زالبول ( جنین آدم) کہ دنیا ءِ آبادی ءِ کساس نیم بہرے زانگ بنت ءُُ بنی آدم ءِ براھدار ءُُ شررنگیں ھمراہ ءُُ ہمسفر تاں دومی نیمگ ءَ مردنیاں،اے زات ءَ ہروھد ءَ وتی دست ءِ چیر ءِ گلام ءُُ لیبوک زانتگ، چیزے مذھب ءُُ چیزے راجانی تہا زالبول ءِ بستار ءُُ ارزشت چوجناورانی وڑا اِنت ءُُ آ ایوک ءَ یک کاردار ءُُ وتی جنسی واہشتانی پیلوی ءِ ھاترا کامرز بیت ءُُ بوتگ ۔

بلئے چیزے مذھب ءُُ راجانی تہا زالبول ءِ ارزشت ءُُ بستار سک باز مزن ءُُ پر ارزشت اِنت ءُُ بازیں جاھاں زالبول ءِ بستار چہ مردین ءَ ھم زیات اِنت۔زالبول ءِ بابت ءَ نامداریں زبان زانت ءُُ کواس واجہ سید شرافت حسین شفقت وتی کتا’’ عورت ،مذھب اورحکومت‘‘ تہانبشتہ کنت کہ ’’عورت دنیا کاسب سے قدیم اختلافی موضوع ہے ۔

بائیل کی حوا اور یونانی مائیتھالوجی کی پینڈورا سے آج تک مقصد تہذیبوں ،معاشروں ،مذاہب اور اقوام نے جنم لیا اور ناپید ہوگئے لیکن ہر عہد میں مصلحین مفکرین مبلغین اور ناقدین نے عورت کے عنوان سخن یاتختہ مشق ضروربنایا۔‘‘زالبول کہ دنیا ءِ براھدار تریں سوگات اِنت۔ کہ بے زالبول ءَ اے دنیا ءِ جلواہ ءُُ زینت بے تھام ءُُ ہوادگ اِنت وھدے مردین زالبول ءِ شررنگیں لقاہ ءِ دیدار ءَ کنت گڈا دنیا ءِ درائیں گم ءُُ رنجاں آ جو بیت ۔

ہرسکی ءُُ سوری بے ھیال کنت زالبول مہرانی یک انچیں گرنچے کہ آئی ءِ بوجوک ایوک ءَ مردین اِنت۔ اے گرنچ ءِ مہرانی لذت اگاں مبوتیں مروچی اے دنیا قائم ءُُ دائم نہ بوتگ ات ۔بلئے ہمے وشبوئیں ءُُ پر لذتیں بانک ءِ بابت ءَ گیشتریں مردنیانی ھیال ءُُ لیکہ جوان نہ بوتگ ۔‘‘زالبول ہروھد ءَ مردنیانی گلام اگاں نہ گڈا محتاج الم بوتگ ،اے دوئیں جنین آن دنیا ءِ تہا ھچبر برابری ءَ بہر نہ زرتگ ءُُ انوھم زالبول سک لاچار ءُُ مجبوراِنت ۔

بلئے آئی ءِ بستار نوں مٹ بوھگااِنت ،کساس ھچ چشیں جاھے ءَ ایشیءِ بستار مردین ءِ کچ ءَ نہ اِنت ۔ھمے سوب ءَ آئی ءَ را زوال رستگ اگاں زالبول ءِ حق منگ بہ بنت ھم اے چاگرد ءِ کہن ءُُ قدیمیں دودانی دیوال پہ زالبول دور دئیگ نہ بنت ،معاشی ھوالگ ءَ ھم زالبول ءُُ مردین ءَ را دو جتائیں کرد کرار دئیگ بوتگ‘‘زالبول چے ئے ؟ چہ کجا آتکگ ؟ اے یک انچیں جستے کہ ایشیءِ پسو بنی آدم ءِ جند ءِ وجود ءَ گوں بندوک اِنت ۔

’’دنیا ءِ اولی ایں مہذبیں راجانی تہا یونانی اول سر ءَ زانگ بنت یونانی روایت ءِ ھساب ءَ دنیا ءِ اولی ایں زالبول ءِ پانڈورا(Pandora) بوتگ۔پانڈورا یک یونانی لبزے کہ ایشی بزانت اِنت ہرچیز ءِ دئیوک ‘‘’’ بلئے کارمرزی ھساب ءَ اے لبزیک جوانیں مانایے نداریت ۔

