لُنجیں شپانی منت ءَ دمبرتگیں ساہ یے بجُیت
استال درائیں تتکگ اَنت پشکپتگیں ماہ یے بُجیت
آس ءِ زراب ءَ بوجی یے چولانی منگیراں گوں روت
دریا ءِ نیّت بُک اِتگ ،بس اَزتگیں راہ یے بُجیت
مرچاں مُجانی دامن ءَ کاگد نگواہ اَنت داگی ایں
مہرانی ٹولی سربتگ سنگرتگیں آہ یے بُجیت
شئیرانی ھلوت کسہ ءَ گوشداریت کیپ ءِ لذت ءَ
لبزانی گڈی نوبت اِنت پژمُردگیں زاہ یے بُجیت
ارساں شلاں چو بیری ءَ ڈڈیں دلانی میتگ ءَ
واھگ جُشّان اَنت منزل ءِ نوں منتگیں ڈاہ یے بُجیت
ہر دور ءَ درد ءِ گوازی اِنت ،ہرکس وت ءَ گوں رازی اِنت
بے چاڑیں نورؔ ءِ گس دپ ءَ یک ڈُرْتگیں جاہ یے بُجیت
