واجہ مہر اللہ مہر ءِ کتا ب’’ مڈی‘‘ منی دست ءِ براہ اَت ۔واجہ بلوچستان ءِ ڈھلگیں دربرجاہ ءِ زانتکار ءُُ شہ نویس اِنت۔آئی اے کتاب گوں دلی واھگاں نبشتہ کرتگ ءُُ حماد پبلی کیشنز ءَ اے کتاب اپریل ۲۰۱۴ ءَ چاپ کتگ ۔ایشی ءِ پیش گال مہر اللہ مینگل ءَ نبشتہ کتگ چرے کتاب ءَ ایف اے،بی اے ،ءُُ ایم اے ءِ وانندگ پائدگ چست کت کن اَنت ۔آہانی چکاس ءِ زلورت چرے کتاب ءَ پیلو بنت۔ واجہ مہر اللہ بلوچی زبان ءِ بنزہ ءَ نبشتہ کنت کہ بلوچی ،بلوچ راج ءِ زبان اِنت اے زبان پاکستان ءِ دْرستیں ھنداں ،ایرانی بلوچستان ،افغانستان ،سندھ ،پنجاب،ڈیرہ جات ،سجہیں عرب ملکاں ،یورپ ءُُ سنٹرل ایشیا ءَ گپ ءُُ تران کنگ بیت یک کساسے ءِ رد ءَ بلوچی زبان ءِ گپ جنوک ءُُ نبشتہ کنوک دو کروڑ ءَ بر ز اَنت ۔
مہر اللہ گوشیت بلوچی بنزہ ءِ پٹ پول کنوکانی تہاشیر محمد مری ،عبدالصمد امیر ی ،گرئرسن ،الف بائن ،لانگ ورتھ نام جوانی ءَ گرگ بنت آہانی حیال ءَ بلوچی زبان فارسی زبان ءَ نزیکی کنت۔چوکہ رود رآتکی بلوچی چہ سندھی زبان ءَ متاثر اِنت رو برکتی بلوچی چہ فارسی زبان ءَ ،اے کتاب ءِ تہا ماتی زبان ءِ وانگ ءُُ ئیل کنگ ءِ پنت ءُُ سوج رسیت ، چریشی ءَ ابید بلوچی ماہتاک ءُُ تاکبندانی و اکیڈمیانی رد ءُُ بند چاگرد ءِ تہا ادیب ءُُ شاعرانی مجلس ءُُ دیوان ءِ رنگ دروشم وتی بالاد کشی ءَ کن اَنت ماہتاکانی ردوم لبزانکی گوناپ ءِ دیمروئی گیش ءَ گیش بیت ، اے کتاب ءِ تہا بلوچ شاعرانی اولی دور ءَ بگر داں نوکیں دور ءِ یک ندارگے بیان کنگ بوتگ۔ھمے کتاب ءِ تہا چاکر ی دور ءِ ھم شئیرانی بابت ءَ بازیں چیزے دئیگ بوتگ ،ءُُ نوکیں دور ءِ شاعرانی زند ءُُ ازم ءِ بابت ءَ جوانیں پٹ ءُُ پولی ھساب ءَ نبشتہ کنگ بوتگ بلوچی لبزانک ءِ تہا شائرانی یک بلاھیں کچے گندگ بیت ءُُ آہانی شئیری دپتر بلوچ راج ءِ علمی خزانگ اَنت ھمک شاعر ءَ وتی ھساب ءَ چاگرد ءِ تب ءُُ ڈولانی درانگازی ءَ شئیر پربستگ ۔
دلگوش:پہ کتاب ءِ چمشانک ءَ دو(۲) بُنبند المی اِنت
اے کتاب ءِ تہا نہ تہنا شاعرانی بابت ءَ بلکیں ردانک نویسانی بابت ءَ اوں بازیں چیزے دئیگ بوتگ۔ مئے ردانک نویس مئے راجی زانتکارءُُ شہ نویس آں زیبائیں پٹ و پول کتگ ءُُ وتی دل ءِ جوزہ آں ردانک ءِ تہا درشان کتگ ،آہانی زند ءُُ ازم ءِ احوال ءَ مہراللہ ءَ بازیں چیزے داتگ ،اے بہرا ءِ تہا آئی ءَ کسمانک ،رجانک،آزمانک،گیدی قصہ،چاچ،داستان ،لچہ و بتل، ہوار اَنت۔
ندکار کتاب ءِ تہا کسمانک ءِ بندا ت ءِ بابت ءَ نبشتہ کنت کہ اے چہ یویان ءَ بندات بیت ءُُ بلوچی کسمانک ۱۹۵۷ ءَ اولی براں پیش دارگ بوتگ آئی ءِ توسیپ ءُُ ساڑہ ھرچند کنگ بہ بیت کم اِنت ۔ءُُ کسمانکی پڑ ءَ عطاشاد ،نعمت اللہ گچکی،ایوب خان ،غوث بخش صابر،کریم دشتی ،عبدالخالق بلوچ،امان اللہ گچکی ،بشیر احمد ،منیر احمد بادینی،ڈاکٹر علی دوست ،فضل خالق، عبدلحکیم بلوچ، حفیظ جان حسن آبادی، ءُُ اکرم صاحب خان ءِ نام گیشتر ارزشت دار اَنت ۔
کتاب ءِ گڈ سری بہر ءِ تہا چیزے کہنیں لبزانکار ءُُ گیدی کسہ ،چاچ ،داستان ،لچہ و بتلاں گوں براہ دار کتگ ،اے سجہیں تہر بلوچی لبزانک ءِ بن ءُُ بنزہ اَنت ایشانی چار ءُُ تپاس المی اِنت ۔بلوچی دود ءُُ ربیدگانی سرا مہر اللہ ءِ ند ءِ واگ کمیں ترند اَت بلئے ند چہ آئیءِ دستان در نہ کپتگ آئی ءِ جہد ءُُ کوشست لبزانکی پڑ ءَ لکھ توسیپ ءُُ ستا کرزیت ۔مہر اللہ مہر ءِ کتاب ’’ مڈی‘‘ یک گرانقدریں انعام ءِ حقدار اِنت ۔
