اے میان ءَ وانگجاھانی کتاب اسلامی جوڈ کنگ بوتاں ءْ سوجکاراناں ھمے گْشگ بوت کہ ہر چیزے وانین ات آ اسلامی علم ءِ مطابق ءَ بہ بیت۔دیمترا ((رابطہ ہی)) ،کارانی توک ءَ ھم اسلامائزیشن ءِ پروگرام آرگ بوت، چوشکہ ” خداحافظ” ءِ بدل ءَ “اللہ حافظ ” ءِ گشگ ءِ رواج ءَ عام کنگ، اے بدلی ءِ پشت ءَ ھمے خیال ات کہ پاکستانی چاگرد ءَ چہ ایرانی اثراتاں ھلاس کنگ ءْ عربی کلچر ءَ را عام کنگ ات. دومی سوَب اِش ات کہ عربی ملکاں وش کنگ ءْ آیاں چہ مال یکجاہ کنگ ات۔
بلے آخر اے بدلی ءِ آسر اے بوت کہ مذہبی چست ءْ ایرانی سرا وت ما وتی یکجاگی ھلاس گندگ پیداک ات ءْ انتہاء4 پسندی ءِ نیمگ ءَ راوان ات۔ پاکستان ءِ جاورحال ھما وھد ءَ آشوبی رنگء ءَ بدل بوتاں کہ 1980 ءَ افغانستان ءَ روسیانی ھالاف ءَ جہاد بندات بوت۔
روس ءْ کمیونزم ءِ دارگ ءِ ھاترا امریکہ ءَ وتی دلگوش گوں افغانستان ءْ پاکستان ءِ نیمگ ءَ کْت، گڈا انچو روسی اثراتانی ایرجنگ یانکہ دارگ ءِ ھاترا امریکہ ءِ سی. آئی. اے ءِ کمک ءَ چہ جہاد شروع بوت۔ گڈاا اشرا پدا ” ساہکون آپریشن” ءِ نام داھگ بوت. دیمترا جہادی تحریکاں شریں وڈے ءَ سوبمند کنگ ءِ ھاترا امریکہ ءَ آہی. ایس۔
آہی ءَ را 7 بلین ڈالر دات، 2 ڈالر افغانستان ءِ جدا جْداھہیں جماعتاناں داھگ بوت، اشی ءَ چہ ابید امریکہ ءْ سعودیہ ءِ نیمگ ءَ 10 بلین ڈالر گیش داھگ بوت تانکہ روس ءِ ھلاپ ءَ مزاحمت ھچ وڈا اوشت ءِ آماچ مہ بیت ءْ آہی ءِ توک ءَ روچ پہ روچ گیشی بیت۔ ھمے وھد ءَ امریکہ ءِ (مزن شاہدربرجاہ) یونیورسٹی نیبراسکا (Nebraska) ءَ اسکول ءِ نودربرانی کتاب جوڈ کْت گڈا آھانی توک ءَ باقاعدہ جہاد ءِ بارو ءَ تبلیغ ھوار ات۔امریکہ ءِ نیمگ ءَ چہ بے حسابیں فنڈ (زر و مال) ءْ تیل ءْ گیس ءَ چہ سریچیں عرب ملکانی مالی تاواناں پاکستان ءِ جاور حال یکپارگی بدل کْتاں، ھما مذہبی جماعت کہ آھانی نام ءْ توار نیست ات ءْ نیکہ زر و مال گڈا ھمے یکپارگی دیم ءَ اتک انت۔کہ 1970 ءَ آ تہنا 30 مذہبی جماعت اِتاں بلے 98۔1980 ءَ اشانی تعداد 237 بوت۔اے کْلیں مذہبی جماعتاناں غیرمْلکی مالی کمک راسگ ءَ ات، ءْ ھمیشی ءِ ھمبراہی ضیاء الحق ءَ زکواۃ نظام دیم ءَ آرتگ ات، اشی ءَ چہ اے زرانی توک ءَ ضیاء ءَ ھم چیزے بہر بوت۔ دیمترا اشی ءَ مذہبی جماعتانی ٹولی پیداک کنگ بندات کْت، پرچاکہ مالی امداد وَ ہمیشانی سوَب ءَ پیداک ات۔گڈا ہریکے ءِ کوشش ھمیش بوت کہ گیشاں چہ گیش مردم بہر بہ زور اِت ءْ نام ودی بہ کنت کہ مالانی توک ءَ گیشی بہیت۔
اے دوران ءَ اسلام ءَ را کاروباری مول ءْ مراد ءِ ھاترا کارمرز کنگ بوت۔ انچو کہ کاروبار ءِ توک ءَ مقابلہ بیت ھمے وڈا تنظیمانی توک ءَ مقابلہ بازی ءَ سر چست کْت، وھدے کہ مال ءَ زرانی بہر ءْ بانک کنگ ءَ دلرنجی بوت گڈا ھمے جماعت کسان کسانیں ٹولیانی توک ءَ بہر بوتاں.پدا گڈا ہر یکے ءَ وتی وتی الگ(( منشور)) جوڈ کْت ءْ وتی واستہ الگ الگ فنڈانی لوٹ کْت۔ ھمے مقابلہ بازی ءَ چہ بازیں جہادی رہشون دیم ءَ اتکاں ءْ ہر یکے ءَ ھمے دعواہ کْت کہ مہے گروپ روسی کافرانی ھالاف ءَ جہاد ءَ کْلاں چہ گیش قربانی داھگ ءَ انت، ءْ اے ھم دعواہ کْت کہ افغانستان ءْ کشمیر ءِ جہاد ءِ دوران ءَ شہد بوتگیں مردمانی تعلق گوں مہے تنظیم ءَ اَنت۔ ادا پدر بیت کہ جہادی ٹولیاں چے وڈ جہاد ءَ را وتی نف ءْ فاہدگ ءِ ھاترا استمعال کتگ۔
