اے گشتن بلوچی زبان ءُُ لبزانک ءِ شاہزانت ءُُ کواس سید ظہور شاہ ہاشمی ئیگ اِنت ۔ایشیءِ مانا ءُُ بزانت ءَ اگاں کسے سر بدنت داں آ سرپد بیت کنت کہ اے ایوک ءَ یک گشتنے نہ اِنت بلکیں زندگی ءِ ہما تہلیں راستی اِنت کہ کس آئی ءَ زانگ نلوٹ ایت۔

پرچکہ ما وتارا انچو جوڑکتگ کہ یک گامے ہم بید چہ دومی ءِ کمک ءَ دیم ءَ برت نہ کناں ۔۔۔۔۔! تہنا برو ،تہنا نہ بئے ایشیءِ بزانت ہمیش اِنت کہ زند ءِ کجام ہم پڑے ءَ وتی نزانتکاری ءُُ جاہلی ءَ دومی ءِ سر لڈّگ ءِ جہد کنگ بزاں زند ءِ کجام ہم تکے ءَ بے سوبے ءِ ڈُبہ ءَ دومی ءِ کوپگاں دور دئیگ ۔

کہ یا ر پلانی چو کتگ ،پلانی آ کتگ،پلانی منی کار ءَ نہ کنت ،پلانی منی گوما مہر نہ کنت ،پلانی شریں مردمے نہ اِنت ،پلانی حراب انت ،پلانی وتی متلب ءَ مردماں وتی کنت،پلانی مدام دروگ بند ایت ،

اے درائیں پلانی کیا ودی کتگ اَنت تئی جند ءَ پرچکہ گام گام ءَ تئی جند ءَ را انچیں پلانیانی حاجت گپت ۔۔۔۔۔منا ءَ روسو ءِ یک نامداریں کسہ یے یات پیداک اِنت کہ یکے رندے یک جنین زالے کئیت آئیءِ گور ا ءُُ اے گلہ ءُُ زانگ ءَ کنت ۔
کہ پلان مردم ءَ من ءَ یل کتگ بئے آئیءَ من چون زند باں منی زندگی برباد بوت گڑا آ باز جوانیں پسوئے دنت کہ آئیءَ ترا کہ یل کتگ تو ہم آئیءَ یل کن ۔۔۔۔۔دنیا ءِ ندارگاں بچار ءُُ زندگی ءِ لذت ءَ بگر۔اگاں ہمے حاجت گری تو وت ودی مہ کتیں داں مرچی تو کسی زنگ جنی نہ کتگ اَت ،گپ پدا کیت ہمودا سر بیت کہ ’’ تہنا برو تہنا نہ بئے ‘‘۔

مردم اگاں تہنا بیت گڈاں آ وتی درائیں جیڑگانی ذمہ وار وت بیت بلئے وہدے دو ءُُ سے کس ءِ ہمراہ بیت داں جیڑگانی ذمہ دار ہماآں کنت وت ءَ مدام بے میار گشیت۔

بلئے بیاکہ دنیا ءِ رنگ ءُُ ڈول ہمے رنگ ءَ اَنت کہ کس ءَ دومی سرا نوں بھیسہ وَ ہچ رنگ ءَ کنگی نہ اِنت ،پرچکہ اے وہد ءَ برات کشی پرماتگ،گہار کشی پرماتگ،دوست کشی پرماتگ،پت کشی پرماتگ ،راج کشی پرماتگ ،وت کشی کم اِنت۔۔۔۔۔؟؟؟

درائیں دنیا ایوک ءَ وتی جند ءِ ذاتی نپ ءُُ سیت ءَ چہ در نئیت ،آئی ءِ دل پہ دومی ءَ بہہ نجنت، پمشکا آ دو تل ءُُ دوپوستی کنت ،منا فق بیت ،دروگ بندایت ۔ایشی گورا روت آئی ءَ ڈوبار ایت آئی گورا روت آئی ءَ ڈوبارت۔

مردم ایوک ءَ وتی انا،وتی حرص ءُُ لالچ وتی ایگو ءَ چہ آدیم درنئیت ۔۔۔۔۔یک وہدے بوتگ کہ استاد ءُُ شاگرد ءِ میان ءَ وانگ ءُُ وانینگ ءِ سیادی بوتگ بلئے بیا کہ مرچاں اے سیادی بدلہ نوکیں سیادی یے درکپتگ ۔


کہ استاد شاگرد ءَ وتی لیبوک جوڑ کنگ ءُُ چراہی ءَ وتی ذاتی کاراں درکنت ءُُ آئیءَ دومی استادانی بابت ءَ جاسوسی پرمائیت ءُُ ایشی ءِ مُز ءَ وڑ وڑیں چکاساں سوبمندی ءَ دنت ۔

