بلوچی زبان ءُُ ادب ءَ یک وھدے است اَت کہ شائر ءُُ ادیباں وت ماوت ہپتگی دیوان ءُُ مراگش کتگ ءُُ وتی زبان ءُُ شائری تک ءُُ پہناتانی ہروڑیں جیڑگ ءُُ جنجالانی سرا تران کتگ ءُُ ہما دیوان ءِ تہا ہما جیڑگانی گیشواری کنگ ءِ جہد کتگ باز براں ایشانی وت ما وت ءَ ترندکلامی ءُُ جنگ اوں بوتگ بلئے بازار ءِ کس چہ آ جنگ ءُُ ہبراں سرپد نہ بوتگ ایوک ءَ ہما دیوان ءِ مردم ءُُ دیوان ءِ مردماں اے اوں گشگ بوتگ کہ دیوان گپ ایوک ءَ دیوان ءَ بہ بنت ڈن ءَ درکنوکائی مہ بیت ۔ بلئے بیا کہ مروچیگیں لبزانت ءُُ ادیبانی درائیں گپ درائیں دنیا ءَ را سما اَنت ایشیءِ سوب آھانی وٹس اف ،فیس بک ءُُ ٹوئٹرانی وت ما وتی داوا اَنت ۔
ھمے کسان کسانیں جنگ ءُُ داوا باز براں زاہ ءُُ بد ءَ اوں سر بنت بلئے کس ایشیءَ نچارایت کہ اے درائیں ھبر ءُُ ھال درائیں دنیا ءِ مردم چارگ ءُُ سہی ءُُ سرپد بوھگ اَنت ۔چارکنڈ نہ ایوک ءَ آھانی جند ہماواجہانی جند ءِ سبکی ءُُ کم شرپی بوھگ اِنت بلکیں چریشی ءَ زبان ءُُ لبزانک اوں بدنام بوھگ ءَ اِنت ۔پرچکہ دنیا ءِ ادب دوستیں مردم دنیا ءِ دیمروئی ءُُ ٹکنالوجی ءِ کمک ءَ اے دگہ دنیا ءِ ادب ءُُ ادیبانی ادب ءِ چارگ ءَ ہمے جاہاں کائنت ءُُ آھانی دلگوش ایوک ءَ ہمے زہ ءُُ بداں کپیت چریشی ءَ پہ زبان ءُُ لبزانک ءَ جوان نہ بیت۔
مئے لبزانت ءُُ ادیب چہ جائے کہ وتی زبان ءُُ لبزانک ءَ دیمروئی ءِ منزلاں سر بہ کن انت آگیشتر ایشی ءَ گپچل ءُُ جنجالانی آماچ کنگ ءَ اِنت ،اگاں ہمے واجہ کار فیس بک ءَ چشیں بے سریں ترانانی بدل ءَ اگاں ہمے جیڑگانی گیشواری ءَ کتاب نبشتہ بہ کن اَنت ءُُ راج ءِ دیم ءَ بیار اَنت داں لکھ درجگ شرتر اِنت بلئے کتاب نبشتہی ءَ کس گون نہ اِنت ،من چہ ہما درائیں مردماں پہلی لوٹاں کہ آ چشیں کاراں گلائش اَنت گیشتر ہما مردم کہ درملکاں نشتگ اَنت آ گیشتر ہمے فیس بکُ ءُُ وٹس افی داوہاں گلائش اَنت آ بائد چشیں کاراں چہ گہتر اِنت کتاب نبشتہ بہ کن اَنت ءُُ ہما جیڑگانی سرا کہ گپ تران اِنت گیشتر آھاں اے بابت ءَ ھچ سرپد اوں نہ بیت گوستگیں روچ ءَ یک کتابے ءِ سرا ہمے واجہ کارانی جنگ اَنت وھدے ہمے واجہ کاراں چہ یکے ءَ را جست بوت کہ تو وت ہما کتاب وانتگ کہ انچو آ کتاب ءِ ایرجنی ءَ کنگ ءَ اِنت داں آئیءِ پسو ہمیش اَت کہ ’’ من نوں اے کتاب ءَ وانیں ‘‘ بزاں ساری ءَ آئی ءَ آ کتاب نہ وانتگ ۔بچار مئے ھال ایش اِنت۔۔۔۔۔۔۔؟؟؟
بائد مئے وانندہ گل چشیں کاراں دست کش بہ بنت ءُُ راج ءُُ قوم ءِ ھذمت ءَ اگاں کت نہ کن اَنت داں آئیءِ کم شرپی ءُُ ایرجنی ءَ وَ مہ کن اَنت پرچکہ دومی ءِ ایرجنی ءَ وتی ایرجنی نہ بیت دومی ءَ را ھچی نہ بیت۔
