کوئٹہ پولیس ٹرینگ ءِ بلوچ ورناہانی شہیدی یک انچیں جستے ریاست ءِ چیر اندریں کارگشادانی پیشانی ءَ ایر اِنت کہ ھچ ھساب ءَ چیر اندر ءُُ شودگ نہ بیت ۔اے ارش ءِ یک سرجمیں پلانے بوتگ کہ ایشیءِ آسر بلوچ ورنائیں پولیس کارندہانی شہیدی بوتگ۔انچو کہ درائیں ھالرسانی گل ءُُ درائیں ملک ءِ مردم سرپد اَنت کہ کوئٹہ پولیس ٹرینگ ءِ کارندہ وتی ٹرینگ ءَ پد پہ دو ماہ ءِ موکل ءَ روان دئیگ بوتگ انت انگت ءَ کس وتی گساں سر نہ بوتگ اَت کہ ایشانی سرا کلوہ کنگ بوت کہ واتر بیا اَنت وھدے چہ مزن اکدہ داراں چہ جست گرگ بوت کہ کجام سوب ءَ انچو جلدی آھگ ءِ پرمان دئیگ بوتگ اَت داں آھانی پسو ہمیش اَت کہ ۲۵ تاریخ ءَ شمار ءَ وت گشگ بیت بلکیں درائیں پولیس ھیلکارانی میسج ءِ دروشم ءَ کلوہ ءِ جاہ ءَ بیہار اوں دئیگ بوتگ اَت کہ اگاں کسے نہ ایتک یا پشت کپت داں آئیءِ نوکری ھلاس کنگ بیت ہمے ترس ءَ کہ اے درائیں نوک بھرتی بوتگیں انچیں ورنا ہ اِت انت کہ وتی لوگانی یک کمائی کنوک اوں بوتگ اَنت پمشکا کس ءَ را وتی نوکری ببا دئیگی نہ اَت ،آدراہ بید چہ لوگ ءِ دم کنگ ءَ واتر بوتاں ۔بلئے کسی گمان ءَ اوں نہ اَت کہ اے گوں لوگ ءِ مردماں آھانی گڈی دیدار اِنت ءُُ پدا آھانی جون لوگ ءَ روان دئیگ بیت ۔شپ ءِ نیم ءَ وھدے درست وتی وابانی دنیا ءَ گار اِت انت کہ ناشرکارانی ایشانی سرا ارش کت ءُُ تیرانی انچیں گواری یے بنا کت کہ گمان انچو بوت کہ زندگی نوں اے سینٹر ءَ گواہ نہ کنت بلئے چیزے ایف سی ءُُ پولیس کارندہاں ایشانی مقابلہ کنگ ءَ ایشانی سرا بدلی تیر گوارت داں ہمیشانی تہا دو ناشرکار ءَ وتارا تراکینت بلئے تیرگواری انگت ءَ برجم ات دانکہ فوجی کارندہاں گوں ہیلی کاپٹر ءَ ایشانی سرا ارش کت ءُُ ناشرکار جت ءُُ کشت اَنت بلئے اے سہت ءَ آھاں وتی کار سرجم کتگ اَت یک ھالے ءِ رد ءَ سد ءَ برز مرد جنگ ءُُ شہید کنگ بوتگ بلئے ھالرسانکی گل ءُُ تاک ءُُ ٹی وی ءَ ۶۱ مردم ءِ بیرانی ءُُ ۱۲۲ ءِ مردم ءِ ٹپی ءِ جار جنگ بوتگ اَت ۔سینٹر ءِ رکیتگیں مردمانی گشگ اِنت کہ سد ءَ برز مردم جنگ بوتگ ءُُ ۱۵۰ ءَ برز ٹپی بوتگ اَنت ۔
اے درائیں ارشکاری ءِ پشدری کسہ اے وڑ اِنت کہ ارش ءَ چہ دو روچ پیسر پولیس ٹرینگ سینٹر ءِ مزن اگدھا دار سرپد کنگ بوتگ اَنت کہ چیزے ناشرکار کوئٹہ ءَ پترتگ ءُُ ایشانی نشانگ پولیس ٹرینگ سینٹر اِنت بلئے چرے بیہار ءَ پد اوں پولیس ءِ بہرگ ءِ مزن اگدھاداراں ایشیءِ بند ءُُ بوجی نہ کتگ اَت ۔وت گمان بیت کہ اے یک پری پلانے ءِ تہا اے ارش کاری کنگ ءُُ بلوچ ورنا شہید کنگ بوتگ اَنت ۔مرچی درائیں ھالرسانکی گلانی چم گوں اسلام آباد ءَ عمران خان ءُُ نواز شریف ءِ چست ءُُ ایر ءَ سک اَنت اگاں چہ آ اوں زان اَنت ھردو پارٹیانی رہشونانی اے زارشانی ءُُ شوشا ہما سر کن ءُُ پِر کن ءُُ اف کن ءُُ اچ ءِ ھساب ءَ اَنت ‘‘ دومی دیم ءَ بلوچستان ءَ کوئٹہ ءِ ہردو ویلاں کہ ملک ءِ سیکورٹی ءِ راز پاشک کتگ آئیءِ بابت ءَ ہچ ھالرسانکی گل ءُُ ٹی وی ءَ ہچی دئیگ نہ بوتگ اے چوروہی داں بلوچ ءُُ بلوچستان ءِ مہلوکاں دائم است بوتگ ءُُ است اِنت بلئے ہنچکیں مزنیں ارشکاری یے کہ بوتگ آئیءِ پشت ءَ ہما کہول ءُُ خاندانانی ہم کس ءَ سد ءُُ سما نیست اِنت کہ وھدے آھانی ورنائیں زھگانی جون ءُُ لاش آھانی لوگاں روان دئیگ بوتگ اَنت گڈا آھانی دل ءَ چے چے گوستگ ؟آھانی اے نکس ءُُ تاوان پہ دلبڈی ءُُ دلپدردی ءِ درشانی ءَ اوں تاہیر نہ گر انت ءُُ نیکہ چریشی ءَ آھاں نپے رسیت ۔اگاں وزیر اعظم ءُُ بلوچستان ءِ سر وزیر پہ اے کٹم ءُُ کہولاں چیزے مالی کمک بہ کنت ہم پہ آھاں ہچ سیتے نیارایت اگاں ایشانی دل ءَ چیزے سارت کت کنت داں آ ہما ناشرکاری پرماوکانی سزا دئیگ اِنت کہ ھچبر بوت نہ کنت؟؟؟؟؟؟؟
