لہتین روچ ساری بزاں ۱۶ دسمبر ءَ ڈھاکہ ویل ءِ سالروچ اَت ۔ہمے روچ ۱۶ دسمبر ۱۹۷۱ ءَ پاکستانی فوج ءَ بھارت ءِ ارد ءِ دستاں وتی سلحہ دور دات اَنت ءُُ یک آجوئیں ملکے بنگلہ دیش ءِ نام ءَ جوڑ بوت پہ پاکستان ءِ مہلوک ءَ یک سکیں نہ وشیں روچے اَت پرچکہ آہانی ملک دو بہر ءَ بہر کنگ بوت ۔پاکستان ءَ ہم لہتیں وھد ءَ بنگلہ دیش ءَ را یک آجوئیں ملکے ءِ بستار ءَ من اِت ءُُ قبول کت ۔گوں بھارت ءَ سہل وتران ءَ پد شملہ منگ نامہ ءِ سرا دست رندی بوت کہ آئی ءِ ردا ۹۳ ہزار جنگی بندیگ آجو کنگ بوت اَنت کہ آہاں ۶۰ ہزار لس مردم ،پولیس ءُُ بند ءُُ بوجی کارندہ ھوار اِت انت ۔اشانی تہا کساس ۳۰ ہزار فوجی اِت انت ۔درائیں دنیا ءَ شملہ منگ نامہ ءَ را ساڑ اَت ءُُ بھارت ءُُ پاکستان ءِ سیادی جوان بوت انت ۔نوں اے گپ راست انت آھدءَ ملک ءِ ارد سدک اَت کہ چہ روبرکتی پاکستان ءُُ رودرآتکی پاکستان ءِ حاکمی نہ بوتگیں گپے۔ اے گپ ہما وھد ءَ پّدرا بوت کہ بنگالی ایوب خان ءِ حلاپ بوت اَنت۔ اے نہ منّی ءِ درچ ہما وھد ءَ بنا بوتگ اَت کہ بنگالیاں گشتگ کہ پاکستان ءَ ۱۹۶۵ ءِ جنگ بنگلہ دیش ءِ مہلوک ءِ رکینگ ءَ ہچ نہ کتگ ۔اگاں بھارت ءَ بلوٹ اِت انت گڈا آئی ءَ ۱۹۶۵ ءَ بنگلہ دیش ءِ سرا ارزانی ءَ ارش کرت کرتگ اَت ۔حالانکہ تحریک پاکستان ءَ مستریں کرد بنگالیانی بوتگ ءُُ آہانی رد ءَ پاکستان ءِ جوڑ کنگ ءَ مستریں کرد ہمایانی بوتگ بلئے جنگ ءِ وھد ءَ پاکستان ءَ بنگلہ دیش پراموش کتگ اَت دومی نیمگ ءَ اے گپ وتی جاگہ ءَ راست اَت کہ روکپتی پاکستان ءِ حاکمیں تبک بنگلہ دیش ءَ پہ وت گیشیں بارے سرپد بوھگان اَت انت پمشکہ آھاں روکپتی ءُُ رودرآتکی پاکستان ءِ میان ءَ برابری ھلاس کتگ اَت۔ پمشکا حاکمیں تبک ءَ رودرآتکی پاکستان ءِ درائیں صوبہ برجاہ کت اَنت ءُُ گچین کاریانی جار پرینت ۔ملک ءِ حاکماں روکپتی پاکستان پہ درا ءُُ آجوئی بھٹو ءُُ آئی ءِ پارٹی ءِ پلہ مرزی کت بھٹوءَ فنڈ ءُُ ایندگہ آسراتی دئیگ بوت انت تنکہ آ گچین کاریاں سوبین بہ بیت ۔اے درچ ءَ درائیں رسانک در ءَ بھٹو ءِ دست ءَ دئیگ بوتگ اَت بھٹو ءِ حلاپ کنوکاں ترسینگ بوت ءُُ بیہار دئیگ بوت ۔اے وڑا چہ حاکمانی زور ءَ بھٹو روکپتی پاکستان ءِ رہشون ءُُ کماش جوڑ کنگ بوت وھدیکہ دومی دست ءَ عوامی لیگ ماں بنگلہ دیش ءَ اشتر ءِ بے مہار ات۔ اے وڑا آئی ءَ ہم رودرآتکی پاکستان ءَ درائیں سیٹ کٹ اِت انت ۔دومی نیمگ ءَ امریکہ ءُُ بھارت ءِ ہم واھگ ہمیش اَت کہ عوامی لیگ سوبین بہ بیت ۔پمشکہ عوامی لیگ ءَ ۱۶۹ سیٹاں ۱۶۷ سیٹ کٹ اِت ۔روکپتی پاکستان ءِ حاکم ءُُ ارد ہچ وڑا بنگلہ دیش ءَ گوں وت ءَ ھوار کنگ ءَ ساڑی نہ اَت انت ۔بنگلہ مہلوک ءِ واھگ ءُُ تما ہ ہمیش اَت کہ آہاں برابری ءِ سرا آسراتی دئیگ بہ بنت ءُُ آہانی جہگیری مردمانی حساب بہ بیت ۔بزاں آہاں ماں بجٹ ءَ ۵۰ درسد لوٹ کت آہانی لوٹ اَت کہ فوج ءُُ ایندگہ ادارگاں ہم آہاناں ۵۰ درسد دئیگ بہ بیت ۔پدّرا اِنت کہ اے پاکستان ءِ ارد ءُُ حاکماں وش نہ بوت۔ آ وش اَت انت کہ بنگلہ دیش جتا ءُُ گستا بہ بیت ءُُ آہانی سرا بہ کپ ایت ۔پمشکہ بنگالی اے وڑ ءَ کشگ ءُُ جنگ بوت انت تنکہ آ ہچ وڑا پاکستان ءَ گوں ہوار بوھگ ءَ راضی مہ بنت ۔پیسریگیں چیف جسٹس ،جسٹس منیر ءَ وتی کتاب ءَ ہم ھمے گپ نبشتہ کتگ اَنت کہ آئی ءَ یک ڈلے ءِ ہمراہی ءَ وھدے گوں بنگالی رہشوناں گند ءُُ نند کت ءُُ آہاں گشت کہ آ چہ پاکستان ءَ جتا ءُُ گستا بہ بنت گڈا بنگالی رہشوناں گشت کہ ما مردمانی ھساب ءَ چہ روکپتی پاکستان ءِ مردماں گیشتریں ءُُ پاکستان ءِ جوڑ کنگ ءَ ءَ ہم مئے قربانی گیشتر انت پمشکہ ماناں، بلکیں شما روکپتی مردم چہ پاکستان ءَ گستا ءُُ جتا بہ بیت۔
