بلوچستان ءَ جان سلامتی ءِ بہرگ ءِ ۸۰ درسد بجٹ کوئٹہ ءُُ ایشی ءِ سرکاری ھپتالاں ھرچ بیت ءُُ ایندگہ ۲۰ درسد ماں بلوچستان ءِ ایندگہ دمگاں ھرچ کنگ بیت اے درگت ءَ ڈویژیل ہیڈکوارٹر ھم چہ بنکی آسراتیاں زبہر انت ہمے سوب ءَ مردم پہ دراہی ءُُ دارو ءُُ درمان ءَ مزنیں شہر ءُُ درسرکاری ھسپتالاں رھادگ انت بلوچستان ءِ وزیراعلیٰ نواب ثنا اللہ زہری راست گشیت کہ نوں مہلوک سرکاری ھسپتال ءُُ ڈاکٹرانی سرا بھروسہ ءُُ باور نہ کنت۔درسرکاری جان سلامتی تک ’’ مافیا‘‘ءَ انگیر کتگ ءُُ آسرکاری ھسپتالاں ھچ وڑا کارءَ نیل انت۔اے ھد ءَ کہ ۵۰ کروڑ کلدار ءَ تیار بوتگیں ٹراناسینٹر کوئٹہ پنچ پریں سال ءَ پد کارءَ دارگ بوھگان انت اے بابت ءَ بلوچستان ءِ وزیر اعلیٰ ءَ جوانی دلگوش گور کتگ ءُُ دیوان ءِ تہا مردماناں گشتگ کہ ٹراماسینٹر ءَ را ماں ھپشکاں کارئیگی کنگ بہ بنت ءُُ ٹراماسینٹر ۱۳ پوسٹ ھم پر کنگ بہ بیت ۔دائمی سرجن ءُُ ڈاکٹر زوت دارگ بہ بنت ءُُ ایشی ءَ ھوار ٹراماسینٹر پہ مہلوک ءَ ۲۴ ساہتاں پچ کنگ بہ بیت ڈاکتر مافیا ءُُ درسرکاری ھسپتال مافیا ءَ پہ اے سینٹر ءَ پندل سازگ ءَ دارگ ءَ بہ بیت ءُُ چہ اے وڑیں پندلانی دیم ءِ دارگ ءَ ترندیں گامگیج زورگ بہ بیت تنکہ اے مافیاءِ لٹ ءُُ پل بند بہ بیت ۔بلئے اے وھد ءَ بوت کنت کہ سرکاری ھسپتال پہ دل کار بکن انت ءُُ مہلوک ءِ جان سلامتی ءِ جوانیں آسراتی بہ پجاریں انت ۔درچ مہلوک ءِ لوٹ ایش انت کہ سرکاری ڈاکٹرانی درسرکاری کارانی سرا بندش جنگ بہ بیت ءُُ اے ھم گشگ بہ بیت کہ ھروھد ءَ کہ ھسپتال ءَ اشانی زلورت بیت آ گوانک جنگ بنت اگاں ناں سرکار اشانی ھلاپ ءَ کاروائی بکنت۔
اے وھد ءَ ڈاکٹرانی ھال ایش انت کہ سرکاری ءُُ درسرکاری درمان جاھاں یک بیلے سداں نادراھاں چار انت کہ برے برے پہ یک نادرھے ءَ یک منٹے ھم نہ کپ ایت ءُُ دومی منٹ ءَ ڈاکٹر نادراہ ءَ چہ کلینک ءَ درکنت۔اے یک ھذمت کنوکے ءِ کرد نہ انت بلکیں یک کسابے ءِ کرد انت کہ نادراہ مراں ءَ کنت بلئے ڈاکٹر آئی ءِ زند ءَ را رکینگ ءِ بدل ءَ فیس ءِ گرگ ءَ پد ھم نادراہ ءَ را یک منٹے ءَ گیشتر نہ دنت پرچکہ یک منٹ ءَ گیش ءَ پد ڈاکٹر ءِ کٹ کم بیت ھمے جاورانی کوئٹہ ٹراماسینٹر ھم دیمپان انت وھدے اے بندگ بوھگان ات گڈا سرکاری واکدار کماک ات انت کہ چہ سرکاری ھزانگ ءَ ۵۰کروڑ کلدار درکنگان انت ءُُ ھرکس حساب جنگان ات کہ کئی بہر ءَ چنچو کپ ایت ؟گپ ھمیش انت کہ سرکاری واکدار بندگ ءُُ کروچگ ءَ سک دلگوش بنت پرچہ کمیشن ءُُ ( کک بیک) ھمے کار ءِ تہا انت وھدے کار بندگءُُ سرجم بیت ءُُ کمیش وار وتی بہر ءُُ ونڈاں بہر کن انت گڈا ھمے کار پد ءَ ڈالچار بیت۔ ھمے حال ٹراماسینٹر ئیگ انت پنچ سال پر انت کہ ٹراماسینٹر سرجم انت بلئے انگت کارئیگی نہ انت ایشی ءِ سوب ھمیش انت کہ سیادی داروکیں واکدار ءُُ پہ گچینی وزیر اے نیمگ ءَ دلگوش نہ دئنت اے وڑیں لس مہلوکی کاراں کئے دلگوش کنت؟ ایوکاگپ ءُُ گپتار بیت ءُُ بس۔
ھرچ راجکار ءُُ سرکاری واکدار ءَ وتی دکان کش اتگ ءُُ نشتگ۔ ایشانی مول ءُُ مراد وتی دل دوستیں مردم ءُُ پہ گچینی وتی سیاد ءُُ وارثاں ءُُ راجکاری کارندگاں روزگار ءُُ کارد ئیگ انت ۔ھمے حاترءَ راجکار پہ گچینی ھما کہ حکومت ءَ انت اشاں گوں ادارگ ءُُ ھسپتالاں ھچ وڑیں کارے نیست ٹراماسینٹر مہلوک ءِ کارءَ آھگان انت یاناں ،وزیراں گوں ایشی ءَ ھچ کار ءُُ کردے نیست ۔ایشی ءَ ھوار سول ھسپتال بے رھبندی ءُُ بے رھداری ءِ آماچ انت ڈاکٹر ءُُ سرجن مافیا درائیں روچ ءَ ایوکا یک ءُُ دو ساھت ڈیوٹی دئینت ءُُ پدا وتی جندی کلینکاں رؤنت ءُُ نندانت ءُُ آ ھانی جہد ھمیش انت کہ مہلوک ءِ لاشانی سرا گیش چہ گیش دولت بہ کٹ انت ۔اے بابت ءَ بائدیں گامگیج زورگ بہ بیت کہ ھرچ ڈاکٹر ءُُ سرجنے کہ سرکاری ھسپتالاں ڈیوٹی نہ دنت چہ سرکاری نوکری ءَ درکنگ بہ بیت۔
