لہتیں روچ ءَ ساری بھار تءِ وزیراعظم مودی ءَ آؤکیں ھپتگ ءَ ایران ءِ دو روچی تروتاب ءِ جار پرینتگ بلئے نوکیں ھال ایش انت کہ اے وھداں افغانسان ءِ کماش ءَ ھم اے ترو تاب ءِ وھد ءَ ماں تہران ءَ ساڑی بوھگ ءِ احوال داتگ ۔گمان انت کہ اے سے ملکی دیوانے بیت کہ آئی ءِ بنگپ بیپار ءُُ کار وبار ءَ وت ماں وت ءَ سیہیں ملکاں دیمروئی دئیگ انت بلئے بژنیں گپ ایش انت کہ پاکستان ءِ سیہیں ھمساہگ وت ماں وت نند ءُُُ نیاد ءَ انت ءُُ پاکستان درباری انت ۔بھارت اے وھد ءَ چاہ بہار ءُُ ایران ءِ راہ ءَ داں میان رودرآتکی ملکاں سر بوھگ ءَ دلمانگ اِنت چہ اے زمین بندیں ملکاں بھارت مالی ءُُ بیپاری نپ ءُُ سیت گرگ ءَ دلمانگ انت اے درگت ءَ میان رودراتکی ملک ھم چاہ بہا ر ءِ راہ ءَ گوں بھارت ءَ بیپار کنگ ءَ دلمانگ انت پمشکہ اے چست ءُُ ھیرانی درچ ءَ ایران چاہ بہار دیمروئی دئیگان انت۔چاہ بہارکہ چہ گوادر ءِ دھکہ ءَ ساری جوڑ کنگ بوت ۔ایرانی مکران ءِ تیاب سرجمی ءُُ جوانی ءَ دیمروئی دئیگ بوتگ دگ ءُُ سڑک شری ءَ جوڑ کنگ بوتگ انت انوں ایرانی حکومت ءَ جار جتگ کہ آ چاہ بہار ءَ تہران ءِ وڑیں یک مزنیں میان استمانی بالی پٹے جوڑ کنت ءُُ مکران ءِ تیاب دپ ءِ دراھیں سڑک ءُُ دگاں پراہ ءُُ شاھیگان کنت ۔ میان رودآتکی ملک چہ پیسر ءَ ایران ءِ بندن ومیناب ( بندر عباس) ءَ وتی بیپاری کاراں کنگان انت کہ آئی ءِ دوری چہ اے ملکاں ۲۸۰۰ میل انت وھدیکہ چاہ بہارءِ نزیکی ایوکا ۱۴۰۰ میل انت کہ چہ میناب ءَ نیم انت اے وڑا اے دراجی ءِ کمی ءَ ھوار وھد زر ءُُ ھزمت ءِ کمی ھم بیت ۔چین ءَ چہ پیسر ءَ بن دپتر ی سلک دگ ءِ سرا گوں ایران ءَ وتی بیپاری بناکتگ کہ دمگ ءَ بیپاری کارانی دیمروئی ءَ کمک دنت ۔اے درچ ءَ میان رودرآتکی ملک ءُُ گچینی ءَ افغانستان ءُُ بھارت چاہ بہار ءِ راہ بیپار ءَ ھچ وڑا چک ءُُ پد نہ بنت پمشکہ انوگیں سے ملکی دیوان ماں دمگ ءَ بیپار ءُُ مالی چست ءُُ ھیرانی دیمروئی ءَ سک کمک کار بیت ایرانی واکدارانی رد ءَ چرے دیوان ءَ بازیں منگ نامہ یے ءِ سرا دست رند رندگ بنت کہ چہ چرے دست رنداں اے دمگاں بیپار کاروبارءُُ مالی چست ءُُ ھیر ءُُ کمک ءَ ھوار ایرانی مکران ءِ دگ ءُُ سڑکانی جوڑ کنگ ءُُ گہتر کنگ ھم ھوار انت۔ پیش ءَ پاکستان ءَ بھارت ءَ راراجمانی جاور حالانی رد ءَ گوں ایرانءِ بیپار ءِ ھاترا راہ نہ داتگ ۔