زیندغ ءَ نیلی کل اے حیوان ءَ
مور سہدار جن و انسان ءَ
(جوانسال )
ہر نفس ءَ را موت ءِ ذائقہ چکھغی المی ایں مرغ میار نیستیں ہرکسے کہ اے کوڑویں جہان ءَ آتکہ آنہی را یک نہ یک روچے ضرور روغی ایں بھلے صد سال زیندغ بی گڑدے آنہی را موت ءِ پیالہ ورغی ایں لکھیں بادشاہ، ولی ، قطب ءُُ انبیا اے جہان ءَ آتکو کوڑی واڑ تھو وتی روچ پھیلو کھثو راہی ءِ مدم بیث غاں ۔اے جہاں یک بازارے مثل ایں کہ کئی مڑدم یک جھٹا آغان تو کئی مڑدم روغاں ۔ہر کسارا یک روچے ضرور روغی ایں مرچی آں شتا با نگھا مارا روغی ایں بس ایذا ہر کس وتی باورے انتظار ا کھنغین ۔
لیکن چھی اے انسان ہمے رنگیں پیغاں کہ آں مڑتھودے زیند غیں آ نہارا مڑتھین تہا شما ر نہ کنغی بی ۔پرچے کہ آ نہاں وتی زند صرف وثی واسطا نہ گوازینت ءَ بلکہ آنہاں وثی زند وثی جوانی وثی ہستی او نیستی صرف او صرف وثی راج وثی قوم وثی ماثیں وتن پہ قربان کزا۔او آنہاں وثی زند نیا ما ہمیں رنگیں عظمیں کار و جہد کزغاں کہ آ نہیں کاراستہ راجا را مزنیں بلائیں فائدہ رست ءَ ہمیں رنگیں بچیں سرا راجا وتن را ہمشہ باز ناز بیغیں ۔ہمیں ڈولین یک عظمیں انسان واجہ عبداللہ جان جمالدینی دے استیں ۔واجہ ءَ وثی زندگی آ ما بلوچ راجا پہ بلائیں کارا او جہد کت غاں خصوصاً بلوچی زبان و لبزانک ءِ باروا واجہ ءِ جہد کھسا شہ پوشیدہ نیستاں ۔
ایشی آ شہ علاوہ بلو چ راجا ما سیاسی شعور وجہد بیدار رکھنغا پریک بلائیں تھریکے لٹ خانہ ءِ ناما شروع کت غاں تحریک ءِ واسطہ واجہ ءِ او آ نہی سنگتاں بلائیں قربانی داثغان اے تھریک شروع کھنغاشہ پھیش واجہ وتی نوکری ہم دور ءِ تھصلیدار ی وثی راج ءِ واسطہ قربان کتگ ۔پرچے کہ دنیا را ہما مڑدم عظیم گوشغے لائق استاں کہ آں وثی زند دہمی ایں واسطہ گوازنغاں ہمے وڑا ملک و ریاستانی سرا حکمرانی کھنغے بجائے مڑدمیں ءِ لانی سرا ہمکرانی کھغنت وثی کردار و جہد ءِ بدولت مڑدمیں دل و دماغ سرا بلائیں اڑے کھلنت حالانکہ مڑدین دل و دماغ ءِ سرا اثر کھغ ءِ کسہ آسہانیں کارے نیستیں لیکن یک راستیں و سچائیں مڑد وثی سچائی ءِ زور سرا مڑدمیں دلانی سرا اثر کت کنت ہمیں رنگیں سچائیں مڑدمیں سچائی ءِ بازیں رنگ و دروشم است انت یعنی نظریہ ءِ سچائی سوچ و پکر ءِ سچائی دل و داماغ ءِ سچائی نیت و ارادہ ءِ سچائی ہروختے کہ انسان ءِ ہر فعلا ما سچائی ھدا شہ زیازبی تو گڑا آنہی سچائی مڑدمانی دلار ضرور تسخیر کنت گڑا مڑدم وث آنہی ءِ مرید بی آنا رونت ہمے ڈولا واجہ ءِ ہزاریں مڑدم مرید است انت ہمے مریدیں نیا ما یک بلائیں نام یک مستریں انسان ڈاکٹر شاہ محمد مری است انت من گوشاں کہ آں واجہ ءِ مھسن استیں کہ واجہ ءِ مرغ دما دے ڈاکٹر صاھب اولادے ڈولاآنہی سیراندھی آ نندوک بیث ءَ ’’ واہ یارانی یاری‘‘۔