پلینڈی کنگ ،جنگ ءُُ مڑ کنگ مرچیگیں دنیا ءِ یک دودے جوڑ بوتگ کہ کس نوں ایشیءَ بدل کت نہ کنت ،آ دور ءَ انگت ءَ لہتیں چم پچیں سرپدیں مردم ودی بوتگ کہ چیزے مردم کم چہ کم وتی راہ ءَ آورتگ ءُُ انسان جوڑ کتگ بلئے نوں چشیں مردم اے عہد ءَ ودی بوہگ ءَ اوں ترس اَنت۔

بازیں سنگتے من دیستگ کہ ہمے زنگ ءَ جناں کہ یار من پلان مردم ءِ ھاترا چے چے نہ کتگ بلئے مرچی آئیءَ منا انچیں دھوکہ ئے داتگ کہ گپے نہ بنت ۔
پدا آئی ءَ زاہ ءُُ بد کنت ،اگاں دستے رست کنت داں آئیءَ بیہار ہم دنت کہ من پیش داراں ۔۔۔اے درائیں جیڑگ پرچکہ ودی بنت پرچکہ تہنائی نیست اِنت ۔

انچو کہ شرگداری ءِ دنیا ءَ گشگ بیت کہ شر ءُُ حراب ءِ پرک ہما وہد ءَ گستا کنگ بیت وہدے دو چیز دیم پہ دیم بنت اگاں چیز یکے داں آہچبر شر ءُُ حراب ءِ شاہیم ءَ ایر نہ بیت۔پدا ہما گپ کیت کہ تہنا برو تہنا بہ بئے ۔۔۔۔۔

دنیا ءَ مہر ءُُ دوستی ہم ہلاس اِنت مرچی ہما دوست دارگ بیت چرائی ءَ کارے دربئیت اگاں منی ڈولیں بے ہچیں مردمے داں آئیءَ کس دوست نداریت ۔۔۔پرچکہ دوستی ءِ ھاترا اے لازم اِنت کہ تئی تہا یک نہ یک بودے مان بہ بیت پیش چوش بوتگ ۔

کہ دوست ایوک ءَ دلی بوتگ ہرکسی کرد شر بوتگ یاکہ دلے ساپ بوتگ ہما دوست دارگ بوتگ ۔بلئے شرکرداں کس چل ءِ بہا ءَ جست نہ کنت ۔

ہما مردم کہ ناشر اَنت یاکہ زر ءُُ مالے است ہما دوست دارگ بنت کہ باندہ چرآہاں کارے دراتک کنت ۔پمشکا جہان نندگی نہ اِنت ۔۔۔۔۔۔مردمے دوست نہ بیت بلئے ایوک ءَ اے ھاترا گوں ہمائی ءَ دیوان کنگ بیت کہ بلکیں دیم ءَ کارے بہ دنت۔

ہمے پہ متلبی دوست ءُُ یاری ءَ راجانی راج تباہ کتگ اَنت۔یورپی ملک پرچہ سوب مند اَنت پرچکہ آ وتی جند ءِ سرا بھیسہ دار اَنت ،پمشکا آہاں کسی حاجت نہ انت ،شری ءُُ حرابی آہانی وتی جند ءِ دست ءَ اِنت آ کس ءَ میاری نہ کن اَنت ۔

آکسی ایرجنی ءَ نہ کنت ،اگاں کن اَنت گڑاں آہانی دیوان ءَ بہہ نہ نند اَنت بلئے بیاکہ مئے قوم ءُُ راج ءَ ایوک ءَ ہما مردم سوبمند بنت کہ آ دومی مردم ءِ ایرجنی ءَ کن اَنت ،ءُُ ایرجنی نوں مئے حون ءُُ رگاں ہوار اِنت کہ درکنگ نہ بیت۔

بلئے یک وڑے بوت کنت اگاں تہنائی ءِ راہ ءَ بگراں ۔۔۔۔۔تہنائی ءِ مانا ایش نہ اِنت ایوک ءُُ گستا بوہگ اِناں تہنائی ءِ مانا ایش اِنت کہ نوں دروگیں توسیپ ءُُ بیتالی۔

کنگ مہ بیت،پلینڈی ءُُ چرپ زبانی یلہ کنگ بہ بیت ،راستی ءِ منگ ءُُ راست ءَ را ،راست گشگ ءِ آٹیگ ودی کنگ اے درائیں کار تہنائی ءِ راہ ئیگ اَنت ۔اگاں اتک کنئے تہنائی ءِ راہ ءَ بیا ءُُ سید ءِ قول ءِ پاسداری ءَ بہ کن کہ تہنا برو ءُُ ہچبر تہنا مہ بو۔۔۔۔۔اگاں ناں گڈاں گلہ ءُُ زنگ ءَ یلہ بہ کن۔