گوستگیں روچاں بنجاہی وزیر سکندر حیات بوسن ءُُ بلوچستان ءِ بنجاہی وزیر جام کمال ءَ گوں بلوچستان ءِ سروزیر نواب ثنا اللہ زہری ءِ کماشی ءَ یک مراگشے برجم داشت کہ بنجاہی حکومت ماں بلوچستان ءَ ماھی گیرانی حق ءُُ سیتاں پہازگ ءُُ ملک ءِ زری سیمرانی پہریزگ ءَ یک کاررہبندے( پالیسی) جوڑ کنگ ءَ دلمانگ اِنت ہمے حاترا بنجاہی حکومت ءَ سوڑگ کتگ کہ کسانیں د مگ ( صوبہ) آں گوں پنت ءُُ شون کنت کہ آ چہ اے کاررہبند ءَ چے لوٹ اَنت یا اے کاررہبند چے وڑا ٹہینگ بہ بیت؟ دوئیں بنجاہی وزیرانی گشگ ھمیش اَت کہ اے درچ ءَ بلوچستان ءَ پد گوں سندھ ءِ دمگی حکومت ءَ ھم گپ ءُُ تران ءُُ شور ءُُ سلاہ کن اَنت ۔بلوچستان ءَ اے مراگش ءَ ہپتگے گوستگ بلئے زانگ نہ بیت کہ گوں سندھ حکومت ءَ اے شور ءُُ سلاہی مراگاہ کدی کنگ بیت ؟ دومی گپ ایش اِنت کہ بنجاہی حکومت این ایف سی، گچین کاری ءُُ ھمے وڑیں ایندگہ جیڑھانی سرا درائیں بنجاہی باسکانی (وفاقی اکائی) دیواناں یکجاہ ءُُ ھوار برجم دارایت گڑا اے دیوان پرچہ جتا جتا برجم دارگ بوھگان اَنت؟ پدر اِنت کہ پنجاب ءُُ دمگ خیبر ءَ زرءُُ دریایے نگواہ ایت گڑا بائدیں سندھ ءُُ بلوچستانءِ ماہی گیرانی حق ءُُ سیت ءُُ زری سیمسرانی پہریزگ ءِ مراگش یکجاہ ءُُ ھوار برجم دارگ بوت اِنت۔
اگاں ناں نوکیں کار رہبند ءُُ کانود جوڑ کنگ ءِ نپ ءُُ سیت کجام حد ءَ بلوچ مہلوک ءُُ بلوچ تیاب دپ ءَ نندوکیں مہلوکاں سر بنت ؟ پرچکہ چدو پیش اے وڑیں کانود جوڑ ءُُ ھست اِنت بلئے آھانی سرا بنجاہی حکومت ھچ وڑا کارکنگان نہ اِنت چوکہ انوگیں مراگش ءَ گشگ بوتگ کہ دمگی حکومت ءَ را ۱۲ ناٹیکل ءَ چے ۲۰ ناٹیکل ماھیگ گرگ ءُُ کُشگ ءِ اجازت بیت بلئے گپ ایش اِنت کہ چدو پیش کہ ۱۲ ناٹیکل دمگی حکومت ءِ دست ءِ چیر ءَ بوتگ، آئی ءِ سرا دمگی حکومت ءِ زور شتگ یاناں ؟ چارگ بہ بیت کہ گجوءُُ نٹ وائر کارمرز کنوکیں لانچ چہ ۱۲ ناٹیکل ءَ جہل ۲ یا ۳ ناٹیکل ماھیگ ءِ گرگ ءَ نہ یتکگ اَنت؟ اگاں آتکگ اَنت گڑا ایشی ءَ ۲۰ ناٹیکل ءَ برگ ءَ چے فائدہ بیت ؟ دومی دست ءَ بلوچستان ءِ درائیں تیاب دپی ھلک ءُُ میتگاں یک گورے ورگی آپ نگواہ ایت ءُُ دومی دست ءَ بنجاہی حکومت چوں اے گپ ءَ جنت کہ آ ماھیگراں پہ دریاوردی ءَ آسراتی ءُُ دروسیلہ پجارین اِیت؟ ایشیءَ ھوار ھمے روچ ءَ کہ بلوچستان ءَ ھمے مراگش برجا ہ اَت ھمے روچ ءَ عالمی بینک ءَ پہ بلوچستان ءِ تیاب دپی دمگاں ۵ ارب کلدار ءِ جار ھم جتگ اَت۔ پرچہ؟ اے ھم زانگ نہ بیت ننکہ اے وھد ءَ اے زانگ بیت کہ بنجاہی حکومت ءِ دل ئےِ چی اَنتَ ؟ بائدیں اے بابت ءَ بلوچ لاپ دوست ،راج دوستءُُ د یمروئی دوست بہ نند اَنت ءُُ بچار اَنت پرچکہ اے بنجاہی وزیرانی ترو تاب ءَ پد بلوچستان ءِ سروزیر نواب ثنا اللہ زہری ءَ ماں گوادر ءَ زمینانی الاٹمنٹ ءِ سرا بندی دور کتگ !؟؟؟؟
