پہ زیارت ءِ ترو تاب ءَ ما دراتکگ اِتاں کہ مئے چم زیارت ءِ روڑ ءِ لمب ءَ بازیں پیٹی ہانی سرا کپت اَنت۔ پیٹیانی لمب ءِ مردءَ یک بنگوے جتگ ءُُ آئی تہا نشتگ ات ایشانی پانگی ءَ کنگ ات۔ من وتی سنگت ءَ را جست کرت کہ واجہ ادا چے کنگ ءَ اِنت؟۔ تو آئی منا گوشت کہ اے پیٹیانی تہا بینگ مکسک بینگ بندگاہاں۔ گڈاں ما نزیک ءَ شت آں کہ بچاراں معاملہ چے اِنت۔
تو ہمے بنگوہے تہانندوکیں کماشیں مردءَ وتی نام ’’ایران شاہ آفریدی‘‘ گشت ءُُ مئے گوںآئی ءَ درستی راستی بوت۔ ایران شاہ آفریدی پشتونخواہ ءِ علاقہ خیبر ایجنسی ءِ جاہ نندات۔ کہ آرا ہژدہ سالیں کہ آ بینگ ءِ کاروبار ءَ کنگ ءَ اِنت۔
تو انوں کہ آزیارت ءَ پہ وتی بینگ ءِ کاروبارءِ زیات کنگ ءَ آتکگ اَت۔
زیارت ءَ انوں درچک ءُُ دار مچ اَت آ بہارءِ موسم ءَ پلاناں زمین ءِ سرا سمبہینتاں کہ ایشانی وشبو ترا دور ءَ سما بیت ءُُ دماغ ءَ وش ءُُ تازگ کنت۔گڈاں ایران شاہ گوں وتی سنگت ءِ ءُُ یاراں ہمودا وتی پیٹیانی ایر کنت کہ بینگ مکسکانی پہر گرد ءُُ چرءِ بہ بیت ۔وہدے ایران شاہ را آئیگی کاروبارءِ بابت ءَ جست ءُُ پد کت گڈاں آئی گشت کہ ’’ اے بینگ مکسک چہ آسٹریلیا ءَ چہ آرگ بوتگ اَنت۔ ایشاناں بازیں علاقہانی مردماناں دئیگ بوتگ آ وتی کارو روزگار ءَ بکن اَنت بلے وہدے کہ آہاں گوں اے کار نہ بوت گڈا مئے مردماں زرت پہ کار ءُُ بارنوں گوں کامیابی ءَ مئے کارجاری ءُُ ساری اِنت‘‘۔ آئی گشت کہ ادءِ مکسکانی تہا آ صلاحیت نیست کہ آ ایشانی وڈءَ بینگ زیات ءَ چہ زیات جوڑ بکن اَنت۔
اے مکسک ءَ را پشتو زبان ءِ تہا’’ مچھئی‘‘ گشگ بیت۔ ءُُ ایشی عمر40روچا چہ بگر تاں 90روچ ءِ درمیان ءَ بیت۔ یا تو رندءَ اے وتی موت ءَ وت مریت یا کہ ایشاناں بالی مرگ وراَنت۔ ایران شاہ ایشانی چہ پیٹی ءَ ڈنءَ درآھگ ءِ ھاترا یک کسانیں راہ یے ہم جوڑ کرتگ ات کہ ایشانی رو ءُُ آ برجاہ بہ بیت۔
ہر پیٹی ءِ تہا ایوک ءَ یک مادگیں مکسکے بیت ءُُ ایندگہ درا مکسک کہ آہانی کساس پنچ تا دہ ہزار ءِ نیام ءَ نریں مکسک بنت۔ وہدیکہ پلانی موسم کئیت گڈاں اے زیات چہ زیات ھیک دیاں ءُُ ایشانی وراک ءِ نام ’’گردا‘‘ اِنت۔ وھد ے ایشانی حساب گیش بیت تو اے دگہ جاہے ءِ پٹ ءُُ پول ءَ کنت ءُُ روت۔
آسٹریلیا ءَ چہ آورتگیں اے بینگ مکسکانی قد و وزن ادءِ چہ مکسکاں زیات اِنت۔ ایشانی رنگ زرداِنت۔ بینگ ءِ اے کاروبارءِ ھاترا پیٹی بنائینگ بیت ءُُ ہر پیٹی ءِ تہا دہ دہ دانگ فریم مان بیت کہ فریمانی سرا اے وتی موم ءَ جوڑ کن انت ءُُ ہمیشی سرا بینگ بنداَنت۔ ءُُ اے بینگ 20چہ بگر تاں 25روچ ءِ تہا جوڑ کن انت۔ پدا ایشرا صاف کن اَنت ءُُ مارکیٹ ءَ پہ بہا کنگ ءَ روان دئیگ بنت۔
