رپتگیں زہیرانی گلہ ءَ مکن موسم
تبد چنچو روچانی سینگ ءَ کماتگ من
رولہ ایں گمانی من پاسپانی یلداتگ
نوں مکن منا جست ءَ مائیکانی ءِ درداں
چون گوستگ شپ دوشی
بے نکابیں استالاں
چم انسراں تہنا
واب کپتگ شپ روکیں
گوانکے ءَ گڈینتگ بس!
گوانک درد ءُُ زہیرانی
گوانک رپتگیں مرد ءِ
گوانک کپتگیں جون ءِ
گوانک گُنگُیں رہشون ءِ
بس سما منا بوتگ؟
رپتگیں زہیرانی منت ءَ مگر مپت ءَ
ہچ ناگوائیت دیوالاں
یک ءُُ دو مُجیں عکس اَنت
یک ءُُ دو رَدیں لبزاَنت
عکس ءُُ لبزاں مانا نیست
مانا آنی شوہاز ءَ بیار اِت فاضلے انچیں
ماناآں بہ شوہاز ایت
یک دگہ سرے است اَت
گنجیں گوادر ءِ دمکاں
نامے گار ءُُ بیگواہ اِنت
مانش ءِ سرا نکش اِنت
ہؤ سیدؔ ترا دیر انت
نیلیں آزمانانی کسہ ءِ مکن جست ءَ
پہک ءَ بے سر ءُُ شاہ اِنت
سبزی یے ندنت گواہی
نیلگیں زر ءِ نیام ءَ
پروشتگیں منی یکدار
چولاں گوں سر ءُُ چیر اِنت۔۔۔۔
