بیلہ بید ء جام ءِ سلام ءَ نندگ نہ بیت بلئے اگاں سلام ءَ پد نندگ ءَ مئیل ایت گڑا ؟ عاقلے ءَ گشتگ کہ زِرءَ نندے گڑا نہنگ ءَ بد مکن بلئے نہنگ ءِ دوستی ءُُ دلربائی ءِ گپ ءَ کئے بجنت! اے وہد ءَ ملک ءِ راجکاری جاوراں نواز شریف ءُُ آئی کٹمدان ءِ ہمے حال انت ننکہ بیلہ ءِ جام آئی ءِ سلام ءَ زورگ ءَ تیار انت ءُُ ننکہ نوازشریف ءَ گوں نہنگ ءِ دوستی ءَ بھروسہ ءَ باورے ہست ۔

ہما وڑا زانتکاراں کہ گشتگ ات کہ پانامہ ءِ پش در ءَ نوازشریف ءِ پنچیں سال سرجم کنگ ءُُ آئی ءَ درکنگ ءِ جہد کنگ بہ بیت تنکہ نوازشریف پہ وتی بے کسی ،مسکینی ءُُ لاچاری ءِ پریاتے ءَ داں ہما سرداراں شت مکنت کہ ہبر گوش ندار انت اگاں کہ بازیں مردمانی گشگ ات کہ نوازشریف وتی پنچمی بجٹ ءَ پیش کت نہ کنت بلئے ادا ہما گپ راست بوت انت کہ آہانی گشگ ات کہ نوازشریف ءِ پنچیں سالاں سرجم کنگ ءَ پدآئی ءِ نپاد بڑ ءَ دئیگ بنت۔

اے وہدءَ جی آئی ٹی ءِ درچ ءَ گمان ہمیش انت کہ ملک ءَ ۲۰۱۸ ؁ گچین کاریانی تیاری بوہگان انت ءُُ اے تیاریاں پی ٹی آئی ءَ بہرے دئیگ ءِ سوڈگ بوتگ بلئے اے بہرپی ٹی آئی ءِ ونڈ ءَ ہما وہد ءَ کپیت کہ پانامہ کیس ءِ سوڈگ نواز شریف ءِ حلاپ ءَ بئیت ۔

پدرا انت کہ جی آئی ٹیءَ پد اے کیس یکبرے سپریم کورٹ ءَ روت ءُُ داں سپریم کورٹ ءِ سوڈگ ءَ نوازشریف حکومت ءِ پنچیں سال پیلو بنت ءُُ نواز شریف ءَ پہ لاچاری ءُ پریاتے ءِ موہ نہ رس ایت پمشکہ پاکستانی میڈیا ءُُ لیکہ جوڑ کنوکیں ادارگاں پہ پی ٹی آئی نامداری ءُُ بالابندی ءَ مزنیں ہذمتے پکار نہ بیت۔

گمان ہمیش انت کہ حکومت ءِ گڈی ماہاں اے کیس نواز شریف ءِ حلاپ آرگ بیت کہ آئی ءِ پش در ءَ ۲۰۱۸ ءِ گچین کاریاں ملک ءَ ہم پتیں(coalition) حکومتے جوڑ کنگ بہ بیت کہ آئی ءِ تہاہچ پارٹی ءَ ( ن لیگ، پی پی ءُُ پی ٹی آئی) ءَ چشین زور ءُُ ذکتے نہ بیت کہ زرداری حکومت ءُُ ن لیگ ءِ انوگیں حکومت ءِ وڑا گوں ملک ءِ بنکی واکداراں ہم جواب بہ بنت ۔

اے درگت ءَ اگاں چارگ بہ بیت اے سوڈگ ءِ گیشتریں نپ ءُُ سیت پی ٹی آئی ءَ رس انت بلئے تینگا اے درائیں گپ گمان انت ءُُ اے درگت ءَ اے گپ مہلوک ءِ دیم ءَ پدرا ءُُ زاہر بوتگ کہ پی ٹی آئی ءِ پشت ءَ ملک ءِ مستریں واکدارانی دست انت ۔

بندات ءَ عمران خان ءِ امپائر ء لنکک پدا جاوید ہاشمی ءِ نارازی ءُُ پی ٹی آئی ءِ ایندگہ کاراں زاہر بوتگ کہ پی ٹی آئی ءِ کمان کئی دست ءَ انت ؟ پمشکہ اگاں اے درچ ءَ نواز شریف واکدارانی رزا ءِ بابت ءَ وتی لیکہ تب ءُُ مئیل بدل بکنت ،بوت کنت مردمانی اے درائیں گمان بدل بہ بنت ءُُ دگہ گپے ایش انت کہ نواز شریف اے وڑ پر چہ مکنت ؟

اگاں مکنت تاوانے ئے چی انت ءُُ اگاں بکنت گڑا نپ ءُُ سیت ئے چی بنت ؟ ۔اے پدرائیں گپے کہ کس ءَ گوں عمران خانءَ دوستی ءُُ نواز شریف ءَ بد ءُُ بدگمانی یے نیست گپ ایوکا اے راجکارانی گوں مزن سندیں واکداراں گر ءُُ دار ءُُ گروہی نپ ءُُ سیتانی انت اے درگت ءَ اگاں نوازشریف مزن سندیں واکداراں گوں راہے کشگ ءَ ساڑی بہ بیت گڑا واکداراں چے پکار انت کہ دگہ عمران خان ءِ وتی سرا چٹی بکن انت ؟

پدا نوازشریف نوکینءُُ ناپہکیں راجکارے نہ انت دومی آئی ءِ کر ءَ ۱۹۹۹ ءِ کتہ کاری ہست انت پمشکہ بوت کنت گڑی وہد ءُُ حداں نواز شریف اے گپاں پوہ بہ بیت کہ حکومت ءَ دگرے ءِ دست ءَ دئیگءِ بدل ءَ پرچہ مہار ءَ وتی دست ءَ مکنت؟

پرچکہ آزانت کہ اگاں چدو دیم آئی ءَ مستریں واکدارانی گپ نہ زرت انت گڑا آئی ءِ حال اے رندی چہ مشرف ءِ دور گنتر بیت ءُُ دومی نیمگ ءَ آئی ءِ کاروبار ءَ ہم مزنیں تاوانے رست کنت ۔

اے درچ ءَ مئے لیکہ ایش انت کہ نواز شریف یک سرپدی ئیں راجکارے اے وڑیں نادانی نہ کنت کہ وتی راجکارای بستار ءُُ کہول ءِ کاروبار ءُُ بیپار ءَ پہ مدامی بباہ بدنت ءُُ یکبرے پدا بروت ءُُ سعودی عرب ءِ باہوٹ بہ بیت بلئے اے درائیں زید ءَ اے گپ مزنیں ارزشتے دارایت کہ نواز شریف ءِ کش ءُُ کری مردم ءُُ آئی سلاہ کار آئی ءَ را چونیں سوج ءُُ پنت دئینت آئی ءِ راہاں پہ مستریں واکداراں پچ کن انت یا بند ؟ تنکہ نوازشریف ءُُ آئی ءِ کہول ءَ پد لیگ ءِ سرا آہانی زورءُُ سانے بہ بیت۔