دنیا ءِ درائیں ہند ءُُ دمگاں وتی وتی دود ءُُ ربیدگانی پہازگ ءُُ دیمروئی ءِ کار برجم انت،ہمک زندگیں قوم پہ استی ءِ پجار ءَ وڑ ے نہ وڑے ءَ درشان کنگ ءَ گلائیش انت ۔بلوچ قوم کہ چہ ازل ءَ پدمنتگیں ءُُ لگتمالیں قومے زانگ بیت آئی ءَ داں ازل ہمے ڈول ءَ بے سوبیانی آماچی ءَ ردگ دیستگ بلئے سوبمند نہ بوتگ آئی ءِ اسل سوبمندی گوں آئی ءِ پجار ءَ اِنت ،اگاں یک قومے ءَ وتی پجار بے حال کتگ ءُُ شموشتگ داں آ قوم بزاں دیریا زوت گار بیت ۔بلوچ قوم کہ انوگیں نگیگیں جاوراں وتی پجار ءِ جنگ ءَ گلائیش انت ،باریں آپسرے ءَ سر بیت یا مہ بیت ؟ آ دگہ جستے ۔۔۔۔! مرچی دو مارچ ءِ روچ کہ بلوچانی دودمان ءُُ ربیدگ ءِ روچ ءَ زانگ بیت۔ ءُُ گواستگیں چیز ے سال ءَ اے روچ پہ شانے جم دارگ بوہگ ءَ انت ۔اے روچ ءِ اسل جم داروک باریں کئے بوتگ بلئے بلوچ راج ءَ را اے روچ ءِ سرپدی چہ وش نیوز ءِ کارمستر احمد اقبال ءِ پرمان ءِ پداں رستگ ۔بزاں ہمائی ءَ اے روچ ءِ جم دارگ چہ وتی چینل ءِ کمک ءَ دارگ بندات کتگ اَت ءُُ نوں درائیں بلوچستان ءَ اے روچ گوں شان دارگ بیت ۔اسل ءَ اے روچ چہ بن ءَ بلوچاں گون نہ بوتگ ات ۔بلوچاں اے اوں نزانتگ کہ یک انچین روچے اوں کیت کہ بلوچستان ءِ تہا یک بلوچے ءَ را جست کنگ بیت کہ ’’ کون ہو تم؟‘‘ یاکہ چراہی ءَ پجار کارڈءِ جست بیت بلئے مرچی کلیں جہان ءِ دیم ءَ پدر انت کہ گوں بلوچاں چے ءُُ چون بوہگ ءَ انت ۔دو مارچ ءِ اے پجاری روچ گواستگیں پنچ شش سال انت کہ یکشل ءَ دارگ بوہگ انت ۔بلئے ہمے گندگ بیت کہ بندات ءَ اے روچ پہ شانے دارگ بوتگ بلئے انوگیں دو سے سال انت کہ اے روچ آ ڈول ءَ دارگ نہ بوتگ کہ پیش ءَ دارگ بوتگ ۔من یک سرگواستے بیان کناں رند ءَ گپ ءَ دیم ءَ براں ۔۔۔۔۔۔یک مارچ ءِ سہب ءَ بگرداں بیگاہ ءَ من سنگتانی مچی ءَ نندوک اِتاں بازیں دپ بازیں گپ بوت ،نوکری،سرکار ءِ نابودی،ناانساپی،بے روزگار ی ءُُ دگہ باریں چونیں چونیں بنگپاں تران بوت۔گمان من پنچ دیوان ءَ پاد اتک ءُُ نشتاں ہما گپ کہ منی دل ءَ کس ءَ نہ گوشت من وَ دل ءَ ہمے شور کتگ اَت کہ اے گپ ءِ بندات ءَ من نہ کناں باریں دگہ کسے اے گپ ءِ یاتگیر ی ءَ اِنت کہ بلئے ہرام بات دوستاں یکے ءَ اوں اے گپ نہ کت ۔ایر من اوں دل ءَ را سنگے پر دات ءُُ دیم پہ وتی کوٹی ءَ سر بوتاں من یک سنگتے کہ گومن ہمے کوٹی ءَ نندوک انت کہ منی سلام دئیگ ءَ پیش آئی ءَ من ءَ ہما گپ ءِ بابت ءَ جست کت کہ منی دل ءَ وَ است ات بلئے دپ ءَ نیارتگ اَت ۔سہتے ءَ رند ما دوئیناں جوانی ءَ اے گپ ءِ بابت ءَ تران کت من وتی سہب ءِ درائیں حال ءُُ احوال آئی ءَ را دات اَنت ۔’’شپ پہ جیڑگ ءَ روچ نہ بنت‘‘ سہب بوت دومارچ انت ،گد پر کت مزن شاہ دربر جاہ ءَ سربوتاں دل ءَ گشت بلکیں نوکیں بینر ءُُ پوسٹرے بلکیں اے روچ ءِ درگت ءَ جنوک بیت بلئے ہچ نیست اَت ۔ حئیر من مزن شاہ دربر ءِ تہی نیمگ ءَ شتاں بلکیں دوستے ءَ گوں دوچار باں بلئے اِناں شاہ در بر ہورک ءُُ حالیگ اَت ۔سہتے ءَ رند یکے ءُُ سنگت دپ کپت اَنت من جست کت باریں شما چے چے تیاری کتگ پہ اے روچ ءَ آ حیران بوتاں کہ چونیں تیاری ؟ چونیں روچ؟ من گشت مرچی مئے پجاری روچ اِنت۔۔۔۔! آں۔۔۔۔ما یار چٹ بے حال انت کہ مرچی دو مار چ انت آآآآ ۔شر واجہ شماکہ وت وتی پجاری روچ ءَ چہ بے حال بئے گڈاں دگہ دریں مردمے کجا شمئے پجار ءَ یات کنت ۔بلئے اِناں لہتیں سرچوٹیں جواناں وتی اے روچ پہ جوانیءَ یات اَت من گنداں کہ چیزے اسپیت پوشاکیں چوٹ بروت ،پاگ اِش ماں سراں بندوک اِتاں ،زہم اِش ما دست ءَ اِت انت ءُُ گوں گرانبہائیں بچکنداں منا گلائیش یے کت ءُُ بلوچ دودمان ءِ مبارکی یے دات ۔۔۔۔۔منی دل چنچو وش بوت آئی ءِ سما ایوک ءَ من ءَ است انت ۔دیر نہ بوتگ دگہ رمبے ورنا ہمے ڈولیں پچ ءُُ پوشاکاں شاہ دربر ءِ گیت ءَ تہا اتک انت ۔ رند ءَ یک کسانیں مچی یے آرٹس ڈیپارٹمنٹ ءِ دیم ءَ مچ بوت ءُُ گوں ڈہل ءُُ سروز ءَ بلوچی دو چاپی بندات بوت ۔جان پٹ پاد اتک انت کہ من اوں دور بکناں بلئے اپسوز ءُُ سد اپسوز کہ منءَ منی برات ءِ وانگی فارم گون اِتاں ۔۔۔۔۔۔۔اے فارمانی گونی ایوک ءَ منی کوپگاں نہ اَت بلئے ہمک دومی نودربر ءِ دست ءَ اَ ت پرچکہ وانگی فارم ءُُ چکاس فارمانی گڈی روچ نزیک اَت۔۔۔۔پمشکا درائیں مردم بے چہ اے گپ ءَ کہ مرچی مئے وتی جند ءِ پجار روچ انت ۔۔۔۔من حیران اِتاں کہ ہما مرددماں کہ من ساری ءَ جست کت کہ مرچیگیں روچ ءِ بابت ءَ چے گشئے داں آ وَ چہ اے روچ ءِ جند ءَ بے حال اِتاں بلئے وہدے درائیں مردماں ہمے ورناگل دیستاں کہ آ وتی پجاری روچ ءَ دارگاں اَنت گنداں ہرکس ہمے گپ ءَ انت کہ مرچی بلوچانی ربیدگی روچ انت ۔۔۔۔چرے گوستن ءَ نزاناں شما چے سماکنئے بلئے من ہمے سما کت کہ بلوچ ءَ را وتی پجار ءِ اسل ءَ وت سد پر نیست ۔۔۔۔۔۔اگاں سد ے پر بوتیں مرچیگیں روچ ءَ کس وتی کاراں نہ شت ،کس وانگجاہاں نہ شت،کس ءَ دگہ کارے دست نہ گپت ،کس لوگ ءَ نندوک نہ بوتگ اَت،درائیں مردماں وتی اسل گد ءُُ پچ ءَ چو ائید ءِ وڑ ءَ چوتاریں گداں درائیں دمگاں گشت ءُُ وتی پجاری ءِ پجار دات کہ من ہم دنیا ءَ است ءُُ زندگوں منی راج ءُُ راجدپترے است انت ۔اِش کنگ ءَ نوں وَ سرکار ءَ اوں بلوچانی اے روچ قبول کتگ ءُُ اے روچ ءَ بلوچانی دودمانی روچ نامینتگ ،پیش ءَ اگاں جاورانی نگیگی ءَ کسے ءَ اے روچ داشت نہ کتگ بلئے نوں وَ سرکار ءِ جند ءَ اے روچ ءِ جم دارگ ءَ ہر وڑیں پابندی دور کتگ انت ،نوں کئی تر س انت کہ ما انگت ءَ چہ اے روچ ءَ پہ شان ءُُ مڑاہ ئے جم داشت نہ کناں ۔ اے روچ ءِ جم دارگ اے دور ءَ منی دل ءَ سک المی انت کہ بلوچ وتی پجار ءِ جنگ ءَ گلائیش انت آ لوٹیت کہ سرجمیں استمان آئی ءِ پجار ءَ چہ آشنا ءُُ سرپد بہ بیت اگاں ما وت وتی پجاری ءَ پہ مڑائی جم داشت مہ کناں گڈاں دگہ کئے اے روچ ءَ دارایت اے پگر کنگی گپے ۔۔۔۔۔؟