بینگ ءِ تہا وشتریں بینگ ’’بیر ‘‘بینگ انت کہ وہدے بیر بر و بور بنت گڈاں ایشاں ہما علاقہاں برانت۔ ءُُ آبینگ سک وش ءُُ تامدار بیت۔ ءُُ مئے علاقہا گشاں کہ کوہے بینگ ہم سک وش بیت۔ بلئے مئے ہند و دمگاں اے بینگ سک کم بیت اگاں کسے را دست بہ کپیت گڈاں بزاں بلاھیں غنیمتے۔
ایران شاہ 20اپریلءَ زیارت ءَ تکگ اے پلانی سیزن ات گڈاں ہمدا اڈءَ کن اَنت ءُُ پدءَ بیر ءِ بورءِ سیزن ءَ ہما علاقہاں روانت کہ ھودءَ ایشانی درچک سک زیات بنت۔
انوگیں وہد ءَ کہ اے بینگ جوڑ بوگاھیں ایشرا پشتو زبان ءَ ’’موری‘‘ گش اَنت۔ایشیءِ سیرے بینگءِ 1200کلدار اِنت۔ ءُُ درائیناں چہ گران تریں بینگ ہما بیرئیگ اِنت کہ آ چو شریں وڈے ءَ بہا بیت۔ ءُُ آ بینگ ءَ ادا سعودی عرب ءُُ اے دگہ ملکاں دیم دئیگ بیت ءُُ اے شریں قیمتے کاریت۔
ایران شاہ ءَ گشت کہ ’’ ہنچوشیں وہد کئیت کہ ایشاناں خوراک نہ رسیت ءُُ گیشتر زمستان ءَ گڈاں ایشانی واستہ شکر و گڈ لہڈ دینت کہ ایشانی ورگ ءَ چہ آ زندگ بنت۔ ءُُ کوہنیں بینگ ہم ایشاناں دئینت‘‘۔
آئی گشت کہ دہ روچ ءَ رند اے پیٹی ءِ دپ ءَ پچ کناں چاراں کہ بینگ توام بوتگ کہ نا اگاں پورا بہ بیت گڈاں ایشاں کشاں تو صاف کن انتءُُ ایشانی دپ ءِ پچ کنگ ءَ چہ پیسر اے وتی سرا جالی ءَ گوں چیر دئینت کہ ایشرا مکسک مہ ورنت۔ بلئے انوں مکسکانی گوں ایران شاہ ہنچیں سنگتی اے بوتگ کہ ایشرا ڈنگ نہ جن اَنت۔ ءُُ آئی ایشانی موڑ پجہ آورتگ۔ پمشکا آرا ایشانی ھواری ءَ ہچ پیمیں اڈءُُ جنجالے دیم نئیت انت۔
ایران شاہ ءِ گشگ ءِ مطابق ءَ اے آسٹریلیا ءِ بینگ مکسکانی آرگ ءَ رند ایشی کاروبار ہم باز جوان بوتگ۔ ساری ءَ بینگ ءِ یک مارکیٹے ’’ ترناب فارم ءِ‘‘ نام ء جوڑ ات کہ اے کاروبارءِ ھاترا بازیں بینگ فارم ءُُ اے دگہ دکانانی حساب 60چہ گیش انت ءُُ اے کاروبارءِ گیش کنگ ءِ ھاتر ءَ میان استمانی مارکیٹ جوڑ بوگاہیں۔ ءُُ ھمداں چہ در ملک ءَ بینگ پہ بہا کنگ ءِ ھاتر ءَ دیم دئیگ بیت۔
ایران شاہ ءِ گشگ ءِ مطابق ء آسٹریلیاءِ مکسک پہ بلوچستان ءِ پلاں شیدائیاں ءُُ اِدا موسم ایشاناں باز دوست بیت ۔ ءُُ اے ادا بینگ ہم باز جوڑ کن اَنت۔ پلانی سیزن ءِ ھلاس بوھگ ءَ گوں ہور ایران شاہ چہ اے علاقہا درء کئیت دیم پہ سرسبزیں علاقہے ءَ لڈ ءُُ بار کنت ،آ اے پیٹیانی دپاں جوانی ءَ بند کنت ءُُ تا وھدے کہ ایشاناں نوکیں جاھے مہ رسیت تو اے مکسک ہمے پیٹیانی تہا ھور بند بنت۔
کاروبار ءِ ذریعہ سک بازاَنت ءُُ بینگ ءِ اے کاروبار یک شریں کاروبارے۔ باید ہمیش اِنت کہ اے کاروبار بلوچستان ءِ تہا ھم آرگ بہ بیت۔
