بلوچ زمین لُٹ ءُُ پُل ءِ چراگ جاہ یے جوڑ بوتگ کہ ادا زوراور ءُُ آہانی کاسہ لیس صدانی سالاں ورگ ءُُ چرگ ءَ انت ۔ مرچی باندا پاکستان ءِ میڈیا ءُُ رسانک دراں مشتاق رئیسانی نامی سرکاری بیوروکریٹ ءِے کرپشن ءُُ لٹ ءُُ پُل ءِ گپ بوئگ ءَ انت حالانکہ ہمے پاکستان ءِ میڈیا ہزاراں بلوچانی کُشگ ءُُ جونانی دور دیگ ءِ حبرانی باروا ترِکگے ہم نہ کنت۔
مشتاق رئیسانی ءِ قصہ چو اے وڑا انت کہ مرد بلوچستان ءِ خزانہ بزاں زرّ ءُُ مالانی ڈیپارٹمنٹ ءَ سیکریٹری ءِ اگدہ ءَ کار کنگ ءَ انت۔ گوستگیں روچاں نیب ءَ آئی ءَ را زرّانی ورگ ءُُ پُلگ ءِ الزام جت ،دست گیر کت ءُُ آئی ءِ لوگ ءَ چاپہ جت کہ اُواد زرّانی امبارئے دراتک ۔ اے ہما زرّ بوتگ انت کہ پہ بلوچ مہلوکانی حاطرا سڑک ءِ جوڑ کنگ ، لین (بجلی) دئیگ ءِ پراجیکٹ ، ورگ ءِ صافیں آپ ءِ دئیگ ءُُ ایدگہ بنیادی سہولتانی حاطرا کارمرز بوئگی اتنت بلے اے درائیں زرّ کہ گوْشگ ءِ رداہفتاد(۷۰) کروڑ ءَ چہ گیش انت واجہ مشتاق رئیسانی ءِ لوگ ءَ چہ دست کپتگ انت۔
اگاں سرظاہری بچار ات گڈا وَ اے یک سکیں سلیں ءُُ بدیں کارے کہ بلوچستان ءِ زرّاں لہتیں مردم لُٹ ءُُ پُل کنت ءُُ ایدگہ مہلوک واری ءُُ بزگی ءِ آماچ بنت۔ ما گندیں کہ مرچی بلوچستان وڑیں ڈیہہ ءِ کہ اودا قدرت ءِ کجام ہم مڈّی (Resource)نیست انت بلے پدا ہم ادے مہلوک عزاب ءُُ وار انت۔ اے درائیں مال ءُُ مڈّی لٹگ ءُُ پلگ بوئگ ءَ انت ءُُ پدا اے اجکہی ئیں گپ ءِ ہم نہ انت بلکن ءَ چہ کرناں اے ملک زوراورانی قبضہ ءَ بوتگ ءُُ لٹگ بوتگ کہ روچ ء مروچی اے دود برجا انت۔
بلے دومی نیمگا اگاں پہ شیواری پاکستان ءِ نظام ءِ سرا چمشانک ئے بہ دئیے گڈا اے ملکءِ حاکمانی سوچ ءُُ آہانی دود ءُُ روایت شری ءِ سرا پدرا بنت۔ پاکستان ءِ حاکمانی دل ءَ بلوچستان لُٹ ءُُ پُل ءِ چراگ جاہ انت کہ ادا چے زرّ ءُُ مالاں بہ لٹ ءُُ پنجاپ ءُُ ایدگہ صوبہانی سرا یا حاکمانی جندے ورگ ءُُ چرگ ءِ حاطرا کارمرز بہ کن۔
مشتاق رئیسانی بہ بیت یا کہ دگہ سرکاری نوکر ءُُ چاکر یا پاکستان ءِ پلہ مرزی کنوکیں سیاسی سروک بہ بنت ایشاناں ہمے ذمہ واری(ٹاسک) دئیگ بوتگ کہ شما وت بہ ورئے ءُُ مارا ورگ ءَ بِل ئے ءُُ پدا کہ ہرچی شما ورئے ایشانی تہا مئے بہر ہم مان انت۔
