ڈیمیٹر ءِ مطلب انت کشت ءُُ کشار ءِ مات۔آئی ءِ دومی نام اَنت سیسرس( گندیم ءِ دیھ) چمیشی ءَ چے لبز سیریل (دان) درکپتگ۔آ دانانی دیھ ات ۔آ کِشگ ءُُ رونگ ءِ شاہ بانک اَت۔آ کشار رودینگ ءِ شاہ بانک اتَ ۔زیوس پرآئی ءَ دلاپ ات ۔ وہدے آئی ءِ ڈگار تنیگ بوت انت آئی ءَ پرائی ہور گوارینت ۔آئی ءَ چرآئی ءَ دوچک بوت ۔یک جنکے ءُُ یک بچکے ۔جنک ءِ نام پرسیپون ات ءُُ ڈیمیٹر ءَ سک دوست بوت ۔پرسیپون پلانی تہا رست ءُُ وت اوں گشئے پلے ات۔ آئی ءِ بالاد ہنچو بارگ ات چوکہ پلی ٹالے بہ بیت۔ آئی ءِ پوست چو پلی تاکے ءَ ات ۔آئی ءِ چم جمو ات انت ۔آئی ءَ چہ وتی مات ءَ پلانی چار ءُُ گدار ءِ ذمہ واری زرت ۔پلانی نوکیں تہر ءُُ گل کاریءَ سک شیوار ات آئی ءَ اے نوکیں پلاں نوکیں نام پر کت ۔یک روچے آ چوداں دور ترشت کہ ہمروچ آئی ءِ حد ات ۔آ کور ءِ آدست ءَ پل ءُُ درچکانی درچ ءَ گران ءَ شت ۔آ کمو گل ءءُُ شاد ات ۔آئی ءَ وتی رنگانی کونزگ گوں انت آئی ءَ برزیں گوڑگانی مچے دیست آئی ءِ دل ءَ گل کاری ءِ گمان ءَ جت ۔وہدے آ ایشانی تاک ءُُ پلان گل کار کنگان انت آئی ءَ لدے دیست کہ آئی ءَ چدو ساری نہ دیستگ ات ۔آ آئی ءِ چارگ ءَ سرگپت اے یک رُنگیں لدے ات ۔ایشی ءِ تاک سک سبز ءُُ رژناک ات انت ۔ ایشی ءِ سہریں کلیر پر ات آئی ءِ ٹالانی سرا چو ہون ءِ ترمپ ءَ جڑکگان ات انت آئی ءَ اے شری ءَ چار ات ۔آئی ءَ نزانت کہ ایشی ءَ دوست نکنت یا مکنت ۔آئی ءَ سوڈگ کت آ ایشی ءَ ادا مدارات ۔آئی ءَ آئی ءِ شاہ گپت انت ءُُ کش ات بلئے ایشیءِ روتگ سک جہل شتگ ات انت ءُُ آ در نہ کپت ۔آئی ءَ پدا یکوڑے کشگ ءِ جہد کت ۔آئی ءَ گوں سکیں زورءَ ژپ اِت ۔درچک چہ بن ءَ درآتک ۔ اے گوں وتی دراجیں روتگاں درکپت ءُُ زمین ءَ یک بلائیں ٹنگے پچ بوت آئی ءَ اے درچک یک نیمگے ءَ دور دات ءُُ وت پد ا وتی گواڑگانی نیمگ ءَ شت ۔آئی ءَ گرندگی توارے اش کت ءُُ پدا پد ترات ۔اے گرندگ ءِ توار برز بوان ات چہ ہمے ٹنگ ءَ پیداک ات ۔چہ آئی ءِ ترس ءَ ٹنگ گشے پرا ہ روان ات چو دپ ءَ پچ بوان ات اے گرندگ ءِ توار گیش بوان بوت۔چرے ٹنگ ءَ شش اپس درکپت اے اپسانی پشت ءَ یک اپس گاڑی یے بستگ ات ۔چہ ہمے اپس گاڑی ءَ یک برزین مردے گوں بے آستونکیں پشکے ءَ در ا بوت ۔آئی ءَ سیائیں تاجے سرا ات ۔آئی ءَ پریات کنگ ءِ لوٹ کت ۔آئی ءَ وتی دراجیں دست شہار دات انت ءُُ آ گپت ءُُ اپس گاڑی ءَ آورت وتی اپساں چابکے جت اپس گوات ءَ بال بوت انت ءُُ ہما ٹنگ ءَ پترت انت ۔ وہدے آ تہا شت انت ٹنگ بند بوت ۔ وہدے جنک لوگ ءَ نہ یتک گڈا ڈیمیٹر دل تپرکہ بوت ءُُ آئی ءِ شوہازءَ ڈن ءَ درکپت ۔سبزیں پوشاکاں برزیں دیھ یک دارءِ اپس گاڑی یے ءَ سوار ات کہ گوں اسپیتیں تچوکیں اپسے ءَ بستگ ات اے سوگات آئی ءَ پوسیڈن ءَ داتگ ات۔آئی ءَ وتی اپس اے دمگ ءُُ آ دمگ ءَ تاتک ءُُ توار جت پرسیپون ۔۔۔پرسیپون۔۔۔بلئے کس ءَ توار پچ نہ دات آئی ءَ درائیں شپ تتک ءُُ چار ات بلئے آ گندگ نہ بوت ءُُ شپ بوت ۔ اے سہت ءَ آ یک ہنچیں جاہے ءَ اتک کہ اودا کسان کسانیں درچک ات انت آئی ءَ اودا لپاشتگیں کاہ ءُُ چہ روتگاں درکپتگیں درچک دیست انت ۔