انوگیں حکومت گوستگیں دوسالاں داں نوکیں مالیاتی کمیشن ءِ جوڑ کنگ ءَ سوب مند نہ بوتگ اگاں کہ ن لیگ یکشل ءَ اے جار ءَ پرینگ ءَ اِنت کہ آئی ءِ بنجاہی کابینہ ءِ تہا سکیں کتہ کاریں مردم ھوار اَنت بلئے پدا اوں ہما معاشی ءُُ مالیاتی جیڑہ کہ آھانی سیادی گوں بنجاھی باسکان ھست انت آ ڈلگچار کنگ بوتگ اَنت ۔حزب اختلاف ءِ گشگ ایش اِنت کہ بنجاھی حکومت ءِ دلگوش ایوک ءَ لہتیں دیمروئی کارانی سرا اِنت ءُُ ایندگہ درائیں دیمروئی کار پشت جنگ بوتگ اَنت ءُُ اے درچ ءَ نزورین ءُُ کسانیں باسک ڈالچار کنگ بوتگ اَنت ءُُ اے باسکانی کوہنیں درائیں جیڑہ داخل ء دپتر کنگ بوتگ اَنت ایشی ءِ مستریں درور نوکیں مالیاتی کمیشن ءِ جوڑ نہ کنگ اِنت۔
وہدیکہ گوستگیں کمیشن مدت دوسال بوتگ کہ ھلاس اِنت اے درگت ءَ بائدیں نوکیں کمیشن جوڑ بوت اِنت بلئے ایوک ءَ لہتیں سیاسی ءُُ وتیگی نپ سیتانی ھاتر ءَ جوڑ کنگ نہ بوتگ۔
اگاں کہ اے گپ ءِ سرا پارلیمنٹ ءِ تہا باز گپ ءُُ تران بوتگ بلئے حکومت ءِ گوش ءَ مورے نہ وارت اے بابت ءَ کسانیں باسک سندھ ءُُ بلوچستان ءِ بابت ءَ حسد ءُُ کینگ زاھر ءَ درا اَنت ۔۱۹۹۰ ءِ دھک ءَ اولی براں بلوچستان ءَ را ۱۰ ارب کلدار گیش گیس ڈولپمنٹ سرچارج ءِ درچ ءَ بخشاھگ بوت بلئے وزیراعظم نواز شریف ءَ ھچ پہ جان ءَ نیشت ءُُ پہ بیر بنجاھی حکومت ءِ سالی دیمروئی کارانی ھمنچو زر برت ءُُ پدا پہ ھمنچک ءَ بس نہ کت بلکیں جار جت کہ بلوچستان ازگاریں صوبہ یے ایشی ءَ گیشیں فنڈ گپتگ دومی دست ءَ پدا وھدے سیندک ءِ کار دیمروئی کنان بوت ءُُ سیندک ءِ کار ءَ سرجم کنگ ءِ حاترا گیشیں زر ءِ زلورت بوت گڑا وزیر اعظم ءَ نہ تہنا مکن کت بلکیں بینکاں ھم گشت کہ پہ سیندک ءَ فنڈ مدئینت۔چوکہ سیندک بنجاھی حکومت ءِ کارے اَت پمیشکہ بینکاں کلدارے ندات ۔پدا آ وھدے پیٹرولیم مادن ءِ بنجاھی وزیر چوہدری نثارءَ گوں سرکاری رہبندے سیندک ءَ را فنڈ دئیگ بند کنائینت۔ ءُُ چینی کمپنی ءَ را حکم دات کہ آ ارباں کلدارءِ ساز ءُُ ساماناں چہ سیندک ءَ بکش ایت ءُُ چینی درائیں مردم چہ ملک ءَ دربیائینت اے درائیں گپ ءُُ ٹال روتاکاں شنگ بوتگ اَنت اے درائیں جاور ھالاں ابید ھم بلوچستان ءِ مہلوک ءِ گمان ھمیش ات کہ حکومت کار رہبندانی تہا ءُُ مٹ ءُُ بدلی یے کیت بلئے چشیں جاورے تنیگت ءَ گندگ نہ بیت چریشی ءَ پیسر کہ دگہ نوکیں سیاسی یا آئینی مانگشے دیمءَ بئیت بنجاھی حکومت یا ملک ءِ نپ ءُُ سیت ھمیش اِنت کہ کسانیں باسک یا پہ گچینی سندھ ءُُ بلوچستان بائدیں رو ءُُ دم جوان ءُُ شر کنگ بہ بیت ۔پمیشکہ مئے گمان ھمیش انت کہ نہ ایوک نوکیں مالیاتی کمیشن ذوتان ذوت جوڑ کنگ بہ بیت ءُُ دروسیلہاں بہر ءُُ بانگی برابری ءُُ یک حساب ءَ کنگ بہ بیت ءُُ اے برابری ایوک ءَ درورسیلہانی سرا مہ بیت بلکیں پارلیمنٹ ءِ سیٹانی سرا ھم بہ بیت ۔ایشی ءِ ھاترا زلوری اِنت کہ صوبہ آنی وت واکی ءِ جیڑھ ءَ گیش و گیوار کنگ بہ بیت ءُُ بنجاھی حکومت ءِ واک ءُُ اختیار کم کنگ بہ بنت ۔اے درچ ءَ ایوک ءَ سلامتی ءُُ دری کارانی جیڑھ بنجاھی حکومت ءِ کرا بہ بنت ءُُ ایندگہ درائین واک ءُُ ذکت کسانیں باسکاں دئیگ بہ بنت بندر ءَ پاکستانیت
ھمیش اِنت ءُُ ھمے وتن دوستی اِنت ھم ، پاکستان ءِ جوڑ کنوکیں کماشانی ارادہ ھم ھمیش بوتگ اَنت بلئے افسر شاہی ءِ ۱۹۵۱ ءَ اقتدار ءِ پلگ ءَ پد بنجاہ ءَ را یک ’’ یک واکی‘‘ حکومتے جوڑ کنگ ءِ جہد کنگ بوت کہ چرآئی ءَ چے مرچی بنجاہ گیش طاقت دار ءُُ بنجاھی باسک نزور ءُُ ناتوان اَنت۔
