آ گوات ءَ باریں کجا برتگ اَت ۔آتئی دست ءَ بہ کپ ایت من زاناں آ کارا نئیت ۔نوں روچ ءَ ساڑینتگ اے مہرگ توچہ وتی مات ءِ گور ءَ پچ گپتگاں اشاں پدا آئی ءَ بدئے ۔‘ منی ہمروئیں تروزہگ کندگ ءُُ من ءَ گلاگ زورگ ءَ ات ،تو ہر وہد ءَ منی دّتک کلاگ زرتگ ءُُ وتیگ ءِ توسیپ کتگ کہ آ دیدگ ءِ مات ءَ ہڈ کتگ ڈولدار انت ءُُ تئی بد ڈول انت ۔آئی ءَ منی گیگان گپتاں ءُُ سک کند ت ۔ مرچاں چیا تئی دتک بد ڈول انت ءُُ نوں تو اے مہرگاں چی کنے ؟ آ انگت من ءَ کلاگ زورگ ءَ ات بروچہ منی کرا ۔۔۔من کوکار کت مہرگ لوگ ءِ پیژگاہ ءَ سر دست کتاں وتی دتک دست ءَ کت وتی میتگ ءَ چہ کمے گستا دیدگ ءِ مات ءِ لوگ ءِ نیمگ ءَ رہادگ بوتاں ۔کہ آ روچی من آئی ءَ کڈک ءِ پشت ءَ لیب ءَ اتاں آ منی کرا نشتگ اَت ’’ منی چک کمو آپ بیار گوں منی نک ہشک انت؟‘‘ من پہ آئی ءِ واستا آپ آرگ ءَ شتاں پہ آئی ءِ واستا آپ آرت ءُُ اتک اَنت ۔من بے حالاں منی چک راست گشیت تئی دتک ءِ گشان گوات ءَ برت ‘‘ آئی ءَ گٹے آپ وارت ءُُ من ءَ حال دات ۔من گشاں باز شوہاز کت بلئے نہ دیست ہما روچ ءَ چہ رند پدا ہرروچ ہمدا آتکاں بلکیں گشان ءَ گنداں ہروہد ءِ وڑا مرچی ہم دیدگ ءِ مات وتی کڑک ءَ نشتگ ۔منی شک گشاں شوہاز بوت ؟ آئی ءَ گلاس ءِ آپ منی نیمگ ءَ شہار دات ءُُ جست کت ’’ اناں‘‘ من آئی ءِ دست ءَ چہ گلاس دست گپت جہلاایر کت ۔منی چک آپ ءَ بور تنیگ نیاں ۔ہو اے تئی چمانی گندگ ءَ گوں پدر بیت آئی ءَ بچکندت پاد اتک لوگ ءِ کنج ءَ گرنچے ایر اے آ پچ کت ءُُ چیز ءِ درکت ۔بزو اے تئیگ انت ۔آئی ءَ وتی دست شہار دات من وتی دست ءِ دتک ایر کت آ دست گپت گشان ! من گل ءَ بال بوتاں آ پتاتگ ءُُ سچ ءُُ مچ ءَ من تل پچ کت اے وَ مزن ایں چون دتک ءِ سر ءَ بیت ؟ اے مزن نہ انت تئی سر ءَ من بلئے من گشان نلوٹاں منی دتک ءِ سر ءِ واستا گشان ءِ ۔۔ تو دتک ءَ پرچہ گشان سر ءَ دیئے کہ آ زانگ بہ بیت جنک ءِ ءُُ گشان آئی ءِ لج انت تو ہم جنک ءِ اے تئی ہم لج انت آئی ءَ گشان چہ منی دست ءَ پچ گپت ءُُ منی سرا دات۔ بلئے گشان ءِ کناراہ آں مہرگ ءِ سرا الم کرہشی بکن ءُُ اجبرایشی ءَ سر ءَ چہ کپگ ءَ میل ۔ہو۔۔۔من سر سرینت ءُُ گشت ۔گشان منی سر ا ات من تچان بوتاں دیم پہ وتی لوگ ءِ نیمگ ءَ پیژگاہ ءَ چگل داتگیں مہرگ چت ءُُ یکجاہ کتاں ءُُ گوں بندیک ءَ آہاں کماہگ ءَ لگ اتاں تو چی کنگ ءَ ئے ؟ منی تروزتک ءَ منا جست کت ۔گندگ ءَ نئے مہرگے کماہگ ءَ اں وتی گشان ءَ کریشی کناں ۔گشان کریشی کنے آئی ءَ کند اِت ۔مہرگے رنگانی دپ ءَ دیگ نہ زانے ءُُ گشان ۔۔۔‘‘ آئی ءَ کندت ءُُ پدا منی کلاگ زورگ ءَ لگ ات من چہ اودا ءَ پاد اتگاں چنال ءِ ساہگ ءَ نشتاں مہرگانی رنگ ءَ اے وڑ دپ ءَ دیگ نہ بنت ؟ من وت ءَ گوں وت جست کت ۔راست گشی من وَ گشان ءِ کریشی کنگ نہ زاناں ۔اگاں دتک ءِ گشان شوہاز بوتین من آ چتور کریشی کتگ ات ؟ دتک ءِ نام ءِ گرگ ءَ گوں من ترانگ ءَ کپتاں کہ دتک من دیدگ ءِ مات ءِ کڑک ءَ بے حال کتگ ۔من مہرگ پندول ءَ کتاں تچان بوتاں پدا دیم پہ ہما گوں ۔دیدگ ءِ مات ءِ ڈں ءَ تھت ءِ کرے نندگ گوں من حیران بوتاں کہ پیسر ءَ آ ہر وہد ءَ کڈک ءَ نشتگ بوت ءَ مرچی ڈں ءَ پدا گوات ہم کشگ ءَ ایں ’’ دیدگ ءِ مات کڈک ءَ پچ کن من وتی دتک ءَ زوراں من آئی ءِ تھت ءِ دیم ءَ اوشتات آں ۔من انوں چہ کڑک ءَ دراتک ہور ہچ نسیت ۔اناں من ءَ یات انت من دتک ہمود ءَ بے حال کتگ ۔من آئی ءِ تھت ءِ دیم ءَ نشتاں اناں اناں منی چک جاہلی مکن تو باریں آ کجا گارکتگ ۔آں اگاں تو گشئے پمن دگہ دتک اڈ کن من کناں بلئے تئی دتک اد ءَ نہ انت ۔
گڑا شریں پمن دگہ دتک ءِ ہڈ کن پرتو دتک ءِ ہڈ کناں بلئے پیسر ءَ تو منی کڑک ءَ بہ روپ آ سل ایں دیریں نہ روپتگ منی دست درد کناں نہ باں ءُُ جنک ایں چک ءِ منا نیست گڈا دیدگ ؟ آ کجیں ؟ ہمد ءَ انت ۔ہمد ءَ ایں کجیں ہمود ءَ ؟ آ منی کش ءُُ گوراں ایں منی وابانی حیالانی تہا انت بس منا چہ ابید آئی ءَ دگہ کس نہ گند ایت ۔آئی ءِ بے سر ءُُ پادیں گپاں من ءَ حیران کت تو تنی وہدی نہ زانے تو گڑا روپ ءِ منی کڑک ءَ ؟ آئی ءَ بچکندت ءُُ گومن گشت ہو ۔۔۔من پاد آتکاں منی سر ءَ چہ گشان شترت کپت من گشان گپت سرا کت بلئے گوات کشگ ءَ ات گشان ءَ سر ءَ بوہگ ءَ نیلگ ءَ ات ءُُ گشان ءِ پدا دور دات ءُُ من پدا گشان سر ءَ کت ءُُ دستانی گوما مہر ءَ مہر داشت ۔تو چوں منی کڑک ءَ روچے دوئیں دستاں گشان داشتگ گوات گشان ءَ سر ءَ بوہگ ءَ نیلگ ءَ انت ءُُ تو وت گشگ گشان ءَ سر ءَ چہ کپگ ءَ میل ءُُ ا ے تو وت من ءَ داتگ ۔راست گشئے بلے من اے ہم گشتگ کہ گشان ءِ کنارا اں مہرگ ءَ گوں کریشی بکن ۔گشان جلواناک بیت ءُُ دومی مہرگ گشان ءَ چہ سر ءَ کپگ ءَ داریت ۔بلئے من گشان ءِ کریشی کنگ نہ زاناں ۔
من تراگشاں گوں من ہر روچ آتکاں ءُُ آئی ءَ من ءَ کریشی ءِ دوچگ گشت گوں گشان ءِ سرجم بوہگ ءَ کمے پشت کپتگ ءَ مرچی برو ہما روچ ءَ بیا اے گشان سرجم بیت منی کڑک ءَ روپ ءُُ من پر تو دتک ءِ ہڈ کناں آئی ءَ گوں پر مہریں گالوار ءَ گوں گشت من وتی گشان ءَ سرجم کناں دیدگ ءِ مات ءِ کڑک ءَ روپاں آ پمن دتک ءِ ہڈ کنت پدا من وتی گشان ءِ وڑا دتک ءِ گشان ءِ کناراہ آں ہم مہرگ پر کناں ءُُ پدا گوں وتی دتک ءَ لیب کناں ۔ہمے ہب ءَ من ءَ نندگ ءَ نیشت سجہیں شپ ءَ نشتاں گشان کریشی کت تاں آسرجم بوت من سہب ءَ مہلہ پاد آتک انت گشان لوگ ءَ ایر ات من دومی لوگ ءَ روگ ءَ ات انت روپگ ءِ رند ءَ منی درآہگ ءَ گوں منی تروزہگ ءَ من ءَ روک روک ءَ چارت ءُُ ہمے لوگ ءَ پترت ۔