آئی ءَ چہ گاڑی ءَ دور کت۔اودا آئی ءَ زمین ایر شتگیں جاگہ دیست ۔پدا آئی ءَ پرسیپون ءِ چپ کپتگیں رنگانی کونزگ دیست ۔آئی ءَ وتی دپ برز ءَ جت ءُُ چو مادگیں گرک ءَ اُلاس ات پدا آ بے ترک ءُُ توار ءَ کپت ءُُ گوش ئے داشت انت ۔روچ درا بوت ۔مرگ گوں وت ءَ ہلوت ءَ بوت انت آہاں وت ماں وت ءَ ہمے بے پرائیں جنک ءَ ہما اجبیں درچکے کسہ کت آہاں پدا ہما ٹنگ ءُُ اپس گاڑی ءُُ ہما سیائیں سوار ءِ گپ جت ۔آہاں گشت کہ ہما سیائیں سوار ءَ وہدے جنک کبند کت گڈا جنک چوں ابکہ ءُُ حیران بوت پدا ڈیمیٹر سبک سبک مرگاناں جست کت مرگاں آگشت کہ کئے ءَ آئی ءِ جنک برتگ آئی ءَ وتی دست چماں کت انت ءُُ گریت ۔ہمے وہد ءَ یک بچکوئے ہمے کہچراں پہ پل سندگ ءَ اتک وہدے آئی ءَ ڈیمیٹر گریوگ ءَ دیست گڈا آئی کند ات ۔آئی ءَ چدو پیسر ہچ مزنیں مردم گریوگ ءَ نہ دیستگ ات ۔بلئے وہدے آئی ءَ برز ءَ چارات گڈا بچک ءَ کندگ بس کت ۔آئی ءَ دم کت ءُُ آ چپ بوت ۔آ ہما دمان ءَ گِری کڈولے بوت بلئے آئی ءَ تنیگا شپورگرگ درنہ برتگ ات۔ آ ہمودا اوشتات ءُُ ڈیمیٹر چار ات ۔یک شریں ساہتے ہنچیں سہتے کہ یک شاہنپے بیئت ءُُ آئی ءَ وتی چنگلاں بکنت ءُُ ببارت ہمے وڑا شاہینے آتک ءُُ آئی ءِ کبند کت ۔آ سے کنانیں ساہتے ءَ گری کڈولے کنگ بوتگ ۔ڈیمیٹر پدا وتی گا ڑی ءَ سوار بوت اولمپس ءَ رہادگ بوت ۔آ تچک ءَ تحت ءِ کوٹی ءَ شت کہ اودا زیوس وتی تحت ءِ سرا نشتگ ات انصاف آئی ءَ پریات کت ’’ انصاف‘‘! تئی برات حادث ءَ منی چک آوارجتگ ۔۔۔مئے چک۔’’ صبر! منی دوستیں گہا ر‘‘ زیوس ءَ گشت ۔’’صبر بکن وتارا بدار حادث ءِ آروس ءِ جیڑہ ات ۔آ منی برات انت ۔۔۔مئے برات انت ۔۔۔آئی ءَ شریں کارے کتگ۔ بچار ڈیمیٹر! اے پہ مئے جنک ءَ وشیں گپے نہ انت کہ مئے کہول ءَ مان میار ایت ءُُ بے سور ءَ بہ نندایت۔اے پرآئی جند ءَ شر نہ انت ‘‘۔’’ہچبرا‘‘ ڈیمیٹر زار جت ۔’’اے ہچ وڑا نہ بیت ۔تری ہرکس بہ بیت بلئے حادث بہہ ناں! زاناں نزانے کہ اے بہار ءِ چک انت پلانی چک انت نازرک ءُُ نہ ترکتگین پلے ۔۔ ہمائی ءَ کہ آ وتی ملک ءُُ ملکت گشیت آ ہونڈءَ تنیگا روچ ءِ یک شہمے ہم ندیستگ ‘‘ ’’ آ مئے چک انت‘‘ زیوس ءَ گشت آئی ءَ گورا زندگ بوہگ برداشت کنگ ءِ سنچ ہست انت ۔دعا کن ءُُ وتی پگر ءَ ہلاس کن ‘‘ ڈیمیٹر ءَ دگہ چیزے دیست زیوس ءَ گروک ءِ شہمانی نوکیں لٹے دست ءَ ات ۔آئی ءَ دگہ ہنچیں نگرہ ءُُ آہن ءِ شہمے دست ءَ ات انت کہ نوکیں ات انت آئی ءَ مار ات کہ آہن ،نگرہ ءُُ تلاہانی اے ہزانگ حادث ءِ کرءَ انت ۔اے درائیں سوگات زیوس ءَ حادث ءَ بخشاتگ انت ۔آئی زانت کہ ادا انصاف ءِ تلب باتلینے ۔من ترا یکبرے پدا گشاں آئی ءَ گشت ’’ تو منی آوارجتگیں جنکءَ کارے یا ناں ۔۔۔‘‘؟ منی دوستیں گہار! زیوس ءَ گشت ’’ وہدے تو زہراں ورے تو زانے کہ اے یک شریں سودایے پہ اے جنک ءَ جوان تریں چیز ہمیش انت ۔گوں تو اِنت کہ پدا زمین ءَ برو ءُُ وتارا اے بابت ءَ موہ یے بدئے دانکہ تو اے بابت ءَ جوانی ءَ سرپد بہ بئے۔۔‘‘زیوس من بے شک زمین ءَ رواں بلئے بچار کہ من پدا ہما وہد ءَ کایاں کہ تو وت من ءَ بلوٹے ‘‘ ڈیمیٹر ءَ گشت ۔