وھدے جہادی تنظیم دیم ءَ اتکاں گڈا مذہبی ءْ سیاسی جماعت پشت ءَ کپتان، پرچاکہ اے جماعتاں سیاست ءِ توک ءَ بہر زْرت ءْ اقتدار ءِ توک ءَ آھگ ءِ واہش مند اِتاں. اے جماعتانی زور گیشتر شہرانی توک ءَ تہنا (نامی ھیں) تعلیم یافتہ ٹولی ءَ گوں است ات کہ آ ذیادہ مولانا مودودی ءْ سید قطب وغیرہ ءِ تحریراں چہ متاثر اِتاں، ءْ جہادی تنظیم جمہوری روایاتانی ھلاف اتاں، پرچاکہ اشاں ھمے گْشت کہ ما ((تپنگی)) مسلع جدوجہد ءَ چہ اسلامی دنیا ءِ توک ءَ آشوب آرگ لوٹاں، راستیں حبر اش انت کہ اے تنظیمانی توک ءِ مردمانی سیادی گوں (کوچگی) دیہاتی علاقاں ات کہ ذہنی حسابہ خالی اِتاں. اشی ءَ چہ پد اے تنظیماں پاکستان ءِ اندر ءِ جاورحالانی توک ءَ دست مانجنی نہ کْت ءْ وتی دیم گوں افغانستان ءْ کشمیر ءَ دات۔
دگہ کوچگی ءْ دیہاتی مردماناں وتی توک ءَ آرگ ءِ ھاترا اشاں وڈ وڈیں پندل ساز اِت ءْ وتی دفتر ءْ (مسیت) مسجد جوڈ کْت، ھمے سوَب ات کہ مسجدانی تعداد اچانک گیش بوت، پرچا کہ 1980 ءَ اشانی تعداد 700 ات کہ رند ترا 10،000 ءَ سر بوت. اشی ءَ پد نوجوان سنگتاناں جہاد ءِ توک ءَ آرگ ءِ ھاترا یک نیمگے مذہب ءْ دومی نیمگ ءَ مذہبی رہشوناناں کارمرز کْت. “مسلمانانی جیڑاھانی حل کنگ ءِ ایوک ءَ یک راہ یے پشت کپتگ، گڈا آ کِشک تہنا جہاد انت” ءْ اے مقصد ءِ ھاترا اگاں کسے ءَ جنگ کْت جنَگ بوت گڈا آرا شہد لیکگ بیت ءْ چاگرد ءِ توک ءَ آہی ءِ درجگ مزن بیت. اے لہتیں سوَب اتاں کہ آھاں نوجواناں اں جہاد ءِ نیمگ ءَ آؤرت۔ دیمترا اشاں حاص مدرسہ ءْ مسیت چم ءِ چیرا کْتاں ءْ مردم جوڈ کْت، پرچاکہ اے انچیں جاگہہ اتاں کہ آؤدا اشاں ابید ترس ءَ وتی کار کْت ءْ دومی ءَ گمان ھم نہ بوت. ھمے وڈ جہادی تنظیماں وتی نام نہادیں جہادی سنگتانی دل بڈی داھگ ءِ ھاترا یک شریں پْرسی دْودے جوڈ کْت، کہ اگاں کسے مْرت گڈا اشی خاندان ءِ گوما دلپدردی (افسوس) کنگ ءِ بدل ءَ اشی خاندان ءَ را مبارک بات داھگ بوت ءْ میتگ ءِ توک ءَ مردمانی دپشیرکنی بوت ءْ خاندان ءِ مردماناں ھمے گْشگ بوت ” کہ اے خدا ءِ راہ ءَ شہد بوتگ ءْ جنت ءَ داخل انت۔” ءْ ھما بازار ءَ را پدا ھما مرتگیں مردم ءِ نام داھگ بوتگ، گشگ بوتگ کہ شما فخر بہ کن اِت ناکہ افسوس . اے تنظیماں علماھانی درجگ ھم بْرز کْت، پرچاکہ آھانی ذریعہ ءَ چہ زر ءْ مال اتک ءْ سر بوتاں۔پدا ھمے علماھانی نندگ ءْ پادآھگ ھم بدل بوتاں، گاڈی، لینڈ کروزر، مسلع گارڈ ءْ بنگہ، پدا اشاناں ایجنسیانی کمک ھم گون ات. بلے اے جاورحال 9/11 ءَ پد یکدم بدل بوتاں، پرچاکہ افغانستان ءِ حکومت بدل بوت ءْ پاکستان ءِ سرا ڈنی مْلکانی زور گیش بوت کہ پاکستان اے تنظیمانی کْمک ءَ بند بہ کنت . اشی ءَ چہ بازیں ٹولی گار بوت ءْ بازینے ءَ وتی نام بدل کْت۔بازینے تنی وھدی ھست بلے آ حسابہ کار کنگ ءَ نہ انت، پرچاکہ ڈنی مالی کْمک بند بوت ءْ حکومت پاکستان بازیں پابندیانی دیمپان بوت۔۔۔(ھلاس)
