بلوچستان مدام ناروائیانی زد ءَ بوتگ گمان ھمیش اِنت کہ اے ریاستی پیش بند یے کہ بلوچستان ءَ را گروک ( بجلی) ءُُ گواتینک ( گیس) ءُُ بنکی آسراتیاں چے زبہر کنگ بہ بیت ایشیءِ پدرائیں دو درور الس ءِ دیم ءَ اَنت ۔یکے ایش کہ سوئی گواتینک بلوچستان ءِ دمگ سوئی ءَ ۵۷ سال ءَ ساری درگیجگ بوتگ اَت درائیں ملک ءَ ابرمی گوتینک ( قدرتی گیس) پجارینگ بوت ،پنجاب ءِ ھما کوچگ گچینی ناروال کہ رودرآتکی پنجاب ءِ سیمسری لٹ ءَ اِنت ایشیءَ را سوئی گواتینک سرکنگ بوت بلئے بلوچستان ءِ مزنیں شہر خصدار ، تربت پنجگور ،نوشکی ،دالبندین ،گوادر ءُُ ایندگہ شہراں روچ ء مرچی ابرمی گواتینک ءَ زبہر دارگ بوتگ ۔ اے سکیں بژنی گپے کہ بلوچستان اے وھداں داں بلوچستان ۲۹ ھند ( صلع) چہ ابرمی گواتینک ءَ زبہر انت۔
داں روچے مرچی بنجاھی حکومت ءَ وتی ۴۵ کرب کلدار ءِ بجٹ ءِ تہا بلوچستان ءِ الس ءَ را ابرمی گواتینک پجارینگ ءِ ھاترا کلدارے ھم ایر نہ کتگ ءُُ ننکہ دیم ءَ پہ ایشی ءَ گمانے ھست انت کہ بلوچستان ءِ ۲۹ ھند کہ چہ ابرمی گواتینک ءَ زبہر انت آھانی ھاترا جیڑگ بہ بیت ۔سی پیک ءِ نام ءُُ توار باز برز ءَ شتگ بازیں مالیاتی ھند جوڑ کنگ بوتگ اَنت کہ ایشانی تہا خضدار ھم ھوار انت بلئے خضدار ءَ ناں گواتینک ھست ،ناں گروک ءُُ ننکہ آپ ءُُ ننکہ دیمروئی ءِ بنکی کار کنگ بوتگ انت اے کارانی دھک درکار بہ بنت اے کار ایوک ءَ پہ لہتیں سالاں سرجم کنگ نہ بنت ۔تنگا وَ حکومت ءَ اے کول ھم نہ کتگ کہ آ خضدار ءَ گواتینک سر کنت ،وزیر اعلیٰ دزبندی ءِ سرا وزیراعظم ءَ ایوک ءَ اے کول کتگ کہ خضدار ابرمی گواتینک ناں ایوک ءَ ایل پی جی پلانٹے جنگ ءُُ دئیگ بیت کہ ایوک ءَ الس ءِ آس روکی کاراں کارمرز بوت کنت ،اے ھما شہرءِ گپ انت کہ سی پیک ءِ بنزہ انت ءُُ بلوچستان ءِ شال کوٹ ءَ پد دومی مستریں شہر انت ،اے درچ ءَ ایندگہ ۲۹ ھندانی بابت ءَ مردم گمان ھم کت نہ کن اَنت ۔ھمے وڑا گروک ءِ جیڑہ گواستگیں ۶۷ سالاں ھست ءُُ مست اِنت ملک ءَ ھستین ٹرانسمیشن لائن ایوک ءَ ۶۰۰ میگا واٹ برداشت کت کن انت ۔اے وھد ءَ ملک ءَ پد منتگیں صوبہ ءُُ ایوک ءَ ۱۶۰۰ میگا واٹ درکار اِنت بزاں بلوچستان ءَ را اے وھد ءَ چہ ۱۰۰۰ ءَ کم میگاواٹ گروگ دئیگ بوھگان انت ءُُ دلگوشی گپ ایش اِنت کہ بلوچستان ۲۴۰۰ میگاواٹ گروک پیداک کنگان انت اے گیشیں گروک سندھ ءُُ پنجاپ ءَ را دئیگ بوھگان انت۔ اے جیڑھ ءِ ھچ وڑیں گیشواری یے گندگ نہ بیت پرچکہ اے وھد ءَ بنجاھی حکومت پہ بلوچستان ءِ گروکءِ ھاترا ھچ دلگوشی یے گور کنگان نہ اِنت چرآئی ءَ چے پاور ٹرانسمیشن لائن بندگ بہ بیت۔تنکہ ھرچ کوچگ ءُُ میتگ ۲۴ ساھت ءَ گروک دئیگ بہ بیت ۔پرے کار ءَ بنجاھی حکومت کلدارے ھرچ کنگ ءَ ساڑ ی نہ اِنت ۔اے گپ ءَ بل دمگی حکومت ءَ نوکنڈی ءَ داں پاور ٹرانسمیشن لائن جوڑ کنگ ءِ ھاتر ءَ بنجاھی حکومت حکومت ءَ فنڈ دات تنکہ چہ مادن ءَ سر ریچیں اے دمگ ءَ گروک سر کنگ بہ بیت بلئے بنجاھی بہر گ ( ادارہ) کہ کیسکو ءِ نام ءَ زانگ بیت ھرچ سال ءَ چہ حکومت ءَ گیشیں زر ءُُ مالءِ طلب ءَ کنت ءءُُ البت ءَ اے درچ ءَ ھرچ سال چہ دمگی ( صوبائی) حکومت نوکیں زر ءُُ مال دز گپت ،نوکیں حکومت ءِ پیش بندی اگاں چارگ بہ بنت تا گمان نہ بیت کہ پاکستان ءِ حکومت ءَ چہ ایران ءَ بلوچستان یا گوادر ءِ ھاترا نیم نرک ءَ گروک بہا بزور ایت،جاور حال ءُُ پیش بندیانی بدل بوھگ ءَ پد اے گپ ءِ گمان بوت کنت کہ بلوچستان ءَ گروک ءُُ گواتینک ءِ جیڑہ ھلاس بہ بیت۔
