بلوچی زبان ءَ مروچی بازیں کتابے چاپ بوھگ ءَ اِنت ءُُ ا ے پہ زبان ءُُ لبزانک ءَ بلائیں ارزشتے دار اَنت ءُُ زبان ءِ دیمروئی اوں ہمیشی ءِ تہا اِنت کہ زبان ءَ کتاب چاپ بہ بیت ۔آئیءِ درائیں پڑ اں جتا جتائیں کواس ءُُ لبزانتانی پگر دیم ءَ بیا اَنت ۔اے تک ءَ رجانک کہ یک نیم ساچست ئےِ زانگ بیت بلوچی زبان ءَ اے تک ءَ اوں بازیں کتابے چاپ بوتگ ءُُ انگت ءَ چاپ بوہگ ءَ انت رجانک زبان ءُُ لبزانک ءَ نوکیں ھون ءِ کار ءَ کنت پمشکا بائد اِنت کہ رجانکاری کنگ بہ بیت ءُُ اے پڑ چد ءُُ گیشتر پراہ ءُُ شائیگان کنگ بہ بیت ۔ہمے رد ءَ رد ءُُ بندی( تالیف) کتابانی یک بلائیں لڑے گندگ بوھگ ءَ اِنت ۔رد ءُُ بندی کتاب اوں پہ لبزانک ءَ الم انت ۔رد ءُُ بندی کتابانی مانا ایش اِنت کہ ہما کلیں نبشتانک کہ یک وھدے جتا جتائیں تاک ءُُ ماہتاکاں شنگ بوتگ اَنت آہانی یکجا کنگ دانکہ وانوک ءُُ نبشتہ کنوک ءَ را گیش جنجالی دیمءَ مئیت ءُُ آ وتی دل ءِ یاکہ ہما پکاریں مواد ءَ شوہاز اِت بہ کنت۔یک دگہ نیمونے اوں رد ءُُ بندءِ اے است اِنت کہ یک مردمے ءَ زبان ءُُ لبزانک ءِ بابت ءَ وتی زند ندر کتگ ءُُ آئیءِ بیرانی ءَ پد آئیءِ استیں موادانی یکجا کنگ ءُُ دیم ءَ آرگ ایوک ءَ رد ءُُ بندی دروشم ءَ بوت کنت کہ پہ زبان ءُُ لبزانک ءَ یک بلائیں مڈی یے زانگ بیت۔یک دگہ نیمونے اوں رد ءُُ بند ءِ اے دیم ءَ کیت کہ ہما گچین بنگپانی سرا کہ انگت ءَ کتابی دروشم ءَ ہچی نبشتہ کنگ نہ بوتگ ہمائی بابت ءَ جتا جتائیں تاک ءُُ تاکبنداں چہ مواد چنگ ءُُ یکجا کنگ بنت اے ڈول ءَ ہما بنگپ کہ آئیءِ بابت ءَ کتابی دروشم ءَ ہچی نہ بوتگ آئیءِ پڑ ءَ یک کتابے جوڑ بیت ۔اے درائیں گپ وتی جاگہ ءَ است ءُُ راست اَنت بلئے رد ءُُ بندی کتاب انگت ءَ وت ساچیں یاکہ پولکاری کتاب ءِ کنڈ ءَ گپت نہ کنت ءُُ اے دور کہ ایشیءَ پولکاری باریگ ءِ نام دئیگ بوتگ ا اے دور ءَ بائد مئے ند کار ءُُ کواس چہ رد ءُُ بندی کتاباں گیش وتی ساچستاں یاکہ پٹ ءُُ پولی کتابے دیم ءَ بیار اَنت داں گہتر اِنت یکے وَ آ کتاب یک نوکیں کتابے بیت ءُُ دومی ہما نبشتہ کار ءِ وتی بیت پرچکہ رد ءُُ بندی کتاب ہما ندکارانی اِنت کہ ہما نبشتانک چنگ ءُُ یکجا کنگ بوتگ اَنت ءُُ مرچیگیں دور ءَ اے کار چہ کلاں وشتریں کارے زانگ بیت پرچکہ تاک ءُُ تاکبند ہرجا دست کپت کن اَنت ءُُ ایوک ءَ ہما مواد copyکنگ ءُُ کتابے دروشمے دئیگی انت ۔منی گشگ ھچبر اے نہ اِنت کہ ر دءُُ بندی کتاب نزآرگ مہ بیت آئی ءِ اوں یک جتائیں ارزشتے است انت بلئے یکیں بنگپ ءِ دم پہ ساہت چنگ ءُُ نزآرگ ءَ چہ گہتر نہ اِنت کہ مردم وت ہمے مواداں دیم ءَ بہ کنت ءُُ یک نوکیں کتابے دروشم ءَ ہما بنگپ ءِ جند ءَ گشوار بہ کنت ۔۔۔!