ایشی ءِ کار جاہ ءِ ھاتر ءَ یک نوکیں پلانٹے ھم جوڑ کنگ بہ بیتءُُ اے پلانٹ ایوک ءَ خضدار ءِ ھد ءُُ ابیلاں داں بہ بیت اے پلانٹ ءِ کمک ءَ گیش ءَ گیش مردماں گیس رسینگ بیت۔اے کار وزیر اعظم ءِ نیمگ ءَ چہ یک دیمروئی کارے ات، بلئے پہ خضدار ءِ مردمانی ھاتر ءَ اے یک بے واھگیں کارے زانگ بیت۔مئے لوٹ گوں ھکومت ءَ ھمیش انت کہ آ خضدار ءَ سوئی گیس بدنت ءُُ چہ قلات ءَ اے پائپ لائن در کنگ بہ بیت ۔سوراب ءُُ خضدار ءَ جوانیں کساسے ءَ گیس ءِ ھاجت انت پرچکہ ایشیءَ چہ واپاری ءُُ بجلی ءِ کارءِ پیلوئی بوت کنت۔پنجاب ءِ لوگ لوگ ءَ سوئی گیس است انت ءُُ آئیءِ دور ءُُ دراجیں دمگاں کہ ہندوستان ءِ ھدءُُ ابیلانی کش ءُُ گور ءَ کائینت انچو کہ گودر ءِ ھندا نت آھود ءَ ھم سوئی گیس دئیگ بوھگ ءَ انت ۔اے ھم یک راستیں ھبرے کہ سوئی گیس ءِ گیشتر کارمرزی پنجاب ءِ شہر ءَ بوھگ ءَ انت لوڈشیڈینگ ءِ دارگ ءِ ھاتر ءَ بلا بلاھیں جنریٹر جنگ بوتگ چہ ھمے جنریٹراں چہ وتی کارانی گیشواری بوھگ ءَ انت۔۔اے ھساب ءَ اگاں چارگ بہ بیت داں پنجاب %۸۰ درسد گیس کارمرز کنگ ءَ انت ءُُ بلوچستان ءِ بہر ءَ ایوک ءَ %۱۰ درسد پیداک انت۔سوئی گیس کہ چہ بلوچستا ن ءَ درکپگ ءَ انت بلئے بلوچستان ءِ جند ءَ یل کن ایدگہ دراھیں پاکستان ءِ شہراں اے گیس دئیگ بوھگ ءَ انت۔وفاق پاکستان ءِ مالیات ءِ تہا بلوچستان ءِ ایوک ءَ سوئی گیس ءَ چہ پیداک انت ءُُ چہ ایشیءَ ارباں کلدار انی نپ زورگ بوھگ ءَ انت۔دومی لبزاں گوں اگاں گوشگ بہ بیت گڈاں ما گشت کناں کہ پنجاہ ءُُ پنچ سال(۵۵) انت کہ سوئی گیس ءِ کارمرز ی بوھگ ءَ انت اگاں اے کاربندگ تیلانی سرا بوتیں داں تیل ءِ ھرچ ءِ تہا باز گیشی بوتگ ات کہ نوں اے دراھیں نپ ھکومت ءَ رستگ انت۔ بلوچستان ءِ دراھیں شہر ھپتاد ءُُ شش سال انت کہ چہ سوئی گیس ءَ زبہر انت ایشانی تہا خضدار،سوارب ،نال ،وڈھ، نوشکی،دالبندین،گوادر،پسنی،جیونی ،تربت،مند،تمپ،ءُُ اے دگہ بازیں شہر کہ کہ روداتکی ءُُ گوریچانی بلوچستان ءِ دمگ ھوار انت ۔وزیراعظم ءَ گوں محمدخان اچکزئی ءَ لوٹ کتگ کہ’’ عنایت کاریز ‘‘کہ یک کوچگے ھندے ، افغان ءِ ھد ءُُ ابیلانی کش ءُُ گور ءَ انت،اُد ءَ ھم سوئی گیس دئیگ بہ بیت۔ءُُ بلوچستان ءِ وتی جند ءِ دمگ خضدار ءُُ سوراب ءُُ نال ءُُ وڈھ چہ گیس ءَ زبہر کنگ بوتگ انت ءُُ ایشیءِ ھاتر ءَ ایوک ءَ ایل پی جی پلانٹ جوڑ کنگ بوھگ ءَ انت۔اے زبہر ی ایوک ءَ بلوچستان ءِ تہا گوں بلوچ دمگاں کنگ بوھگ اَنت اے دمگ ءِ مردم انگت ءَ چہ بجلی ءُُ گیس ءِ آسراتی آں زبہر اَنت۔مئے گوں ھکومتی وزیراں ھمے لوٹ انت کہ آ بلوچستان ءِ دراھیں دمگاں زوتاں چہ زوت سوئی گیس بدینت دانکہ بلوچ ھم وتی واپاری ءُُ مالیاتی گامان تیز کت بہ کنت ءُُ گوں دنیا ءَ ھمگامی کت بہ کنت ،پنجاب ءِ ھساب ءَ بلوچستان ءَ ھم ایشیءِ دراھیں ھک دئیگ بہ بیت ایشی ءَ ساری کہ دراھیں بلوچ جہگیر گوں وفاق ءَ چار سد ارب ڈالر ءِ لوٹ ءَ بہ کن انت ءُُ گیس ءِ سالداری نکر ءَ ایوک ءَ پنچ ارب ڈالر بہ کن انت کہ دراھیں بلوچانی ھک انت ،ما گوں بلوچ جہگیراں اے سرپدی دئیگ لوٹاں کہ آ پاکستان ءَ چہ وتی ابرمی گیس ءِ سرجمیں نکر ءِ لوٹ ءَ بہ کن اَنت پرچکہ بلوچستان ءِ ابرمی دراھیں وسائلانی سرا وفاق ءَ زوراں سری وتی دست ءَ کتگ اَنت ءُُ اے چہ ایشانی نکر ءُُ نہادانی دئیگ ءَ چہ انکار کتگ۔
