کتاب ءِ سرا چمشانک

|

وقتِ اشاعت :   November 20 – 2016

بلوچی زبان ءُُ لبزانک ءِ نامداریں ندکارانی سرپ ءَ ھواریں ندکاریں واجہ عبدالرزاق داد کہ بلوچی لبزانکی دنیا ءَ آئی ءَ اے آرداد ءِ نام ءَ زانت پہ بلوچی لبزانک ءَ دگہ نوکیں وانگی یے چاپ ءُُ شنگ کتگ واجہ ءِ اے کتاب چہ پیشی کتاباں یکسر جتا اِنت کہ پرچکہ ایشیءِ تہا اولی براں درکسہی لبزانک بزاں نن فکشن ءِ تک ءُُ پہناتانی گیشواری گوں پولکاری ھساب ءَ کنگ بوتگ اَنت ۔اے کتاب سرجم ءَ یک سد ءُُ پنجاہ ہشت تاکدیمانی تہا اِنت ءُُ ایشیءِ تہا نمدی نبیسی،ریزمانک،گوشتن ،رپوتاز،خاکہ نویسی، سپر نامہ،چمشانک،نبشتانک،شہگپ،وت نوشتیں زند ھال،کُنج نبیسی،ڈولیں بنگپ ھوار اَنت ۔اے درائیں بنگپانی سرا واجہ اے آرداد ءَ پولکاری ربیت ءَ چہ کار گپتگ ءُُ کتاب سرجم کتگ کہ پہ لبزانکی دنیا ءَ الم ءَ یک گراں بہائیں گیشی یے زانگ بیت۔اے کتاب ءِ دو مستریں شری ءُُ جوانی است انت یکے ایشی کہ اولی براں پولکاری ھساب ءَ کسے ءَ بلوچی تہا درکہسی لبزانک ءِ سرا نبشتہ کتگ دومی ایش کہ بلوچی لبزانک ءِ تہا اے درائیں تہرانی سرا پیشہ اوں نبشتہ کنگ بوتگ بلئے ندکار ءَ بازیں تہرانی نبشتہ کارانی نبشتہ کتگیں مواد رد کتگ اَنت ءُُ وتی دلیل اوں داتگ اَنت بزاں آئیءَ درکسہی لبزانک ءِ بن دپتر کہ بازیں مردمے چرآئیءَ سرپد ءُُ زانتکار نہ اِنت چرے کتاب ءَ پوہ ءُُ سرپد بوت کنت ۔ہمے کتاب ءِ تہا ندکار ءَ بازیں نوکیں گالبندانی اوں کارمرزی کتگ کہ پہ لبزانک ءَ یک گیشی یے زانگ بیت۔’’درکسہی لبزانک‘‘ پہ بلوچی وانوکانی ھاتر ءَ جوانیں ٹیکی یے ءُُ ہمک سر kitab-review سمائیں مردم چرے کتاب ءَ نپ ءُُ سیت زرت کنت ۔چنائی ءَ واجہ اے آرداد شرگداری ءِ استاد ءُُ زانتکار اِنت ءُُ چد ءُُ ساری واجہ ءِ بازیں شرگداری کتاب چاپ ءُُ شنگ بوتگ اَنت ءُُ اے کتاب ءَ ہم یک شرگداری کتاب زانگ بوت کنت پرچکہ ایشیءِ تہا اوں بازیں جاہ ءَ ندکارانی نبشتگیں کتاب ءُُ نبشتانکانی سرا تران کنگ ءُُ درور دئیگ بوتگ چوکہ بنگپ ’’ خاکہ نبیسی‘‘ ءِ تہا واجہ اے آرداد فضل خالق ءِ کتاب ’’ رستگیں نود ‘‘ ءِ درور دیان ءَ بیان کنت کہ اے کتاب ءِ تہا خاکہ نبیسی نہ بوتگ بلکیں وتی ذاتی گپ ءُُ ھیال بیان کنگ بوتگ اَنت ءُُ جائے جائے مردمانی ایر جنی ءُُ تژن ءُُ پیگورءِ ہم سمائی بیت کہ خاکہ ءَ چشیں چیزانی ھچ جاہ نیست اِنت ‘‘ بزاں واجہ ءَ یک نیمگے درکسہی لبزانک ءِ بن دپتر ءِ شوہازی اوں کتگ ءُُ دومی دیم ءَ شرگداری ھساب ءَ بازیں مردمانی نبشتگیں موادانی چار ءُُ تپاس اوں کتگ۔پمشکا اے کتاب ءَ را یک شرگداری کتاب ءِ نام دئیگ بہ بیت داں رد نہ بیت ۔ ءُُ اے کتاب ءِ وانگ ءَ چہ ہمک نودر ءِ زانت ءُُ زانگ ءِ تہا گیشی کیت ءُُ لبزانک ءِ دامن گیشتر پراہ ءُُ شاھیگان بیت۔