۱۹۹۰ ءَ بھارت ءَ ایران ءَ را چاہ بہار بند ن ءَ دیمروئی دئیگ ءِ ھاترا گشت ھمے وھد ءَ ایران ءَ بھارت ءُُ پاکستا ن ءَ را رودرآتکی ملکاں گوں بیپار ءِ سلاہ جت ۔اے وھد ءَ ایران ءِ ھکومت ءَ ماں چاہ بہار دھکہ ءَ دو بہر پہ بھارت ءِ ھاترا نامینتگ ۔بھارت اے وھد ءَ ۷۸۰ ڈالر چاہ بہا ربندن ءِ سرا ھرچ کنگ ءَ دلمانگ انت چرے زراں بھارت ماں چاہ بہار ءَ کنٹینر ٹرمینلے ھم جوڑ کنگ لوٹ ات ۔اے وھد ءَ بھارت ءِ حکومت چاہ بہار ءَ داں زاھدان ءَ ریل ءِ دگے جوڑ کنگاں انت۔ سے ملکی اے دیوان ءِ اولی بدگمانی ایش انت کہ چریشی ءَ چے پاکستان چہ وتی نزیک تریں ھمساھگاں گستہ بوھگان انت اے ھاترا اے شریں گپے نہ انت کہ زاھریں اے دیوان ءَ سلامتی ءُُ رکینی گپ ءُُ ھبر ھم بوت کن انت اے گپ ھم دیم ءَ آتک کنت کہ اے سیہیں ملک وت ماں وتی سلامتی ءِ ھاترا گوں یکے دومی ءَ مدد ءُُ کمک بکن انت گوادر یک مزنیں ارزشت داریں بندنے بلئے گوادر ءَ بنکی رد ءَ آئی ءَ ھچ آسراتی نیست ءُُ ننکہ گوستگیں دہ سالاں حکومتاں اے نیمگ ءَ دلگوش گور نہ کتگ۔ گوادر دھکہ اولی بہر ءِ جوڑ بوھگ ءَ پدھچ وڑیں بیپاری ءُُ دیمروئی کارے گندگ نہ بیت گوادر ءِ بابت ءَ حکومتانی گیشتریں سلامتی ئیگ انت گوادر مہلوک ءُُ دمگ ءِ دیمروئی ءِ ھاترا ھچ وڑیں کارے بوھگ ءَ نہ انت حالانکہ گوادرءِ دیمروئی ءَ چے ملک مالے ءَ ارباں ڈالر گپت کنت ۔تینگہ ھچ وڑیں درملکی بیپاری ءَ گوادر ءِ نیمگ ءَ تیمچا نہ کتگ دومی دست ءَ دنیا ءِ دراھیں مزنیں ماں چاہ بہار ءَ ۵۰ ارب ڈالر ءِ ھرچ کنگ ءِ ھاترا ساڑی انت کہ چریشی ءَ چے آ یک انڈسٹری ءُُ بیپاری دمگے جوڑ کنگ ءُُ دلمانگ انت ۔اے درچ ءَ آمزنیں انڈسٹری جوڑ کنگ لوٹ انت گوں دو مزنیں اسٹیل پلانٹ ءَ ھوار چریشاں یکے جاپان ءُُ دومی ءَ ذرباری کوریا جوڑ کنگ ءَ دلمانگ انت۔اے دوئیں انڈسٹری سالے ۔۶.۳لکھ ٹن اسٹیل پیداک کن انت بھارت یک مزنیں سرکاری ھاک ءِ فیکٹری ءِ جنگ ءَ دلمانگ انت چریشی ءَ بھارت سے دمگ ( ریاست) ھواری ءَ کار کن انت ۔پرے کار ءَ بھارت گیس چہ ایران ءَ بہا زورایت ادا مئے حکومت ءَ جست کنگ بہ بیت کہ پرچہ گوادر چاہ بہار ءِ دیم ءَ ڈلگچار بوھگ ءَ انت؟ ءُُ دنیا ءِ دراھئیں بیپاری چا ہ بہار ءَ رؤگان انت گوادر چہ چاہ بہار ءَ ایوک ءَ ۷۲ کلومیٹر انت اے ھاترا بائد یں پاکستان ءِ حکومت ماں دمگءَ وتی ایوک ءَ بہ پروش ایت ءُُ ملک پہ الس ءِ ھاترا اے بیپاری چست ءُُ ھیراں وت ءَ ھوار بکنت۔
