بلوچی بلوچی اکیڈمی ءِ اے جہد مزنیں ارزشت ءُُ بستارے ءِ واھند انت کہ آئی ءِ باسک بلوچی زبان ءَ وانگی تک ءَ دیم ء َ آرگ ءَ دلمانگ انت بازیں لبزانتاں بلوچی ءِ بنداتی تبکانی کتابانی نبشتہ کنگ بنا ھم کتگ ءُُ بازیں کتاب نامداریں نبشتہ کاراں دئیگ بوتگ انت کہ اشاناں ھورت چارگ بہ بیت ءُُ چد گہتر کنگ بہ بنت اے نبشتہ کار بلوچی ءِ مزنیں نام ءُُ سرکاری کارندہ انت کہ ایشانی گیشتریں کار بلوچی زبان ءِ دیمروئی ءُُ گہتری انت ھمے زوتاں بلوچی اکیڈمی بندو بوجی ڈل ءِ دیوان اکیڈمی ءِ کماش عبدالواحد بندیگ ءِ پاگواجہی ءَ بوت کہ اے دیوان ءِ تہا کتابانی سرا جوانی چار ءُُ بچار کنگ بوت ءُُ اکیڈمی ءِ بندوبوجی ڈل ءِ باسکاں اے کتابانی سرا وتی لیکہ درشان کت انت ءُُ اےُ سوڈگ کت کہ انوگیں ساھگ ءُُ کتاب یک وارے پدا چارگ ءِ ھاترا ھمے نبشتہ کارا ں دئیگ بہ بنت اے کتابابانی تہا گیشیں کہتری ءُُ جوانی آرگ بہ بیت اے بلوچی اکیڈمی ءِ اولی ءُُ جوانی جہدے کہ آ لوٹ انت کہ اولی تبک ءَ بگراں مزن شہ دربرجاہ ءِ سند بلوچی ھیلانکی کتاب سوجگراں سر بہ بنت ۔اے درچ ءَ بلوچی اکیڈمی ءِ جہد انت کہ بلوچی زوت ماں بلوچستان ءَ ھیلانکی تک ءَ وانینگ بہ بیت بائدیں بلوچی اکیڈمی ءِ جہداناں ساڑاھگ بہ بیت پرچکہ اے وھدءَ بلوچی اکیڈمی ایوکیں گل انت کہ وتی دراھیںآسراتیاں پہ بلوچی زبان ءِ دیمروئی ءُُ گہتری ءِ ھاترا کارمرز کنگان انت ھمے زوتاں پیسریکیں وانگ ءُُ زانگ ءِ وزیر ءُُ نامداریں سائنسدان عطا اللہ رحمان ءَ اے گپ ءِ سک پلہ مرزی کتگ کہ بنداتی ھیلانک ماتی زباناں دئیگ بہ بیت ءُُ چدو پد اردو ءُُ انگریزی مزن سندیں ھیلانک ءُُ پولکار ی ءِ ھاتر کارمرز کنگ بہ بیت آئی ءِ لیکہ ایش انت ۹۰ درسد زانت ءُُ پولکاری ماں انگریزی زبان ءُُ بوھگان انت پمشکا چہ انگریزی ءَ ھم نپ ءُُ سیت زورگ بہ بیت آئی ءِ لیکہ ھمیش انت بنداتی ھیلانک ماتی زبان ءُُ مزن سندیں ھیلانک ماں انگریزی ءُُ اردو ءَ بہ بیت ھمے گپ ءَ میان استمان گل چہ دھکان جنگان انت بلوچستان حکومت ءَ نواب اکبر خان بگٹی ءِ دور ءَ سوڈگ کتگ ات کہ بنداتی ھیلانک ماں ماتی زباناں کنگ بہ بیت بلے نواب اکبر خان بگٹی ءِ اے سوڈگ ءِ سرا کار کنگ نہ بوت۔ حالانکہ نواب اکبر بگٹی ءِ حکومت ءَ پد ھیلانک ءِ وزیر وت راج دوست ءُُ وتی ورناھی ءَ بلوچی زبان ءِ دیمروئی ءِ اوگام جنوک ات بلئے وتی وزارت ءِ دور ءَ چہ وتی پیسریگیں گپ ءُُ نیاداں بے ترانگ بوت ایشیءَ ھوا ر بلوچستان ءِ نوکر شاھی ءَ بازیں واکدارے ماں بلوچی زبان ءَ ھیلانک ءِ منوک نہ انت پمشکہ نواب اکبر خان بگٹی ءِ سوڈگ دیم ءَ برگ ءِ بدل ءَ دارگ بوت ۔وھدے راج دوست ڈاکٹر عبدالمالک وزیر اعلی بوت آئی ءِ دروشم ھم ’’ پاک ءُُ پڑ کہ ءُُ پچی، ھشگیں ملگ ءُُ ھچی‘‘ ات واجہ دپ ءَ ھپتاد واجہ مٹ ات بلئے پہ ماتی زبان ئیُُ ھچ وڑیں گامیجگے حکومت ءِ نیمگ ءَ زورگ نہ بوت اگاں دل ءَ بکش ات انت گڈا اے دور ءَ بلوچی ماں بنداتی سند ءَ زلور ھیلانکی زبان بوتگ ات بلوچی اکیڈمی ءِ اے گامگیج ءِ درچ ءَ مالوٹیں کہ بلوچی گپ کنوکیں درائیں دمگاں پہ گچینی سندھ ءُُ پنجاب ءِ بلوچ ھنداں بلوچی بنداتی ھیلانکی سند ءُُ وانیتنگ بہ بیت چونا اے درائیں دمگ بن دپتری رد ءَ بلوچستان ءِ بہر ءُُ ونڈ بوتگ انت کہ برطانیہ ءِ حاکماں پہ وتی حاکمی نپ ءُُ سیتاں چہ بلوچستان ءَ سستگ ءُُ پنچاب ءُُ سندھ ءَ ھوار کتگ انت اگاں دو وار دمگانی ( صوبہ آنی) حد بندی کنگ بوتگ ءُُ دمگ راج ءُُ زبان ءِ درچ ءَ جوڑ کنگ بوت انت گڈا اے دمگ یک وارے پدا بلوچستان ءِ بہر ءُُ ونڈ بنت اے درچ ءَ گوں سندھ ءُُ پنجاج ءِ حکومتاں اے گمان کنگ بہ بیت کہ آ بلوچ ھند ءُُ دمگاں بلوچی زبان ءَ ھیلانکی درچ ءَ دیم ءَ کارانت ۔اے وھد ءَ بلوچی اکیڈمی ایوکیں گل انت کہ زبان ءُُ لبزانک ءِ پڈا راستی ءَ بلوچ راج ءِ جہگیر انت تری بلوچ کجام ھم دمگ ءُُ ملکے راجاہ منند بہ بنت اے درگت ءَ بلوچی اکیڈمی وتی دیوان ءُُ مراگشان درائیں دنیا ءِ بلوچان لوٹ ات ءُُ آئی ءِ باسک ءُُ جہگیر دنیا ءِ درائیں ملکاں بلوچ بلوچی ءُُ بلوچستان ءِ جہگیر ی ءَ کنگ ءَ انت۔