بزان ہروڑیں ھرابی ءُُ سلی دئیوک ھمے کسہ ءِ مطابق ءَ یک دیوتا یے بوتگ پرومی تھیس (PAROMETHEUS) کہ آئی ءَ آزمان ءَ چہ آس دزاتگ ءُُ زمین ءِ سرا نندوکیں بنی آدمانی ھاترا دیم داتگ ۔

دیوتا آنی مستریں بادشاہ زیوس (ZEUS) ءَ اے گپ وش نہ بوتگ ءُُ پہ زمینی بنی آدمانی ھاترا اے نعمت ءِ پچگرگ ءِ ھاترا یک زالبولے جوڑ کنت کہ آئی نام پانڈورا اِنت دنیا ءِ اے اولی ایں زالبول ءَ را یک پیتی یے (صندوق) گون بیت کہ آئی ءَ را (Pandora Box) گوشگ بوتگ انچو گشنت کہ یک روچے ’’ پانڈورا ءَ ھمے پیتی پچ کرتگ کہ ایشیءِ تہا ہروڑیں ہرابی ءُُ سیلی مان بوتگ اِنت ءُُ اے درائیں ہرابی زمین ءَ شنگ ءُُ تالان بوتگ اَنت ءُُ پدا ھچبر اے ہرابی آں چہ زمین آجو نہ بوتگ ‘‘ (۳)

زالبو ل ءِ بابت ءَ ہر راچ ءِ ہر دور ءُُ زمانگ ءَ وتی وتی لیکہ بوتگ انت ’’ قرآن مجید ءِ سورۃ نسا ء بنداتی آیات ءِ رد ءَ خداوند کریم ءَ گوشتگ، مردماں چہ وتی رب ءَ بہ ترس ئے کہ آئی ءَ شمارا چہ یک جان یے ءَ ودی کرتگ ءُُ ھمے بالاد ءَ چہ جوڑا، جوڑ کنگ بوتگ ءُُ پدا ھمے دوئیناں چہ باز یں مرد ءُُ زالبول دنیا ءِ تہاودی کنگ بوتگ۔۔۔۔۔ بائیبل ءِ تہاھم نبشتہ اِنت کہ چہ ھاک ءَ انسان (آدم) جوڑ کنگ بوتگ ءُُ خدا ءَ حکم داتگ کہ یک درچکے آئی ءِ بھر ءَ مہ ور ات چہ ڈن ءَ ہروڑیں درچکانی بھراں بور بلئے یک درچکے نیک ءُُ بد ءِ گنت آئی ءَ مہ ور وھدے آدم واب بیت گڈا آئی پہلوک ءَ چہ یک زالبولے پیداک بیت ‘‘۔

ھمے زالبول کہ چہ آدم ءِ پہلوک ءَ ودی بیت بی بی حوا گوشگ بیت ءُُ دنیا ءِ مردمانی بندات چہ ھمدا ھم بیت ۔اے لیکہ ءَ اسلام ءَ ابید عیسائی مذھب ھم منیت ۔پہ زالبول ءَ بازیں لیکہ ءُُ ھیال دارگ بوتگ۔ چوشکہ آئی ءِ (زالبول) چاگردی بستار ءُُ ارزشت چہ مردین ءَ کم زانگ بوتگ ءُُ انگت ءُُ انگت است انت ہمے داب ءَ آئی ءِ بالاد ءِ کد ءُُ کاٹ ھم چہ مردین ءَ کم ءُُ کسان اِنت۔

