دو شمبئے روچ ءُُ ماہ ء اگست ءَ یکرندے پدا کوئٹہ شہر ءَ انچیں بیم ناکیں تراکے بوت کہ چرایشی ءِ توار ءُُ بیماناکی ءَ درائیں لوگ ویران کت اَنت ،درائیں چراگ کشت اَنت۔ تراک کنوک ءَ را نام نیست اَت بلئے آئیءَ بازیں نامے چہ استی ءِ تاکاں گار کت اَنت وت ھم بیران بوت گوں بلئے چشیں مردماں جنت کجا نسیب بیت کہ آ پہ جنت ءُُ اسلام ءِ نام ءَ چشیں وت کشیں تراک اَنت کہ ما اللہ ءِ راہ ءِ جہاد کنگ ءَ انت،جہاد اے چیز ءِ نام اَنت بلکیں جہاد ءِ مانا ءُُ بزانت ءَ اے بزگ بے زانت اَنت جہاد مردمانی کشگ ءُُ گار کنگ نہ اِنت کہ جہاد ءِ اسل مانا ءُُ بزانت مردمانی یکجا کنگ ءُُ درائیناں حدائی درس دئیگ انت ،چشیں مردم ایوک ءَ ناشرکار ءُُ بدکار اں دگہ ھچ۔
چشیں مردم کہ اسلام ءَ نام ءَ گراَنت بائدیں چشیں مردم دگ ءِ نیام ءَ پاہو دئیگ بہ بیت،دو شمبئے تران ءَ پنجاہ ءَ بزر مردم بیران ءُُ ھمے کساس ٹپی ءُُ ٹوری بوتگ کہ مرچی جتا جتائیں نادراہ جاہاں داخل اَنت آھانی میار ءُُ گنا ہ چے بوتگ کہ اے کشگ بوتگ اَنت؟ ایشانی تہا بے سور ءُُ سور کتگیں ورنا ھوار بوتگ اَنت باز آوکئیں عید ءِ مراداں بوتگ ءُُ باز ھمے نوبتاں نوکر بوتگ ءُُ انگت ءَ وتی اولی پگار اوں نہ گپتگ ات اے درس کشگ بوتاں ،ھما کہ ٹپی اَنت آھانی جاور ھم شر نہ انت بازیں مرگ ءِ سیمسراں سکرات ءَ اوشتوک اَنت ءُُ باز ءِ دستے ،باز ءِ پادے ،بازے چہ چماں کور اِنت ،باز چہ وتی جند ءِ سما ءَ گار اِنت ۔
اے تراک ءِ ہر ھساب ءَ ایر جنی بہ کن ات داں کم اِنت پرچکہ اے تراک ءِ ایرجنی ءَ چہ آ بیران بوتگیں مردم دوبر نیا اَنتءُُ نیکہ ٹپی بوتگیں مردم دراہ ءُُ جوڑ بنت بلکیں اے تراک کنوکانی سروک گرگ ءُُ کشگ بہ بیت گڈاں ایشانی ارواہ ءَ تاہیر رست کنت ءُُ بیران بوتگیں مردمانی کہول ءُُ کٹم ءِ مردمانی زرد سارت بہ بیت ۔اگاں نا پہ اشکیں اپسوز ءُُ گپ ءُُ تران ءَ ھچی بوت نہ کنت پرچکہ گوستگیں ششت ءُُ ھپت سال اِنت کہ حکومتی سروک اشک ءَ گپ ءُُ تران کنگ اَنت کس ءَ وتی کرد ءَ چہ چیزے نہ کتگ ءُُ پیش نہ داشتگ اَنت پمشکامپتیں گپ ءُُ تران ءَ ھچی نہ بیت۔
اے سہت ءَ کہ تراک بوتگ اَت بلوچستان ءِ سروزیر وتی بو پءُُ بالشتاں وش وابی ءِ تہا بوتگ ،اگاں چہ تراک سہب ءَ کنگ ءَ بوتگ ءُُ بلئے آئی ءَ را ھال ءَ بیگاہ گپتگ ءُُ آئیءَ گوں ھالرسانکی گلاں گوں تران کتگ ۔ اے تراک وکیلانی سرا کنگ بوتگ اَت بلئے کجام سوب ءَ اے انگت ءَ پدر نہ بوتگ تراک ءِ ذمہ واری داعیش ءُُ دگہ یک طالبان گلے پنام الاحرار ءَ قبول کتگ۔بلئے کجام سوب ءَ اے تراک کتگ اے گشگ نہ بوتگ ۔ ہما اَنت کہ نواب ثنا اللہ زہری ءِ حکومت سروکی ءَ اتکگ کوئٹہ شہر ءِ تہا تراکانی کچ ءُُ کساس بوتگ ءُُ گوستگیں دو سے ماہانی تہا تہنا کوئٹہ ءَ ھپت تراک کنگ بوتگ ءُُ مرچی بزاں ۱۱،۸،۲۰۱۶ ءَ دگہ تراکے زرغون روڈ ءَ کنگ بوتگ ۔اے دگہ دنیا ءِ مردم وتی لس مہلوک ءَ جوان ءَ چہ جوانتریں آسراتیانی دئیگ ءِ جہد کن اَنت ءُُ ہروڑیں دروسیلہ پہ آھاں گیشوار کنگ ءِ جہد کن اَنت بلئے پاکستان ءِ حکومت وتی لس مہلوک ءَ ترس ءُُ بیم ،تراک ءُُ تیرانی ،سوگات ءَ نوک نوکیں وڑ ءُُ پیم ءَ ھمک سال ،ھمک ماہ ءُُ نوں ھمک روچ بکشائیت۔بلئے انگت ءَ جئیے پاکستان ءُُ پاکستان ءِ روچ ھم دارگ بیت من گشاں بائد حکومتی سروک شرم بہ کن اَنت ءُُ پاکستان ءِ دارگ ءِ بدلہ ءَ تراک ءُُ تیرانی روچ ءَ جم بدار اَنت گہتر بیت۔
