نیم روچ ءِ وھد اَت۔یک پیر مردے یک ہُشکیں درچک ئے چیرا نشتگ ءُُ دست ءِ سرا ات انت۔روچ ھم سک گرم اَتءُُ آ درچک ءَ را نہ ساھگ ءِ است اَتءُُ نہ شریں ٹال ءُُ تاک ءِ پِر اَت۔پہ آئی ہچی پشت نہ کپتگ اَتءُُ گوات ءَ را ہچ بزگ نہ بوت کہ یک تاک ءِ بِل ءَ کہ درچک وت شات بہ بیت کہ گوات ءَ منی سرا بزگ کتءُُ پہ منت ءَ دانک ءِ پشت بہ کپیت۔
بلے آرا ہچ بزگ نہ بوت ءُُ نہ ھم زانت ءِ کہ بزگی چہ ئے۔۔۔!
درچک سک نزور ءُُ نہ دز رس اَت کہ وتی گپ ءَ گوں یکے ءَ بہ جنتءُُ گوات ءِ زورآوری ءَ آئی دیم ءَ پدر بہ کنت۔بلے درچک ابید چہ پیر مرد ءَ دیگے کس پہ وت نہ گندیت۔
پیرمرد ءَ را انچو دست وتی سرا اِت انت کہ گندوک ءَ را چہ درچک ءَ بزگ تِر گندگ ءَ کیت۔نوں تو وت بُگش کہ درچک چوں وتی عرض ءَ پیرمرد ءِ کِرا بارت کہ گوات منی سرا چو زوراک اِنت۔یک نیمگ ءَ پیرمرد وت ہمے اوست ءَ نشتگ کہ یک روچے اَلم ءَ اے درچک سبز بیت ءُُ من ءَ چہ روچ ءَ پہازیت ءُُ من آئی سارتیں ساھگ ءِ میار بن۔دومی نیمگ ءَ گوات ءَ وتی پُونز مِک کُت ءَ ءُُ زوراکی ءِ جامگ ءِ گورااِنتءُُ ہچ نزانت کہ بزگی چہ ئے ءُُ اے ھم نزانت کہ درچک ءِ چیرے نشتگیں مرد پہ چہ ئے ودار ءَ نشتگ۔۔۔؟زوراک نہ جست کنت نہ گوشداریت بلے وتی زوراکی ءَ وتی تب ءِ پیم ءَ برجم داریتءُُ بس۔۔۔
درچک وا سک بزگ اِنت بلے پیر مرد چہ آئی بزگ تر انت کہ باز اوست ءِ داشتگ پہ درچک ءَ۔۔۔!
گوات تہنا نشت ءَ کہ کدیں بیت درچک تِج کنت ءُُ چُنک جنت کہ من آرا ہُشک کن ءَ ءُُ دور بارانے کہ کسے مگندیت۔یک روچے پیر مرد پاد اَتک ءُُ دیمے گوں درچک ءَ کُت ءُُ گُشتے کہ من وا بزگ اوں بلے تو چمں بزگ ترے۔اے درگت ءَ اگاں من تئی باھوٹ بہ باں گڈا منی مان ءَ ھما مرد ءِ پیما بیت کہ گُشیت بیت نہ بیت من چہ دُروھاپ ءَ آپ وراں۔من نہ دز رس تو ھم نہ دز رس بلے گوات زوراک انت ءُُ گوات یکے آرا من تو زوراک ءِ نام داتگ ۔یکے من ءُُ یکے تو گڈا یک ہساب ءِ بچار ءِ من ءُُ تو اگاں یکجاہ بہ باں گوات مئے دیم ءَ نِزور بیتءُُ من تو زوراک باں۔درچک ءَ پہ شات گُشت پدا من تو زوراک نہ باں چیاکہ من زوراکی پہ وت شر دیست ءَ آگپ ءَ بِل۔۔۔!ہنچو کہ دوئیں یکجاہ بوت انت ھمے روچَ ھور بوت ءُُ پیر مرد ءَ گُشت کہ نوں الم ءَ بہارگاہ بیت۔
