’’ لبزانکی نیادے گوں منیر مومن ءَ ‘‘ ءِ بنگپ ءَ جامعہ بلوچستان ءِ شعبہ بلوچی ءِ نیمگ ءَ یک پرمڑائیں دیوانے جم دارگ بوتگ اَت ۔اے دیوان ءَ بلوچی زبان ءِ شاعر ءُُ لبزانت منیر مومن ءَ ابید ڈاکٹر علی دوست ،ڈاکٹر حمل نصیر ،محسن بالاچ ،بلوچی اکیڈمی ءِ جنرل سیکریٹری شکور زاہد ، ءُُ بلوچی ڈیپارٹمنت ءِ استاد ءُُ نودربراں بہر زرتگ اَت ۔ دیوان ءِ بندات ءُُ جارچینی ءِ ڈبہ زبان ءِ نامداریں کواس ءُُ ندکار اے آرداد ءَ دئیگ بوتگ اَت ۔واجہ داد ءَ دیوان ءِ بندات ءَ رند ءَ واجہ منیر مومن ءِ زند ءُُ ازم ءِ چندے پہنات چہ مجلس ءَ ساڑئیں مردماں سرپدی دات ءُُ دیوان ءِ تران ءُُ گشتانک ءِ ھاترءَ بلوچستان یونیورسٹی تربت ءِ سوجکار واجہ صادق صبا ءَ منیر مومن ءِ لبزانکی کرد ءُُ آئی ءِ نوک چاپ بوتگیں آزمانکی کتاب ’’ لیلان‘‘ ءِ سرا وتی مارشتانی درانگازی تاثراتی رنگ ءَ درشان کت اَنت ۔آئی ءِ واجہ منیر ءِ آزمانکانی دروراں گوں آئیءِ ازم ءِ گیشواری کت ۔دیوان ءِ دومی گشتانک دیوک واجہ رحیم بخش مہر ءَ منیر مومن ءِ شائری ءِ سرا تران کت ءُُ گشت کہ منیر مومن ءِ شاعری اسلوب ءُُ درشانداب ءِ جتائی ءُُ آئیءِ ابہام پہ شائری ءَ نوکیں چیزے کہ چد ءُُ پیسر شائری ءِ تہا گندگ نہ بوتگ ۔دیوان ءَ ساڑئیں مہمان واجہ ڈاکٹر علی دوست ءَ منیر مومن ءِ زند ءُُ ازم ءِ سرا گونڈگری ءَ تران کت ءُُ دیوان ءَ را منیر ءِ شائری ءِ بابت ءَ سرپدی دئیگ ءِ جہد کت ۔ آئیءِ وتی گشتانک ءِ تہا گوں بلوچی بہرگ ءِ دیوان ءُُ مراگاہاں وتی ہمکوپگی ءِ درشان کت ءُُ گشت کہ لبزانک ہمک چاگرد ءِ بنکی لوٹ اِنت مارا بائد وتی لبزانک ءِ مردمانی پہاز ءُُ دلبڈی ءَ انچیں دیوان جم بدیاں ۔ دیوان ءِ تہا شعبہ بلوچی ءِ نودربر نسیب بلوچ،سعید عاقل ءُُ علی نواز بگٹی ءَ وتی وشیں تواران گوں منیر مومن ءِ گال الہان کتاں ءُُ دیوان براہدار کت۔
دیوان ءِ گڈی تران بلوچی بہر گ ءِ کارمستر حامد علی بلوچ ءَ داتگ اَت آئی ءَ وتی تران ءَ نہ ایوک بلوچی لبزات ءُُ شائر منیر مومن ءِ ازم ءِ سرا گپ جت بلکیں شعبہ بلوچی ءِ مجلس ءُُ مراگشانی راجدپتر ءِ سرا اوں تران کت آئی ءَ بلوچی بہر گ ءِ دیمروئی کارانی اوں بیان کت ۔دیوان گوں دیوان ءِ پاگواجہ منیر مون ءِ شئیر ءُُ لچہانی سریچیں دروتاں آسر بوت ۔منیر مومن ءَ وتی شئیر ءُُ شائری ءِ بابت ءَ تران نہ کت بلئے گوں شئیراں وتی ازم ءُُ ہنرکاری ءِ پہتہ ئی سہرا کت ۔
دیوان ءِ گڈسر ءَ دیوان ءِ مہمان شعبہ بلوچی ءِ چاپ بوتگیں کتابانی مڈی سوگات کنگ بوتاں ءُُ شعبہ بلوچی ءِ دومی سال ءِ نودربر اعظم بگٹی ءَ بلوچی بہرگ ءِ گوستگیں کارمستر واجہ رحیم بخش مہر ءَ را ’’ بلوچی پاگ‘‘ پہ سوگات آئی ءِ سرا دات ءُُ شرپدار کت ۔
