کوئٹہ : ڈیرہ بگٹی میں بارودی سرنگ دھماکے میں ایف سی کے تین اہلکار زخمی ہوگئے۔ ایفی سی ذرائع کے مطابق ڈیرہ بگٹی کے علاقے زین لوٹی میں ایف سی کے اہلکار گاڑی میں معمول کے گشت میں مصروف تھے۔ اس دوران گاڑی کا ایک ٹائر نامعلوم دہشتگردوں کی جانب سے زیر زمین بچھائی گئی بارودی سرنگ سے ٹکرا گئی اور زوردار دھماکا ہوا۔ دھماکے سے گاڑی کو نقصآن پہنچا اور اس میں سوار تین اہلکار زخمی ہوگئے جنہیں طبی امداد کیلئے قریبی اسپتال منتقل کردیا گیا۔ زخمیوں میں سپاہی لطیف، سپاہی حضرت علی اور اللہ دتہ شامل ہیں، اس سے قبل بلوچستان کے علاقے ڈیرہ بگٹی میں سیکورٹی فورسز نے تخریب کاری کی کوشش ناکام بنادی کھیتوں میں نصب تین بارودی سرنگ قبضے میں لے لیں۔سیکورٹی ذرائع کے مطابق ڈیرہ بگٹی کے علاقے جوری میں ایف سی نے تخریب کاری کامنصوبہ ناکام بناتے ہوئے کھیتوں میں چھپائے گئے تین بارودی سرنگ کو قبضے میں لیکرتفتیش شروع کردی ۔واضح رہے کہ گزشتہ روز سیکورٹی فورسز کی گاڑی بارودی سرنگ سے ٹکرانے کے نتیجے میں تین سیکورٹی اہلکارزخمی ہوگئے تھے ۔
