ہوش کن اِت جنگ ءَ مئے بلوچانی
گائے ءَ گچکی گائے نوشروانی
کسہ اِنت بیلاں نرمزارانی
سر دہو نام کشیں بلوچانی
لشکرے براتاں ہزار شیرانی
کُنگراں درائیں لال ماتانی
جنگے ءِ روچ اَت سرمچارانی
ماہ بیت اولی سال ءِ روچانی
ساہ گریں سہبے ہون وارانی
کمبری سر سندیں سگارانی
تیر جنیں بالاچ ءِ کمانانی
چاکری شلیں بور سوارانی
لشکر اِنت گہرام ءِ پتارانی
بد ہما روچ اَت کہ سمسراں اتک اَنت
گوں وتی مکر ءُُ پندلاں رِتک اَنت
ذات ہما مکاریں پرنگانی
جنگے ءِ ٹوہ ءَ بوتگ اَنت جانی
’’ ناظم‘‘ اِش درکت مئے بلوچانی
پندلے سازاِت گٹ ءُُ مالانی
سنگہ ئے زیاتیں پرکت ناہانی
نوں گڈاں جہہ جت گیرت ءَ خانی
گشت بلوچ خان ءَ آپ سرا بزر اِنت
مئے سرا جنگے الم ءَ پرز اِنت
ہور بے براتاں بس ہمے ارز اِنت
مہراب گچگی لاحق ستا کرزانت
دور کنئے بیلاں نوں ڈگار مرز انت
سوج بوت دژمن تیاب دپ ءَ نشتگ
سنگرے گوکپروش ءَ گڈاں بستگ
لشکرے دراجیں بنجاہ ءَ سستگ
جنگ ءُُ داوا ءَ سر کپن بستگ
لشکر ءَ دور ءَ لشکرے دیستگ
زاناں آ لشکر دژمن ءِ بوتگ
ڈاہ دات خان ءَ لشکرے زنڈیں
ٹوپ ہما گون اَنت کہ زمین چنڈیں
کوہ مئے چاریں دیمگاں کنڈیں
لشکرا بیائے کپ کنیں گونڈیں
سوج دات خان ءَ گوں وتی عقل ءَ
بلئے گچکی ءَ گشتگ کہ بل وتی دکل ءَ
جنگ کناں ما پہ دیم پہ دیمپانی
بلّے بیت لشکر دیم ءَ تاوانی
بس ہمے جٹّی بوت بلوچانی
لشکر اَت دیمدار بازیں ٹوپانی
بوت گڈاں بندات دپتری جنگے
ٹوپ ءُُ تیرانی اجب رنگے
اچ کس ءَ جان ءَ اوں نہ جت زنگے
کیپے ءِ نوشگ نئے دگہ بنگے
دوکلاک جنگے داشتگ اَت مرداں
بے دلیں گچگی پیسراں تتکاں
شیر دلیں ورنا جل اِتاں تہنا
بیرکے دست ءَ کت در اتک ڈن ءَ
نرمزارانی یک لڑے مک اَت
تولگیں انگریز جاہ سراں درْک اَت
ہچ نہ بوت دستاں بیدئے اے نام ءَ
نام شہیدی یے بس شمئے باج اِنت
نام شہیدی یے بس شمئے باج اِنت