من روپگ آرت ءُُ گشان سر کت دیم پہ دیدگ ءِ مات ءِ لوگ ءِ نیمگ ءَ آ وتی کڑک ءِ تہا نشتگ ات منی گندگ ءَ گوں آ ہمے حیران بوت برئیں منی چک ڈں ءَ روئیں اناں تو منی دتک ءِ ہڈ کنگ ءَ بو من انوں تئی کڑک ءَ روپاں ۔تو گشان ءَ سرجم کت ؟ آ ئی ءَ منی گشان چارت ہو من سر سرینت آئی ءَ منی سر ا چہ گشان کش ات ۔آئی ءِ کشگ ءَ گوں ہور ءِ اولی ترمپ ہشکیں زمین ءِ سرا بکپاں انچیں توار ءِ جست بوت ۔من حیران بوتاں ۔کجا گار کتگ انت وتی گشان ءِ مہرگ ؟ گشان آئی ءِ دست ءَ ات یک نیمگ ءِ درستیں مہرگ رتکگ انت ۔من گشان چہ آئی ءِ دست ءَ چہ ژپ ات کہ چارایں مہرگ تر گپتاں دور شتاں کپتاں چتو سستگاں مہرگ ۔۔۔من مہرگے چنگ ءَ ءُُ ہمے حیال ءَ ات انت یک مہرگ ءِ دور ترنزینتگ ءَ بستگیں گرنچ یے کرا کپتگ ءَ من آئی ءِ چنگ ءَ شتاں گرنچ ءِ بستگیں گدانی تہا منی دتک ءِ گشان ءِ لمب زاہر ات من گرنچ پچ کت کہ دتک ءُُ آئی ءِ گشان دوئیں تہا ات انت ءُُ منی دتک ءُُ آئی ءِ گشان من چک تراینت دیدگ ءِ مات گار ءَ اود ءَ نہ ات ۔من ڈن ءَ درآتکاں چم پہ چم ءَ میم نیاہگ ءَ ات یک زردی ءَ مانشتاتگ ات سیا گوات یے ءَ مئے میتگ ءَ روپگ ءَ ات من جمپ ئے سرا اوشتات انت ۔مزنیں سہت ئے رند گوات شت بازار ساپ بوان بوت منی چم ہمانیگم ءَ سک ات انت کہ بلک میرک زاہر بوت کہ آ سر در ات گشان گوات ءَ گوں وت برتگ ءَ گوں ءُُ آئی ءِ پشت ءَ مروارد کہ آئی ءِ گونڈوکیں چک ءَ آئی ءِ گشان ءِ لمب دست ءَ ات کہ آئی ءِ گشان ءِ درستیں مہرگ سستگ ات انت دانگ ءِ ہم پر نیست ات ءِ منی پشت ءَ مہرگ ءِ کپگ ءِ وڑیں چیز ءِ توار بو۔مروارد ءِ گشان ءِ وڑا ڈنگراں سستگ منی گشان ءِ درپشوکیں دیدگیں مہرگ من پشت ءَ چک جت کہ دیدگ ء مات اوشتاتگ ات ۔کپتگیں چیز مہرگ ءِ نہ ات آئی ءِ ارس ءَ زمین ءِ سرا کپت ہما روچ ءَ چہ رند مئے میتگ ءِ درستیں مردم گنگ بوتاں کس ءَ گپ نہ کت بلکیں گوات پدا بئیت مئے دپاں ہاک ءَ چہ پربکن انت من ہر روچ آتکاں ہمے جمپ ءِ سرا نشتاں وتی میتگ چہ دور ءَ چار ات ۔وہدیکہ من چم شانک داتاں منی دیدگ ءِ مات ءِ کرے انچو روگ ءَ آہگ ءَ مئے بازار ءَ یک نوکیں کشک ءِ اڈ منی دتک ءُُ آئی ءِ گشان ءِ چیر دیگ ،مہرگ ءِ رنگانی دپ ءَ دیگ کماہگ ءُُ گشان ءِ کریشی ءِ دوچگ ،مہرگانی گشان ءَ چہ سندگ ،گوات ءِ گوں ہمرائی ءَ گشان ءِ برگ وتی دوشینگانی نہ بوہگ ءَ ابید وتی کش ءُُ گوراں آہانی مارگ ،ہور ءِ اولی ترمپانی مہرگ ءِ ارس ءِ زمین ءِ سرے کپگ ءَ گوں یکیں توار ءِ چست بوہگ مئے میتگ ءِ مردمانی گنگ بوہگ بس گوں ارسانی گوما ہبر کنگ اے سجہیں سبک من وتی میتگ ءِ ندارگانی گندگ ءَ گوں دربرتاں ۔
