اے یک راستے کہ ملک ءَ بازیں مدرسہ یے راجکاری پش درءَ جوڑ کنگ بوتگ انت ۔روس ءِ دیم ءَ بوتگیں جنگ ءِ وہداں راجکاری پش درءَ ہزاراں مدرسہ جوڑ کنگ بوت ۔اے مدرسہانی جوڑ کنگ ءَ عرب ملک ءُُ امریکہ مزنیں دستے مان ات ۔بلوچستان وڑیں نزگاریں صوبہ یے ءَ آئی ءِ دور ءُُ دراجیں دمگاں مزن مزنیں ماڑی پہ مدرسہ ءُُ آئی ءِ سوجگرانی نندگ ءَ جوڑ کنگ بوت انت آ وہد ءَ حکومت ءُُ امریکہ ءَ اے باورکتگ ات کہ ہورانکی ( اشراکیت) ءَ را دارگ ءَ مدرسہ سک ھژدری انت امریکہ ءِ کماشی ءَ مدرسہاناں جوانی ءَ کارمرز کنگ بوت کہ چہ اودا مجاہد ودی کنگ بوتگ ءُُ سوجگرانی جاہ منندیں جاہ ( ہاسٹل ) پہ بیش کار ی ءُُ دزجنگ ( گوریلاجنگ) ءِ ھیل کاری ءَ کارمرز کنگ بوت انت وہدے روس چہ افغانسان ءُُ درکپت پہ گچینی اے ھاترا کہ افغان وتی نگہبانی ءَ وت کرت کن انت ۔بلئے روس ءِ اے لیکہ وش منی یے بوت وہدے روس دوستیں حکومت ءَ پروش وارت پرچکہ گوریچانی ہم پتاں( اتحادی) اے حکومت ءِ پلہ مرزی یلہ دات ءُُ جنرل دوستم ءِ دہ لکھ مردماں کابل ءَ روس دوستیں حکومت ءِ رکینگ ءِ جہد نہ کت اے وڑا مجاہداں حکومت ءَ راگپت چریشی ءَ پد امریکہ ءُُ وعرب ملکاں وتی دست کش ات بلئے مدرسہانی بستار ءُُ ارزشت ہچ وڑا کم کنگ نہ بوت انت ایوک ءَ چہ عرب ملک ءُُ امریکہ ءَ کمک بند بوت انت بلئے جہاد ءِ نام ءَ ایندگہ دراں مدرسہاں فنڈ دئیگ برجاہ بوت کہ داں روچ ء مرچی برجاہ انت ۔اجکہی گپ ایش کہ انت بنجاہی ءُُ دمگی حکومت سالے ارباں کلدارے اے مکتبانی سرا ھرچ کنگان انت ءُُ درائیں ریاست ءُُ ریاست کارکنوکیں ادارگ اے مکتبانی پش پد انت بلئے روچ ء مرچی اشانی جاور بدل نہ بوتگ انت بلئے دومی دست ءَ مدرسہی کہ زانگ نہ بیت کہ اشانی فنڈ ءُُ زر چہ کجا کائینت بلئے اے مدرسہاں ورگ ءُُ چرگ ،نندگ ءُُ پادآھگ ءِ آسراتی چہ ایندگہ سرکاری مکتباں گیش تر ءُُ شرتر انت ۔
زانگ نہ بیت کہ حکومت ءَ پرچہ اے مدرسہانی کٹ ( آمدن) چیر داتگ ءُُ ننکہ حکومت ایشانی چست ءُُ ھیراں لس مہلوک سہی ءُُ سرپد کنت بازیں راجکاری گل وت مدرسہانی کماشی ءَ کنگان انت پرچکہ اے مدرسہ پراھاں ( ورکر) کارند ودی کنگان انت ۔
اے وھد ءَ بازیں راجکاری گل دیناں دستی سندھ ءِ حکومت ترسینگان انت کہ سندھ ءِ حکومت نہ مدرسہانی رجسٹریشن ءَ بکنت ءُُ ننکہ چہ مدرسہاں اے سرپدیاں بہ گپت کہ آہانی کٹ ءُُ آمدن چہ کجا کاینت ءُُ ننکہ سندھ ءِ حکومت اے بزانت کہ اے مدرسہ کانود ءِ ردا کار ءَ انت یا اے مدرسہ پہ چے مول ءُُ مراد ءَ ملک ءَ کار کنگان انت ؟منی جند یک ملکےءَ دووڑیں وانگی راہبندان ایر جنت کہ آ حکومت ءِ دست ءَ چے در بہ بنت ۔بائدیں ملک ءِ درائیں مکتب ءُُ مدرسہ ءَ حکومت ءِ دست ءِ چیر ءَ کار بکن انت ۔تنکہ ملک ءَ ایوک ءَ وانگ ءِ یک رہبندے بہ بیت۔ ملک ءَ انگریزی ءُُ عربی وانگ جتا جتا مہ بنت ۔جوانین ءُُ مزن سندیں وانگ پاکستان ءِ ھرچ جاہ منند ءِ بنکی حق انت ۔حکومت بائدیں مہلوک ءِ اے بنکی حق ءَ بہ من انت ءُُ درائیں وانگ جاہاں وتی دست ءَ بیا رایت، ایوک ءَ اقلیتانی مکتب جتا کنگ بہ بنت ۔راجکاری گل ءُُ نیکراھی مردماں چہ وت ءَ مکتب ءُُ وانگ جاہ جوڑ کنگ اجازت ھچ وڑ مہ بیت اے درچ ءَ بائدیں حکومت مشنری مکتباں دست مجنت پرچکہ آ چہ سداں سال ءَ وانگ ءُُ زانگ ءِ کار ءَ جوانی ءَ برجاہ داران انت ۔البت ایندگہ مکتب ءُُ اسکول حکومت ءِ چیر دستی ءَ کار بکن انت ۔ ملک ءِ ھرچ جاہ منندی ءَ وانگ ءِ آسراتی پجارینگ حکومت ءِ اولی ءُُ بنکی ذمہ واری انت ۔
