نامداریں کولے است اِنت کہ ہما قوم جہان ءَ بہہ سوبمند بوت نہ کنت داں وہدے وتی لس مہلوک ءُُ درتہ پچاں مہ امباز ایت۔اے گپ بلکیں پہ اِش کنگ ارزان بہ بیت بلئے ایشیءِ اندری مارشت انچو ارزان نہ اِنت پرچکہ وھدے قومے ءِ سروک گوں قوم ءَ مخلص ءُُ دل پہک مہ بیت گڈاں گلہ کنگ نہ بیت ۔ہمے ڈول ءَ مئے ملک ءِ جاور اوں ہمیش اَنت مئے راج دوستیں سروک کول ءُُ کرار ءَ کہ کپنت داں ہرچی کہ آہانی دپ ءَ بیئت اِنت آ گش اَنت بلئے کنگ ءِ باری ءَ ہرکس چہ کولاں بے ھال ءُُ شموشکار ،’’دریگتیں شے مرید اوں چہ وتی کولاں شموشکار بوتیں ‘‘ بلکیں ھانی ءِ زند زوال نہ بوتگ اَت ءُُ وت شے مرید اوں جنجال نہ بوتگ اَت۔مئے راج دوستیں سروک ہردے کولے کن اَنت داں آیاں سرجم ءَ اے ستک اِنت کہ آہانی گپاں کس پہ دل نزورایت ہمے وڑیں یک کولے مئے راج دوستیں گلانی نیمگ ءَ کنگ بوتگ اَنت کہ سی پیک وھدے جوڑ بیت داں بلوچستان ءِ ہچ مردم بے زورگار نہ بیت ءُُ بلوچستان پاکستان ءِ دیمروئی کتگیں دمگ جوڑ بیت ۔اے کول ءَ را دیر نہ اِنت سی پیک ءِ روڑ اوں بنگیج کنگ بوت ءُُ اولی ٹولی ہم اتک ءُُ واتر بوت بلئے بلوچستان ءِ جاور ہما کہ زانتکار ءُُ کواساں آہانی گمان ہمیش اِنت کہ بلوچستان ءِ جاورانی تہا ہچ وڑیں گہتری نہ بوتگیں بلکیں چرے دگ ءِ بنگیجی ءَ بلوچستان ءِ( ھاس گوادرءِ) مردمانی گوماں باز زلم ءُُ زوراکی کنگ بوھگان اِنت پرچکہ یک نیمگے آہاں لوگ ءُُ جاگہ پہ زور پچ گرگ بوھگان اَنت ءُُ دومی آ جاگہ ھالی ءَ کپتگ اَنت آ پہ موک ءُُ ملام ءِ کمک ءَ جہ جہگیراں بہا گرگ بوھگان اَنت۔ دیر نہ اِنت کہ یک ھالے فیس بک ءُُ وٹس آف ءَ اتکگ اَت کہ گوادر ءَ دکانے ءَ دزی بوتگ دکان ءَ ایریں نقدی زر برگ نہ بوتگ اَنت بلکیں ایریں سے چار آپی کین دزی کنگ بوتگ اَنت۔چہ اے ھال ءَ سرپدیں مردم زانت کنت کہ گوادر ءِ مردمان پہ ورگ آپ نیست اِنت آھود ءَ دیمروئی چون ءُُ چتور بوت کنت؟ دومی دست ءَ اے ہبر ہم دیم ءَ پیداک اِنت کہ رہداری دگ کہ ہر ہما ہندءُُ دمگاں کہ روگان اِنت آئیءِ ہردو نیمگاں ہرڈولیں کہ آباتی یے است اِنت آ اوں دور کنگ بنت نوں اے یک بلائیں زلمے کہ تربت ءَ بگرداں ہشاب ءَ آدیم بالگتر ءِ درائیں ہند یک کوچگے ہندے ءُُ مردمانی سرجمیں آباتی ہمے روڑ ءِ اے لمب ءُُ آلمب ءَ اِنت اگاں اے اے روڑ سرجمیں رنگ ءَ پچ کنگ بہ بیت داں اے گنجیں آباتی ءَ چون کنئے ؟ اے آباتی پدا روت وتی لوگ ءُُ جاگہاں یل کنت ؟ اے یک بلائیں جیڑگے ہبرے ءُُ ایشیءِ بابت ءَ راج دوستیں سروکاں مہلہی ءَ گر ءُُ دارگ کنگ لوٹیت اگاں چو مہ بیت کہ وھد چہ دست ءَ بروت ءُُ رندے اپسوز کسے درد ءَ نہ وارت۔
ابید چہ ایشی ءَ بلوچستان ءِ نودر بر ءُُ ورناہانی یک بلائیں کساسے کہ وانگ سرجم کتگ ءُُ بے زورگار اَنت اے تک ءَ اوں راجی سروک ہچ وڑیں گامگیجے زورگان نہ اَنت ۔اے جیڑگ ءَ روچ پہ روچ گیش بوہان اِنت ،گوستگیں روچ ءَ وہدے پارلیمنٹ ءِ باسک ءُُ ممبرانی پگار ءِ تہا سد ءُُ پنجاہ درسد گیشی کنگ ءِ پداں بازیں کوکار ءُُ جگہے بوتگ اَت بلئے بلوچستان ءِ ہما نودربر کہ ایم اے ءُُ ایم فل کتگ ءُُ انگت بے روزگار اَنت ایشیءِ بابت ءَ پارلیمنٹ ءِ نندوکیں سروک واب اَنت ءُُ اے وش وابی گوں راج دوستیں سروکاں ازل گون اِنت باریں اے وش وابی کد آسر بہ بیت ءُُ سروک وتی گشتگیں کولاں پیلو بہ کن اَنت۔
