حیات شوکت گوستگیں روچ ۸ دسمبر ۲۰۱۶ ءَ دراجیں نادراہی ءَ پد ماں کیچ ءَ بیران بوت ۔حیات شوکت ایوک ءَ شائرءُُ لبزانک کارے نہ اَت بلکیں آئی ءِ مزنیں کار لبزانک ءِ پڑ ءَ نوک باھندءُُ کتہ کاریں مردمانی دلبڈی اَت ۔پدّرا انت کہ زند ءَ کجام ہم چیزے ءَ پہ ردوم ءَ چاگرد ءُُ موسمے درکار بیت اگاں ہمے چاگرد ءُُ موسم وش مہ بنت گڈا جوانیں درچک ءُُ دھل بے توم ءُُ بے برّ بنت ۔کیچ ءَ حیات شوکت ءِ درگاہ یک انچیں دوارے اَت کہ اودا گوادر ءَ بگرداں خاران ءَ ،کراچی ءَ بگرداں اسلام آباد ءَ درائیں میتگ ءُُ ہلکانی شائر ءُُ کلمکار مچ ءُُ مجلس اِت انت ۔حیات شوکت ءِ جاہ ہما درگاہ اَت کہ اودا پہ مجلس ءُُ دیوان ءَ وھد پاس ءُُ جار ءُُ اجازت ءِ زلورت نہ اَت بلکیں پجاروکی ءِ ہم آجت نہ اَت۔اگاں تو گشت کہ گوں لبزانک ءَ سیادی اِنت گڈا تو حیات شوکت ءِ سیا د ات ئے ءُُ پجاروک ہم ۔اے وڑا آئی ءِ درگاہ ءَ ایوکءَ پجاروکی گوں حیات شوکت ءَ نہ بوت بلکیں درائیں دمگ ءُُ میتگانی شائر ءَ کلمکاراں گوں نند ءُُ نیادے پترے اَت ۔حیات شوکت لبزانکی کاروان، لبزانکی سرچمگ ءُُ پدا بلوچستان اکیڈمی ءِ بنکی باسک ءُُ کماشاں ھوار اَت۔ پدا آئی ءَ ماں کیچ ءَ گوں وتی ہم پتّیں سنگتاں عطا شاد اکیڈمی جوڑ کت ءُُ وت اکیڈمی ءِ کماش بوت لہتیں وھد اَت کہ واجہ حیات شوکت نادراہ اَت چوایندگہ بلوچ کلمکاراں واجہ حیات شوکت ہم نادراہی روچاں حکومت ءُُ بلوچ راج دوستیں رہشوناں ڈالچار کتگ اَت اگاں کہ یا اشانی مالی کمکے پرائی ءَ سکین ءُُ دلبڈی یے بوتگ اَت بلئے نوں بلکیں راج دوستیں ءُُ حکومت است گپ ءَ پہک اِنت کہ نادراہ ءُُ پیریں مردمانی سرا ہرچ ءُُ درچ ذر ذوالی یے ۔ یا لبزانک کلمکارانی راج ءُُ چاگرد ءُُ ہچ وڑیں بستار ءُُ بساتے نیست البت حیات شوکت ءِ بیرانی پہ بلوچی لبزانک ءُُ زبان ءَ مزنیں تاوانے اگاں حکومت ءَ ہواریں راج دوستاں واجہ حیات شوکت ءِ دراہی ءِ حاتر ءَ چہ حکومت ءِ نیمگ ءَ گامگیجے بُزرت اِنت گڈا بلکیں واجہ حیات شوکت دراہ بوت اِنت۔
