دنیا منی نگاہاں ویرانیں جنگلے
نشتہ کہیر ءِ شاھے ءَ نالیت شانتلے
داں زند ءِ گڈی پاساں مہ دروئیت آ من ءَ
ہمراہے انچیں لوٹاں وفاداریں ھمبلے
منی پگر بستہ ریزاں منی جہد گوں تناباں
پیڑاتہ دست ءُُ پاداں زلمانی سانکلے
دو وھد ءِ نان چوں من ءَ ارزانی ءَ ریست
وھدے منی نسیب ءَ نبشتہ کہ زمبلے
ھیراناں وھدے گنداں وتی راج ءِ شاعراں
یک دستے ءَ گلاس ءُُ یک دست ءَ بوتلے
تو ہرکس ءَ بچار تئی ھوناں تُنگ اِنت
نوں ہرکجام راہ ءَ نشتہ یک قاتلے
چاکر مدام کاینت گوں رپکاں شے مریدؔ
چو بے مراد بیت انت ہر دور ءَ ھانلے
