وھدے مارا جی جنزانی تہا زالبولانی کرد ءَ بچاریں گڈا زالبولانی مزنیں بہرے است انت چی ءَ کہ راجی جنزانی توکا بہر زورگ ایوک مردینانی ذمہ واری نہ انت بلکیں ایشیءِ توکا زالبولانی سرا اوں بازیں ذمہ واری بنت ءُُ دنیا ءِ بازیں راجی جنزانی توکا زالبولانی مزنیں کردے گندگ ءَ کیت ۔اگاں اسرائیل ءِ راجی جنز ءَ بچاریں گڈا مارا گولڈ امیر ءِ مزنیں کردے گندگ ءَ کیت آ وتی راجی آجوئی ءِ ہاتر ءَ امریکہ ءَ روت ءُُ دزبندی کنت کہ مارا شمئے کمک پکار انت مار اسرائیل ءِ جوڑ کنگ ءِ جہد ءَ ایں اسرائیل ءِ جوڑ کنگءِ جہدا ں آئی ءِ مزنیں کردے بوتگ اگاں بنگلہ دیش ءِ جنز ءَ بچاریں تہ مارا بانک بلقیس ءِ کرد گندگ ءَ کیت کہ آئی ءَ وتی گلزمین ءِ آجوئی ءِ ھاتر ءَ شپ ءُُ روچ جہد کتگ ءُُ دائم وتی راجی براتانی ھمکوپگ بوتگ ءُُ وتی سرجمیں زندے پہ راج ءَ ندر کتگ ءُُ وتی نامے راجدپتر ءِ توکا نمیران کتگ انچو اگاں مالجزائر ءِ راجی جنز ءَ بچاریں گڈا مارا جمیلہ الجزائری ءِ نام گندگ ءَ کیت کہ آئی ءَ پہ وتی راجی آجوئی ءِ ہاتر ءَ الجزائر ءِ ھچ لوگ یلہ نہ داتگ ءُُ لوگ پہ لوگ شتگ ءُُ زالبولان ءَ ءَ سرپدی داتگ جمیلہ الجزائری یک سیر ءُُ ھزگاریں لوگے ءَ ودی بوتگ بلئے آ چرے عیش ءُُ نوشاں سر گوستگ ءُُ الجزائر ءِ راجی جنز ءَ بہرے زرتگ وہدے فرانس ءِ فوج آئی ءَ دزگیر کنت تہ آ پشت ءَ نہ کنزیت ءُُ داں الجزائر ءِ آجوئی ءَ وتی جہداں برجاہ داریت ۔انچو ہندوستان ءِ راجی جنز ءِ دپتراں بچارایں تہ مارا بازیں زلبولانی نام گندگ ءَ کیت چریشاں یکے لکشمی بائی انت کہ آئی ءَ ءَ ہندوستان ءِ راجی جنز ءِ تہا بلائیں کردے پیشداشتگ۔آئی ءَ مردینی پوشاک پوش اتگ ءُُ ہماہانی ہمرائی ءَ جنگ ءَ بہرے زرتگ آئی ءِ دلیری انگریزاں ہم من اِتگ ۔
فلسطین ءِ آجوئی جنز ءِ توک ءَ اوں زالبولانی بلائیں کردے است لیلیٰ خالد ءِ نام ءَ ہرکس سرپد انت کہ آئی ءَ پہ فلسطین ءَ چنچو قربانی داتگ ۔اگاں ما بلوچ راجدپتر ءَ بچاریں تہ بازیں شیر زالے ءِ نام گندگ ءَ کیت دہلی ءِ جنگ ءَ میرچاکر ءِ گہار بی بی بانڈی گوں ہندوستان ءِ لشکر ءَ جنگ ءَ بہر زوریت ۔ہمے وڑ وہدے ایران ءِ سرکار داد شاہ ءُُ آئی ءِ سنگتاں انگر کنت تہ آئی ءِ گہار داد سلہ بند بیت ءُُ جنگ کنت داں وتی سر ءَ ندر کنت بلوچ راجی جنز ءِ دگہ بازیں وھد ءُُ نوبتاں اگاں چمشانک دئیگ بہ بیت گڈا مارا مردین آدمانی لڑ ءَ بلوچ زالبولانی ہم کردے گندگ ءَ کیت اِنت کہ پہ بلوچاں یک مزنیں شان ءِ ھبرے کہ ھمک جنز ءُُ جنگ ءُُ جُڑاں بلوچ زالبولاں آہانی ہمراہ داری کتگ۔
زالبول اوں ہمے چاگرد ءِ بہرے پمشکہ کجام یک جنزے بہ بیت آئی ءِ توکا زالبول یک المی ایں بہرے ءُُ زالبولانی بہر زورگ ءَ ابید ہر پیمیں راجی جنز ناسرجم گندگ ءَ کیت۔