اے پُلگ ءُُ ورگ ءِ فائدگ سک باز انت یکے وَ ایش انت کہ ہما بلوچ سیاسی سروک( لینگاٹ پارٹی) کہ پاکستان ءِ پلہ مرز کنوک انت ءُُ بلوچ زمین ءَ گوں غداری کن انت ایشان ءَ ہمے زرّ ءُُ مالانی تہا بہر دئیگ بیت کہ ایشانی مُز انت۔ پدا پاکستان ءِ حاکمانی سیرلاپی ہمے زرّاں چے بیت کہ برے پہ امن ءُُ ایمنی ءِ نام ءَ ءُُ برے سپورٹس فیسٹیول ءُُ فلاں فیسٹیول ءِ نام ءَ چہ بلوچستان ءِ حزانگ ءَ در کنگ ءُُ ورگ بنت۔ پدا ہما سیاسی لینگاٹ یا سرکاری بیوروکریٹ کہ بلوچ زمین ءَ گوں تعلق دارانت زوراوریں حاکم ایشاناں یک برے سکین ءُُ موہ دئینت کہ شما زرّءُُ مال بہ ور ات ءُُ پدا ایشانی کرپشن ءُُ بے ایمانی ءِ فائل جوڑ کن انت کہ مارا یلہ مہ دئینت ءُُ دائم ءَ مئے غلامی ءَ بہ کن انت۔ بلے وہدئے کہ اے لینگانٹانی زرّ ءِ ورگ ءِ کساس سک باز ودیت کہ گڈا وتی (حاکمانی) جندے جوڑ کتگیں ادارگانی (نیب ءِ وڑیں) کمک ءَ اے زرّاں واپس پچ گرنت ءُُ گوں رسوائی ءَ مردا را یا تو بندی کننت یا پدا بلوچانی نیمگا دیم ئے دئینت کہ بچار ات کہ شمئے مہلوک چوں شمارا لٹ ءُُ پل کنگ ءَ انت گڈسرا اے لینگاٹ ءَ را یلہ دئینت ءُُ دگرے کارانت ءُُ بلوچانی سرا حاکمی پرما انت۔ اے سلسلہ چہ پاکستان ءِ جوڑ بوئگ ءَ برجا انت ءُُ باریں تاں چنت وہداں برجا بیت۔
اصل ءَ گناہ ءُُ میار ادے بلوچ لینگانٹانی نہ انت بلکن اے ملک ءِ ہما ہندو بنیا یا مہاجر میمن ءِ ذہنیت انت کہ یک برے وام بدئے ءُُ پدا گوں سُوت ءَ پچ ئے بہ گر۔ ادا ہندو بنیا زوراوریں حاکم انت کہ یک برے بلوچ ڈیہہ ءَ لُٹ انت پدا ہمیدے جہہ منندیں بلوچاں بہا زور انت ءُُ بلوچ زمین ءِ پُل ءُُ ور ءِ سکین ءَ دئینت ءُُ پدا کچ ءُُ رزوائی اے زرّ ءُُ مالاں پچ گرانت۔
ہما بلوچ کہ وتی ڈیہہ ءَ حاکمانی دست ءَ بہا کن انت ءُُ اے لُٹ ءُُ پلانی تہا ہوار بنت ایشانی نصیب ءَ رزوائی ءِ چہ ابید دگہ ہچّ توجیل نیست انت پرچہ کہ اے حاکم اگاں زرّ ءِ پلگ ءَ پرما انت گڈا پلیتگیں زرّانی پچ گرگءَ ہم شر زاننت بلئے صد افسوز پہ ہما بلوچ ءَ کہ وتی ڈیہہ ءَ بہا کنت ءُُ بدل ءَ رزوائی ءُُ بدنامی کٹّیت۔
