یک کسانیں جنکوئے لوگ ءِ سربرءَ اوشتاتگ اَت ءُُ کانگڑو ءِ بال دئیگ ءَ ات آ انچوش گل ءَ بال ات کہ سرجمیں دگنیا ءِ گماں چہ بیھال ات ءُُ کانگڑو ءِ بال دئیگ ءَ مشکول اَت ۔من یک کنڈے ءَ اوشتاتگ اتوں ءُُ ہمے ندارگ ءَ چارگ ءَ ات اوں ۔شہر ءِ زمستان ءِ سردیں شپ ءُُ برپ ءَ چہ جان شودیں کوہ ءُُ آزمان ءَ را جمبراں سرجمی وتی دست ءَ کتگ ات انت ۔برے برے سارتیں گوات پہ وتی ادا ءُُ نازاں گوں لیب کناں ات ءُُ ھور ءَ ترونگل ءَ چہ شہر ءِ سرجمیں دمگ چہ آپ ءَ سرریچ ات انت ۔سریاب دگ ( روڑ) ءِ سر ءَ روکیں گاڑی ءُُ موٹلانی روگ ءُُ آھگ نہ بوھگ ءِ حساب ءَ ات ءِ دور چہ یک اشترگاڑی یے وتی بلک سبکیں رواجاں روان انت ءُُ یک پیر مردے سگریٹ ءِ کشگ ءَ گوں انچو مزہ چست کنان ات گشئے دگنیا ءِ ھمک اڑ ءُُ جنجالان چہ بے ہال اَت ۔
آ کسانیں جنکو انگت وتی ھما جاگہ ءَ کانگڑو ءِ بال دئیگ ءَ دست گٹ ات من چاہ وارتگ ات ءُُ سگریٹ ءِ ٹالے بن داتگ اَت ءُُ گوں سگریٹ ءِ دھوتاں لیب کنان اتوں سگریٹ ءِ دھوتانی ندارگاں گوں نوکیں دنیائے ءِ سازگ ءَ دست گٹ اتوں ۔ناگت ءَ ھما کسانیں جنکوئے ءِ گریوگ ءِ آواز منی گوشاں کپت ۔جنکو کوکار کنان اَت گشان ات منی کانگڑو سستگ نوں من چی بکناں من نوں کیا کانگڑو ءِ جوڑ کنگ ءِ واست ءَ بگشاں کہ منی واست ءَ کانگڑو جوڑ کنت کہ بروت انت منی سستگیں کانگڑو ءَ کاریت منی برات ءَ پہ ھب ءُُ واھگ کانگڑو جوڑ کتگ۔
جنکوئے ءِ ہمے دردناکیں آواز ءَ منی دل چہ تہ ءَ تل تل کت من چہ نگیگیں جاروان گوں کوٹھی ءَ شت اوں ۔ہمے باروا جیڑاں جیڑاں واب کپتاں کہ واب دیست ہما جنکو کبرانی سر ءَ پل ءُُ نازبو ،اگربتی ایر کنان انت ءُُ گشان انت ۔
’’ کہ بچار ات من اتکگاں ۔۔۔۔۔۔۔‘‘
ھمنچک ءَ من چہ واب ءَ پچلرز اِتاں ءُُ پاد اتکاں کہ گنداں کہ ہور گوں تیزی ءَ رچگ ءَ اِنت ھور وتی ترندیں گاماں انگت تیز کنان ات کہ ڈن ءَ یک مزنیں ترسناکیں کوکارے پیداک اَت۔
من چہ اشتاپ اشتاپی ءَ کوٹھی ءَ ڈن ءَ دراتکاں داں گنداں کہ دگے ءِ سر ءَ مردمانی یک مزنیں مچی یے ءُُ ھما جنکو ءِ برات گوں دپ ءِ پُرءَ گریوگ ءَ اِنت کہ کوکار کنان انت ءُُ دپ ءِ پر ءَ گشگ ءَ اِنت ‘‘۔
’’ پادا من تئی واست ءَ دگہ کانگڑوے اڈ کناں ۔۔۔۔۔ بلئے سرجمیں گپ ءُُ کوکار بے سیت ءُُ نپ ۔۔۔۔۔ نوں ہما جنک وت یک کانگڑوے بوتگ ات گوات ءِ ہمرائی ءَ لیب کناں اَت ۔شہر ءِ ڈولداریں بر پ باری ءِ موسم ءَ بس گوشاں ہمے گپ پیداک اَت ’’ منی کانگڑو سست ۔۔۔۔کئے منی کانگڑو ءَ روت زورایت ءُُ کیت اِنت ۔۔۔۔