زالبول ءِ کد ءُُ کاٹ بزاں ڈیل ءُُ بالاد اگاں چہ مردین ءَ کمزور ءُُ ناتوام تر اِنت بلئے چہ مردی ءِ بالاد ءَ براھدار ءُُ جلواہ ناک تر اِنت ھم۔ زالبو لءِ بالاد ءَ ڈیل ءِ دیوانگ ہروھد ءَ ہمے مردین بوتگ کہ آئی ءَ راچہ وت ءَ کمتر زانت ءُُ آئی ءِ پادانی چیر ءِ ھاک ءَ ھم چکگ ءَ وتی دل ءُُ چماں دارگ ءَ ھم ساڑی بیت ۔پرآئی ءَ آزمان ءِ ماہ ءُُ استالاںھم جہل ءِ آرگ ءُُ آئی ءِ گامانی دیما ایر کنگ ھم تیار اِنت۔ ھمے مرد کہ وت ءَ راپہ زالبول ءَ شنک ءُُ قربان کنت تاں دومی نیمگ ءَ آئی ءَ را گلام ءُُ داشتہ زانت ،آئی ءَ را چہ وت ءَ کمتر ءُُ کسان لیک ایت ۔

بلئے ھمے زالبول اگاں مبوتیں گڈا راجدپتر ءِ تہا کہ مردین ٹوہ ٹوھیں داوا کنت آکجا بوتگ ات زلبوال راجدپتر ءِ ھما بہر انت کہ اگاں چہ راجدپترءِ زالبول ءَ بہ کش اِت گڈا راجدپتر ناسرجم زانگ بیت ۔دنیا ءِ ہر راج زالبول ءِ پستی ءُُ بستار ءَ منیت چیزے پہ جوانی ءُُ شری ءُُ چیزے پہ ھرابی، بلئے یک گپے منتگیں اِنت کہ حوا اولی زالبو زانگ بیت کہ آ اے دنیا ءِ اولی جنین آدم اِنت ’’ زالبول ءِ ھاتر ا توریت ءُُ قرآن ءِ تہا لبز’’ حوا‘‘ کارمرز بوتگ ۔

عبرانی زبان ءَ آدم ءِ بزانت اِنت ’’ ہاک ‘‘ وھدیکہ ’’حوا‘‘ ءِ برانت اِنت’’ حیات بزاں زندگی ‘‘،زالبول ءِ ھاترادرستاں سر حوا بزاں زند ءِ لبز یہودی آں توریتءَ چہ زرتگ ہر چون کہ اے عہد’’ اموی عہد‘‘ بزاں زالبول ءِ بستار ھلاس بوتگ ءُُ ’’ ابوی راج‘‘ بزاں مردیانی راج وتی زوران بوتگ بلئے چہ ایشی ءَ ابید زالبول ءِ ھاترا زند گی (حوا ءِ لبز کارمرز کنگ بوتگ) ۔یہودی آں چہ پیسر سومیری راج ءِ یک دیوی یے کہ آئی ءِ تام نن تی (NINTI) بوتگ کہ آئی ءِ مانا ءُُ بزانت انت ’’ پہلونک ءِ زالبول ‘ ‘‘یات بہ بیت کہ بائیبل ءِ تلمود ءِ رد ءَ حواچہ حضرت آدمؔ ءِ راستیں پہلونک ءَ ودی بوتگ وھدیکہ سومیری ءِ تہا نن تی زند گی ءَ راگشننت ‘‘ھمے بی بی حوا کہ ودی کرتگیں گودی ایں بانک(زالبول) جاھے مردنیانی دست ءِ چیر ءَ انت ءُُ ھچ وڑیں واک ءُُ اکتیار نہ داریت ءُُ جاھے وتی بہادری ءُُ دلیری ءِ سوب ءَ راجدپترانی براہ ءُُ زینت اِنت ’’ قبل مسیح ءِ یک راجے ستین بوتگ کہ ایشانی زالبول باز بہادر ءُُ دلیر بوتگ اَنت۔

ہیوکرٹیس ءِ رد ءَ دانکہ سہ چار دژمن نکشتگ اش آروس یے نہ کرتگ ۔راجدپتر ءِ تہ االوی یکجائیں منظم جنگجویں زالبوالانی فوج ھمے وڑیں بوتگ انت ءُُ اے باز ترسناکیں (Barbarian) بوتگ اَنت ۔ہندو ماہیتھالوجی ءِ رد ءَ دنیا ءِ جوڑ کنوک یک ناچوئیں زالبولے ’’ پرا‘‘ بوتگ کہ آئی ءَ را ’’شکتی دیوی‘‘ ھم گوشگ بیت ۔( برجاہ اِنت)