چشیں بازیں بنگپے است انت بلئے یک ھاسیں بنگپے است انت کہ ایشی بابت ءَ تنی وھد ءَ یک کاملیں کتابے نبشتہ کنگ نہ بوتگ بلئے اے بنگپ ءِ سرا بازیں ردءُُ بندی کتاب چاپ کنگ بوتگ انت چشکہ آ بنگپ’’ بلوچی نبشتہ رہبند‘‘ انت کہ اے یک بلائیں جیڑگے کہ بلوچی زبان ءَ گوں مان اتکگ بلئے کس ایشیءِ بابت ءَ گام بری نہ کنت ایوک ءَ تاک ءُُ ماہتاکاں چہ نبشتانک پدا ہما نبشتانک کہ ایوک ءَ گپ اَنت آہانی پشدر ءَ راستی ءِ گواہ کم اِنت بچن ءُُ یکجا کن ءُُ وتی نام ءَ یک کتابے ءِ جار ءَ بہ جن کہ من اوں کتابے ءِ واہند اَنت منی دل ءَ اے گوں زبا نءَ بدکردی انت بائد مئے کواس ءُُ لبزانت اے تک ءَ جیڑگ ءِ جہد بہ کن اَنت ءُُ رد ءُُ بند ءَ یلہ بہ کن اَنت ءُُ اے تک ءَ پٹ ءُُ پولی ھساب ءَ کتاب دیم ءَ بیار اَنت یکے نہ تری دہ ءُُ بیست کتاب ہمے یکیں بنگپ ءَ دیم ءَ بیار اَنت اے ڈول ءَ زبان گیشتر دیمروئی کت کنت ۔ بنداتی دور ءَ بگر داں بیا نوکین دور ءَ یکیں نبشتانک ءُُ یکیں گپ دیم پشت کنگ ءُُ نبشتہ بوھگ ءَ اَنت ءُُ ندکار ہمے نبشتانکانی یکجا کنگ ءَ گلائش انت کہ ما کتاب چاپ کنگ ءَ انت۔ منی دل ءَ اے گوں زبان ءَ زلم اِنت اگاں پہمگ بہ بیت ہمے یکیں بنگپ ءَ بازیں رد ءُُ بند چاپ بوتگ انت چشکہ نبشتہ رہبند، بلوچی زبان ءِ راجدپتر،بلوچی زبان ءُُ ادب ،بلوچی زبان ءِ آکبت،بلوچ لکوڑ،بلوچی زبان ءِ سیاھگ،زبان زانتی ءُُ بلوچی زبان، اے ءُُ دگہ بازیں اے درست ہما رد ءُُ بندی کتاب اَنت کہ بلوچی زبان ءُُ نبشتہ رہبند ءِ بابت ءَ نزآرگ بوتگ اَنت بلئے اے درائیں کتابانی تہا بازیں نبشتانک یک اَنت ۔اے درائیں کتابانی ارزشت وتی جاگہ ءَ بلئے ایشاں پہ زبان ءَ چون ءُُ چے وڑیں نپ بکشی کتگ آ مستریں جست انت ؟ پرچکہ اے درائیں کتابانی تہا ایوک ءَ جیڑ گانی بابت سرپدی دئیگ بوتگ بلئے ءُُ بازیں انچو نبشتانک اوں ہوار اَنت یکے دومی ءِ گپ ءِ پدرائی ءِ جہد کنگ بوتگ بلئے اے نبشتانکانی تہا زبان ءِ جیڑگانی گشواری کس ءَ نہ کتگ ،اگاں اے کتابانی وانگ ءَ رند کس گشواری ءِ ٹک ءُُ جاہے ءَ سر بوت مہ کنت گڈاں اے کتابانی چے نپ ؟ منی د ل ءَ چشیں کتابانی رد ءُُ بند دئیگ ءَ چہ مردم بائد وتی گپتاں نبشتہ بہ کنت داں ہزار سری جوانتر انت۔
بنی آد م ءِ مدام مارشتاں پہ وتا ارزانی لوٹیتگ ءُُ آ مدام ہمے جیڑگ ءِ تہا اِنت کہ کجام جاہ ءَ آئیءَ ارزانی دست ءَ بئیت انت ءُُ رد ءُُ بندی کتاب منی دل ءَ ہمے ڈولیں یک ارزانی یے پرچکہ ایشی ھاترا ءَ دگہ ہچی نہ لوٹیت ایوک ءَ دگرانی نبشتانکاں یکجا بہ کن ءُُ وتی نام ءَ چاپ اِش بہ کن بزاں محنت دگرانیگ انت ءُُ بر دگرانی ۔۔۔۔۔۔
دگہ اجبیں گپے ایش انت کہ مرچی کہ ہنچو رد ءُُ بندی کتاب چاپ بوھگ ءَ انت ہنچو گوستگیں دور ءَ نہ بوتگ چریشی ءَ اے اوں پدر بیت کہ مرچی انچو آسراتی ءَ پد اوں مردم ہچی چہ وت ءَ نبشتہ کت نہ کنت ءُُ زی ہچی نہ بوتگ ءُُ مردماں چنچو نبشتہ کتگ ۔اے بلائیں جیڑگے ھبرے اگاں کسے پہمگ ءِ جہد بہ کنت ۔اے گپ اوں نہ انت کہ رد ءُُ بندی کتاب ءِ جند جوڑ مہ بیت بلئے اے اوں نہ انت ہمک دومی مردم ایوک ءَ رد ءُُ بندی کتاب دیم ءَ بیاریت ءُُ وتی جند ءِ ساچست ءُُ سسا ءَ چہ ہورک بہ بیت ۔چنائی ءَ اے دگہ دیمروئی کتگیں ملکاں چشیں رد ءُُ بندی کتاباں ایوک ءَ یک ادارگے یاکہ لائبریئری یئے کنت دانکہ جتائیں ءُُ شنگیں مواد یکجا پہ وانگ دست رس ءَ بہ بیت ندکار چشیں کار نہ کنت بلئے مئے گور ءَ ندکار ءِ کمی اِنت ءُُ ردکار ءِ گیشی ۔۔۔۔۔۔۔۔
