اے وھد ءَ چاگردی رسانک در ءَ ہمک روچ چشیں عکس ءُُ حال شنگ بوھگان اَنت کہ پلاں دمگ ءِ مردمے ( کینسر) بزاں شومک ءِ آماچ انت ءُُ ورنا پرائی جان سلامتی ءُُ دراہی ءَ چندہ کنگان اِنت پدا لہتیں روچاں پد ہمے نادراہ ءِ مرگ ءِ حال کیت ۔آئی ءِ سنگت ءُُ دوزواہ ءُُ عزیز دگہ لہتیں روچاں شومک ءِ ایرجنی ءَ گپ ءُُ تران بنا کن اَنت بینر ءُُ بیرک جن اَنت کہ لہتیں روچاں پد گار ءُُ بیگواہ بنت ۔بلئے اے درچ ءَ ہرچ کارے کہ کنگی اِنت آ بوھگان نہ اِنت اے درچ ءَ گپ پولگ لوٹ ایت کہ اناگت ءَ چہ بلوچستان ءَ کینسر ءِ آماچ انت ایشیءِ سوب چے اِنت؟ اے درگت ءَ بلوچستان ءِ بلوچ ڈاکٹر پہ نقلی دوائیانی بیپار ءِ مُز ہمک سال تھائی لینڈ ءُُ فرانس ءِ تروتاب ءِ بدل ءَ اگاں ہمے دمگاں تروتاب بکن اَنت گڈاآہانی اے تروتابءَ چہ بلوچ راج ءَ ہم نپ ءُُ سیتے رست کنت ۔ دومی مستریں ذمہ داری ہما راج دوستانی ئیگ انت کہ ہرچ دیوان ءَ گپ ءَ سیر نہ بنت کہ ’’ ماکوہ ءَ شت نہ کنیں بلئے مئے مول ءُُ مراد بلوچ راج ءِ دودمان ءُُ آئی ءِ ہستی ءُُ پجار ءِ دارگ اِنت ‘‘ اشاں وت ءَ را ہیپاٹائٹس گور جنت گڈا گش اَنت کہ بلوچ ءِ مستریں دشمن ہیپاٹائٹس اِنت بلئے کینسر کہ بلوچ ءَ چو وروک ورگان اِنت آئی ءِ بابت ءَ کر ءُُ گنگ اَنت پرچکہ اے زان انت ءُُ سرپد انت کہ کینسر ءِ نام گرگ ءَ اشانی مستریں واجہ ءُُ حاکم نارزا بنت ۔اگاں بلوچ راج دوست ءِ ایوک ءَ ۲۸ مئی ءِ ایٹمی تراکانی بنامی ءِ ترس ءَ ہچ نہ گشت ءُُ ہنچو بے ترک ءُُ توار بوت انت گڈا آ روچ دور نہ انت کہ بلوچ راج تیوگ ءَ کینسر ءِ ارجان بیت ۔پرچکہ چہ ایٹمی تراک ءَ پد بلوچستان ءَ کینسر ءِ اے شل برجاہ اِنت چد و پیش بلوچستان ءَ کینسر ءِ ہنچو ویل ہچبر دیم ءَ نہ ایتکگ ۔اے گپ وتی جاگہ ءَ تچک ءُُ راست انت کہ راج دوستیں اسمبلی باسک وتی لاپ ءِ الاہوش ءُُ پلاٹانی پچ گرگ ءِ ترس ءَ کینسر ءِ وبا ءِ بابت ءَ ہچ نہ گش اَنت ۔پرچکہ آہاں ترس انت کہ آ اوں کرپشن ءِ کیس ءَ دزگیر کنگ بوت کن انت ءُُ بوت کنت کہ آؤکیں گچین کاریاں پہ ۷۰۰ ووٹ ءَ کس آہاں وزیر ءُُ گزیر مکنت بلئے بژنی گپ ایش انت کہ اے وھد ءَ بلوچستان ءِ ملائی ،بلوچستان ملا ،بلوچستان کمیونسٹ ،بلوچستان ءِ لبرل ،بلوچستانءِ سکیولر ،بلوچستان ءِ ترقی پسند ،بلوچستان ءِ ادب دوست ،بلوچستان ءِ علم دوست ،بلوچستان ءِ قلم دوست ،بلوچستان ءِ احوالکار ءُُ شہ زانت پرچہ اے جیڑاہ ءِ سرا بے ترک ءُُ توار اَنت ۔آ اوں چو بلوچ راج دوستیں پارلیمنٹ ءِ باسکاں وتی سیٹ ءُُ پلاٹانی ترس ءَ گار اَنت یا ہنچو بیزار اَنت کہ وش اَنت کہ بلوچ گار ءُُ بیگواہ بہ بیت ۔پدا کینسر ءِ اے کار وَ زوت تر اِنت کہ ’’تولگ ءَ لنگاسی ءَ کار اِنت ،ہارے بارت شر تر اِنت‘‘۔
