گوستیں روچاں پاکستان ءِ مستریں اسمبلی ،راجی اسمبلی ءَ یک بلے پاس کت کہ آئی ءِ تہا ایم ۔پی۔اے، ایم ۔این ۔اے ءُُ سینٹرانی ہستیں پگار ۲۷۰ درسد گیش کنگ بیت ۔اے وھد ءَ وزیر ،ایم ۔پی ۔اے ، ایم این اے ءُُ سینٹرانی پگار چہ ۱۹ اسکیل ءِ کاردار ( ملازم)ے ئیگ ءَ چہ گیشترانت اے بل ءِ پاس کنگ ءَ رند روتاکاں وتی شونگال ءُُ احوالکاراں وتی اوتاگاں پگارانی گیشی ایر جتگ اے وھداں ارب پتی ایم این اے ،ایم پی اے ءُُ سینٹر ماھے ۷۰ ہزار ءَ داں ۱۲۰ ہزار پگار گرگان اَنت ۔ اے پگا ر ءَ آھانی ٹی ،اے، ڈی ءُُ میڈیکل الاوئنس ھوار نہ اَنت ۔ دومی دنیا ءَ ہچ جاہ ءَ سینٹر ءُُ ایم این اے ،ایم پی اے ءُُ وزیر چہ ملک ءِ مزور ءِ پگار گیشتر پگار نہ گر اَنت ۔اے درگت ءَ ابوبکر صدیق ءِ اے کسہ باز نامدار اِنت کہ آئی ءَ گشتگ کہ ’’ منی پگار چہ مدینہ ءِ مزور ءِ پگار ہچ وڑا گیشتر مہ بیت اگاں من ءَ پگار بس نہ بوت گڈا من جہد کناں کہ مدینہ ءِ مزور انی پگا ر ءَ ودیناں ‘‘۔بلئے پاکستان ءَ وزیرءِ پگار یک لکھ ءُُ بیست ہزار اِنت نوکیں گیشی ءَ پد آئی ءِ پگار کم چہ کم پنچ لکھ ءَ کیت ءُُ سر بیت ۔ہما وزیر کہ ۱۰ کروڑ ءِ ٹھیکہ ہما ٹھیکدار ءَ دنت کہ آئی ءِ ھاتر ءَ ۳کروڑ ءِ لوگے بہ بند ایت ءُُ بدنت۔ وھدیکہ ہرچ دہ کروڑ ءُُ سے کروڑ وزیرئیگ اَنت گڈا ایشیءَ دگہ پگارے چے پکار ؟
پرچکہ اے وھد ءَ پاکستان ءِسینٹ راجی ، ءُُ دمگی ( صوبائی) اسمبلیاں یک چشیں باسکے نہ گواہ ایت کہ آ ارب پتی مہ بیت ( چو بلئے گش انت کہ’’ ماغریب ایں مئے براتاں پہ سواری ءَ موٹر سائیکلے ہم نیست،‘‘ ) دومی اے اسمبلی باسک اے حاترا اسمبلیاں دیم دئیگ بوتگ انت کہ مزور ءُُ نیزگاریں مردمانی مالی ءُُ اقتصادی دیمروئی ءُُ وشحالی ءِ ھاترا گامگیج بزور انت بلئے اے گیش ء لاپ ءِ پرکنگ ءَ نہ انت اگاں اے درگت ءَ وزیر ءُُ ایم پی اے گش انت کہ ماھے آہاں ۷۰ ہزار ، یک لکھ ءُُ ۲۰ ہزار نہ پج ایت گڈا گیر بیار انت کہ ملک ءَ مزور چوں ایوک ءَ چاردہ ہزار ءَ وتی روچاں تیلینت کن اَنت؟ وھدیکہ گیشتریں مزوراں ماھے چاردہ ہزار دست نہ کپ ایت ۔وزیر ءُُ گزیراں دگہ علاج ءُُ اسکولی فیسے پر نیست پرچکہ پاکستان ءِ اسٹینڈرڈ ربیدگ ءِ رد ءَ اے ملک ءَ ازگاریں مردم ءُُ وزیراں گولی ءُُ دوائی ءَ بگر داں آلو ءُُ پیماز ءَ دراہ پہ ’’ مزنی ءِ شان ءَ مپت اللہ ءِ نام ءَ رسیت ۔
پدا بے دردی ءَ بچار کہ اے وزیرانی پگار کہ ۲۷۰ درسد گیش کنگ بوتگ اے ہما اِنت کہ ہچبر اسمبلی دیوان ءُُ مراگشاں نہ نند اَنت ایوکا ٹی، اے، ڈی ءِ گرگ ءِ حاترا اسمبلی ءِ مجلس ءَ وتی حاضری جن اَنت ءُُ پدا پشت ءَ مان دئینت ءُُ رونت۔
چیزے ءَ کہ ہچ کار مہ بیت گڈا پہ ٹاٹم پاس کنگ ءَ اگاں مجلس ءَ بننداَنت گڈا ہما اَنت کہ ’’ لیلام گھر ‘‘ ءَ جست کنگ بنت کہ ’’ آ کجام وزیر انت کہ اسمبلی ءَ ہچبر ہچے نہ گشتگ ‘‘؟ نوں گپ ایش انت کہ بے ترک ءُُ تواریں اسمبلی ءِ باسکانی پگار ءِ گیشی ءِ مانا چے اِنت ۔آخر ایشاں پہ مہلوک ءَ کتگ چے ۔۔؟ کہ اشانی پگاراں ۲۷۰ درسد گیش کنگ بہ بیت ؟ وھدیکہ سرکار ءِ ہما کارندہ کہ شپ ءُُ روچ پہ سرکار ءُُ حکومت ءَ کار ءَ اَنت آھانی پگار ءَ ایوک ءَ ۷ درسد پر کنگ بوت ۔مزنیں جاک ءُُ سلواتے ءَ پد ایوک ءَ ۳ درسد دگہ گیش کنگ بوت نوں اے گہتر نہ اِنت کہ ارب پتی ایں اسمبلی باسکانی پگار ءَ گیش کنگ ءِ بدل ءَ بزگ ءُُ بے سہاریں مزور ءُُ سرکاری کاردارانی پگار گیش کنگ بہ بیت کہ پہ ملک ءُُ راج ءَ وتی شپ ءُُ روچاں یک کنگان اَنت پدا اے مردم کہ ہرچ روزے ءُُ مُزے کہ گر اَنت نہ آف شور کمپنی جوڑ کن اَنت ،نہ سرے محل ،نہ مئے فئیر فلیٹ ،ناں زراں سوئزلینڈ ءِ بینکاں چیر دئینت ننکہ مال ءُُ ملکتاں وتی برات ءُُ ایندگہ عزیرانی نام ءَ کن اَنت ۔۔۔۔۔؟