من اولا گشتاں کہ واجہ ءَ یک تھریک ءِ شروع کھتغا آں تحریک ءِ نام ’’لٹ خانہ‘‘ است ءَ واجہ ءَ اے تحریک تقریبا ما رچ ۱۹۵۰ شروع کھث ءَ اے تحریک ء َ واجہ گو بلوچستان ءِ باز نامداریں شخصیں ہم کوفغ بیث غاں ایشاں ما سائیں کما ل خان شیرانی،سردار بہادر خان بنگلزئی ءُُ ڈاکٹر خدائیداد پیش پیش بوتگ انت او آنہی شہ پد عبدالصمد اچکرئی ،میر گل خان نصیر ،او دگہ بازیں نام ایشاں گوں ہم کوفغ بیث غان ۔اے تھریک ءِ اصل مقصد روشن خیالی ،ترقی پسند سوچ ءَ را دیما آرغ علم و ادب رانوکیں خیالات ءَ گوں ہم گرنچ کنغ او بلوچ راجا را استھصالی قوتیں قیدا شہ آزاد کنغ استا ۔بہر ھال اے تحریک ءَ یک بلائیں فکری جہد کت ءُُ مہلوق ءِ پکر ا ماپختگی ئے آتکہ ۔شما گندئے کہ بلوچ زبان و لبزانک اوں واجہ ءِ جہد و کوشتانی سببا باقاعدہ طور جامع ءِ سطح ءَ مترادف بیث ءَ او بلوچستان یونیورسٹی ءِ بلوچی ڈیپارٹمنٹ ءَ آغاز ہم واجہ ءِ کوشتاں شہ بیث کہ مروچی ہر بلوچ جوان زالبول وثی ماثیں زبان ءَ مافاضل ،ایم فل ،اپی ایچ ڈی ڈگریاں گرغنت ۔اے کل واجہ ءِ مرحونِ منت ایں من گوشاں کہ اے بلوچ راج سرا واجہ ءِ یک بلائیں احسان استیں من گثاں کہ واجہ ءَ وثی پورا زند یک نیکیں سوچ یک جوانیں پکر ءِ اوثا قاعدہ روشن خیال نظریہ ءَ گو گوازینت ءَ او ہمے نظریہ ءِ تحت آنہی ءَ وثی راج وتن ءِ اجتماعی بحلائی واسطہ جہد کث ءَ آنہی یک نیکیں ارادہ وپختہ ایں عزم گوں وھد وحالات ءِ مقابلہ کت ءَ گوشاں کہ ظلم و جبر ءِ دیما حق و سچائی حبر کنغ یک بلائیں جہادے استیں ہمے جرات ءَ ہما مڑد کت کنت کہ آنہی ءَ وثی سچائی ءِ سرا پکائیں یقین بیت وت سچا بیت ظالماشہ سک نفرت کحنغاب ی او مظلوم گوں محبتے کحنغابی ظلم و نا انصافی ءَ وثی معاشرہ شہ ختم و حلاس کحنغے حق مابیت ۔واجہ ہمے کل حبریں سرا پحیلو او برابر استا وثی راج ءِ وتن سرا ظلم و زیادتی سرا کدی بی خاموش نہ بیت ءَ نتائج ءِ پروا کحنغا شہ بغیر آنہی ہر وھدا حق ءِ آواز جار قوتیں دیما بلند گتا ہمے وجہ آنہی کئی دفعہ وتی سرا سکی و سوری آرغان وتن ءَ شہ بدر بیت ءَ گڑدے وثی نظریہ و پکر ا شہ یک قدمے اے پدا نہ بیث ءَ دنیا ءِ سرا رائج ءِ لعنتی ایں نظام سرمایہ داری فیوڈل ازم اڈیرہ سپاہی اے ہروڑا مخالفت کت ءَ واجہ استحصالی قوماں شرسخت نفرت کحنغا من گوشاں کہ واجہ ءِ بیران بیغان گو بلوچی زبان لبزانک ءِ تاریخ ءِ یک عہد ءِ بند بیت ءَ بلوچ راجارا یک بلائیں نقصان ءِ رست ءَ نی بلوچ راجا جوانازار ءِ جہد المی انت کہ آں واجہ ءِ نظریہ و پکر دیما برانت او آنہی سرا کا ربند بینت ۔ہمے ڈولا وثی راج خدمت ءَ کنت واجہ ءَ ۱۹ ستمبر ۲۰۱۶ روچا اے کوڑویں دنیا یل داتا وثی حقیقی ایں خدا دیما حاضر بئیت خدا درا دعائیں کہ آنہی دیما آسان کنت۔
