نصیرآباد ڈویژن ءَ ھمک روچ مردمانی زارشانی ءِ ھبر ءُُ ھال ھمک روچ روتاک ءُُ ھالرسانکی اے دگہ گلاں دیم ءَ پیداک اَنت آھود ءِ مردم پہ کورجوہی آپ ءَ تلوسگ ءَ اَنت۔ کہن ءُُ کور جوہی آپ نہ بوھگ ءِ دو مستریں سوب بوت کن اَنت یکے ایش کہ بلوچستان ءِ ھما دمگاں کورجوہی آپ رسگ ءَ نہ کہ آھود ءَ ایشیءِ جوہ کشگ بوتگ اِنت۔ اگاں چہ سندھ اے درگت ءَ وتی کچ ءُُ کساس ءَ آپ رسینگ ءَ اِنت بلئے بلوچستان ءِ تہا ورگی ساپیں آپ رسگ ءَ نہ اِنت ۔کیرتھر کورجوہ ءِ آپی کیاس ۱۴۰۰ تاس اِنت بلئے آئی ءَ را ۶۰۰ تاس رسینگ بوھگ ءَ اِنت ، ھمے ڈول ءَ پٹ فیڈر ءِ بہرگ ءَ ۶۰۰۰ تاس آپ بوھگی اِنت بلئے آھود ءَ ۲۰۰۰ تاس ءَ کم آپ رسینگ بوھگ ءَ اِنت۔بلوچستان چوکہ سندھ دریائے ءِ گڈی بہرگ ءَ ھور اِنت پمیشکا کلاں زیات تاوان بلوچستان ءِ مردمان بوھگان اِنت۔
پنجاب ءُُ سندھ وتی بہرگ ءِ ساپیں آپ ءَ زیر اِنت بلئے بلوچستان ءِ بہرگ ءَ ھچی پشت نہ کپیت۔اپسوز ءُُ دل سوچکیں ھبر ایش اِنت ھکومتی سروکاں گوں اے جیڑگ ءَ ھچ سروکار نیست اِنت ءُُ آپی وزیر ءَ ھم اے تک ءَ کورجاہانی بابت ءَ ھچبر جست ءُُ پد نہ کتگ ۔آئی ءِ گیشتریں تروگرد کوئٹہ ءُُ اسلام آباد ءَ اَنت آئیءَ را اے جیڑگ ءِ بابت ءَ ھچ سرپدی نیست اِنت ۔سکیرٹری ءُُ چیف انجینئراں اے بابت ءَ کس ارزشت نہ دنت ءُُ آھانی گپ سندھ ءُُ پنجاب ءَ گوشدار اوں نہ بیت ۔پمیشکا اے تک ءَ سروزیر ءَ وت گامگیج زورگی اِنت کہ آ گوں سندھ حکومت ءَ اے بابت ءَ تران بہ کنت ءُُ بلوچستان ءِ اے بہرگ ءَ ورگی ساپیں آپ رسینگ ءِ بابت ءَ پگر بہ کنت۔
اگاں ملک ءِ تہا کورجوہ ءُُ کہنانی تہا کمی است اِنت گڈاں بائد درائیں صوبہ آنی تہا یکے دومی ءِ کمک ءُُ مدت کنگ بہ بیت تہنا بلوچستان ءَ را بائد ءِ اے جیڑگ ءِ دیمپان کنگ مہ بیت ۔دومی سوب آپ نیستی ءِ ایش انت کہ ملک ءِ تہا کہن ءُُ کاریزانی سرا اوں لب ءُُ ملام واری کنگ بوھگ ءَ اِنت ایوک ءَ یک روچے ءِ ھاتر ءَ چیف سیکرٹری ءِ گشگ ءِ پداں چل (۴۰) ءِ کچ آپی پمپ دور کنگ بوت اَنت ءَُ آپ ءِ دُزی بندکنگ بوت ۔بلئے دومی روچ ءَ گیشتریں لب ءُُ ملام واری ءَ آپ ءِ دُزی پدا بندات کنگ بوت۔آپ دزی ءَ نہ ایوک ءَ جہلی تبک ءِ مردم بلئے وت سرکاری مردم ھم اے تک ءَ ھوار اَنت گڈاں اے ملک ءَ ورگی آپ لس مہلوک ءَ چتور دسترس ءَ اتک اَنت وھدے ملک ءِ سروک وت دُز اَنت ،بائدیں حکومت ءَ آپ ءِ دزی ءِ ھلاپ ءَ مزنیں ڈند ءُُ ملامے بستیں ءُُ کس ءَ وتی زوراکی کنگ ءَ مکن بہ کتیں ۔بائد حکومتی سروک درائیں آپی پمپ ءُُ وائر کورساں بند بہ کنت ءُُ آپ دُزان زوتاں چہ زوت بندیگ جاہ ءَ دزگیر بہ کنت۔بلئے ایشاں چہ ساری ءَ ھما افسرانی سرا کاروائی بہ کنت کہ آ گوں آپ دُزاں ھوار اَنت ءُُ چہ آہاں لب ءُُ ملام زور اَنت،سندھ ءِ افسری مردم بلوچستان ءِ لس مردمانی گوما زیادتی کنگ ءَ اِنت ءُُ آہانی کور جوہ دارگ ءُُ وتی نیمگ ءَ ترینگ بوھگ ءَ اَنت۔
بائد ہمیش اِنت کہ سندھ ءُُ پنجاب ءِ سروزیر گوں مزن وزیر ءَ گند ءُُ نندے بہ کن اَنت ءُُ بلوچستان ءِ ھمرائی ءَ ھما درائیں دمگاں کہ آھود ءِ ورگی آپ ھمے کور جوہاں چہ رسینگ بوھگ ءَ انت،ایشی ءِ درائیں جیڑگاں گیشوار بہ کن اَنت،دانکہ مردماں ورگی ساپیں آپے دسترس ءَ بہ بیت۔
