امریکہ ءَ نوک گچین بوتگیں صدر ٹرمپ ءَ جہان ءَ یک بے باوریں جاورے ودی کتگ۔ ایشی سبب ایش اِنت کہ یک ازگا ر ءُُ سیریں مردمے اناگت ءَ دنیا ءِ درستاں چہ زورتریں ملک ءِ صدر گچین کنگ بوتگ آئی ءِ دگہ سیاسی زندھالے اوں نیست اِنت پمشکاگمان ھمے بیت کہ آئی ءَ وتی زر ءُُ مالانی کمک ءَ وتی دژمن بے سوب کنگ انت ءُُ اے جاہ ءَ سر بوتگ ۔ آئی ءِ گشتانکاں چہ ہمے زانگ بیت کہ یک بے زانتیں مردمے ذات ءُُ زُریاتی ترانے کنگ ءَ اِنت ۔دودمانی چاگرداں گوں آئی ءَ ھچ وڑیں تک ءُُ مانہ یے نیست اِنت آئی ءِ دپ ءَ ہرچی کہ در کیت آ ہما وڑ درشان ئےِ کنت۔ سیاسی بہر گ ءَ یک نوک استائیں مردمے امریکہ ءِ صدر گچین کنگ بوتگ مئے ملک ءِ جاورپیسر ھمے رنگ ءَ اِنت ادا ۱۹۸۵ ءَ اے دیم زردار ءُُ مالداریں مردم سیاسی سروک گچین کنگ بوتگ اَنت ۔مئے زانت ءُُ زانگ ہمے گشیت کہ چشیں مردمانی سیاسی سروک گچین بوھگ ءَ رند ایوک ءَ وتی کمائی ءِ موہ گیش بنت ءُُ آ وتی اگدہانی کمک ءَ ردیں کار کن اَنت ءُ وتی زر داری ءَ گیش کن اَنت ۔پدا آھانی بان ءُُ ماڑی آھانی بدکردی ءِ شاہدی ءَ بس بنت ۔بوت کنت نوکیں امریکی صدر ایوک ءَ وتی مال ءُُ مڈیاں گیش بکنت ءُُ ملکی جاورانی گر ءُُ دار ءَ ہما استیں بہرگانی سرا بدنت کہ دائم ری پبلیکن پارٹی ءِ سروکاں کتگ ۔ریاستی بہرگاں مدام انچیں بے بود ءُُ Yes man ءِ ھاجت بیت پرچکہ چشیں مردم آھانی کار انی دیم ءَ جنجالے بوت نہ کن اَنت ءُ بوت کنت ہیلری ءِ حکومت پرآھاں چشیں کارے مہ کتیں پرچکہ ہیلری اے وھد ءَ امریکہ حکومت ءِ یک پہتہ کاریں سیاسی سروکے ءِ جہت ءَ زانگ بیت۔امریکی اسٹیبلشمنٹ ہیلری ءِ سوبمندی ءَ تر س ءِ آماچ بوتگ پمشکا آھاں یک انچیں مردمے دیم ءَ آورتگ کہ آئی ءِ لوٹ ءُُ متا ایوک ءَ زر اِنت آئی ءَ را ملکی مردماں ھچ سروکار نیست اے درائیں کار پداں ایوک ءَ روس ایوک ءَ اڈ پیداک کنوکے بوتگ بلئے نوں ٹرمپ ءِ دروشم ءَ ھدائی دادے ایشاں دست کپتگ دومی نیمگ ءَاے اوں گشگ بوھگ ءَ اِنت کہ امریکی اسپیت پوستاں رنگ ءُُ نسل ءِ سیاست دو بر گرم کتگ ءُُ آ امریکہ ءَ یک نسل پرستیں ریاستے جوڑ کنگ ءَ دلمانگ اَنت نوں پہ امریکہ ءِ neocons ءَ وشیں ھبرے اے بیت کہ نوں امریکہ کانگرنس ءِ تہا ہماآنی حکومتی بیت ۔ ءُُ آھانی دلمانگیں کاراں کس داشت نہ کنت۔چو ھم گشگ بوھگان اِنت کہ بی جی پی ءُُ ری پبلکین پارٹی ءِ حکمرانی بیت ءُ اے پہ مئے ملک ءِ ھاتر ءَ جوانیں ھبرے نہ اِنت ٹرمپ ءَ پیسر ءَ ہندوستان ءِ ھک ءَ گپ جتگ ءُُ نوں آئی ءَ اے اوں گشتگ کہ ہمے زوتاں ہندوستان ءَ اے چاگرد ءِ یک سریں ملکے ءِ دروشم ءَ دیم ءَ کار اَنت۔ہندوستانی حکومت چرے کار ءَ آئی ءِ منت وار اِنت ءُُ ہندوستانی حکومت پاکستان ءِ ھلاپ ءَ نوں گیشتر کاروائی کت کنت پمشکا استیں حکومت پیسر ءَ وتی گرءُُ دار ءَ بہ کنت ءُُ وتی واپاری ءَ کم ءُُ سیاسی جاوراں گہتر کنگ ءِ جہد بہ کنت ۔پرچکہ پاکستان ءِ سیکورٹی ءِ گپ انت اے حکومتءِ سروکانی ذمہ داری اِنت کہ آ روبرکتی ءُُ رودراتکی ھد ءُ ابیلانی پاسداری ءَ بہ کن اَنت دانکہ ملک دژمن پاکستان ءَ دگہ نکس ءُُ تاوانے دات مہ کن اَنت ۔
کشمیر ءِ درائیں دمگاں ہندوستان ءِ ھلاپ ءَ توار برز کنگ بوتگ بلئے پاکستان چرے جاور ءَ اوں سیت زورگ ءَ ساڑی نہ اِنت ءُُ آ اے جیڑگ ءِ زندگ کنگءَ دوبر سلامتی کونسل ءِ نیمگ ءَ کاگدءِ رائی کنگ ءَ دلمانگ اوں نہ اِنت پرچکہ میان استمانی سیکورٹی کونسل ءَ اے منگ نامگ شملہ منگ نامہ ءَ گیش ارزشتدار انت پمشکا آ مسلمان ملکانی کمک ءَ عالمی گل ءَ گیش زور بدنت۔
