بزانک ءِ یک مقصدے حیال ءِ درشانی انت اے حیال نبشتہ کارے وتی اندری مارشت بوت کنت یاکہ چاگرد ءِ استیں جیڑہ ءُُ جنجالانی باروانبشتہ کار ءِ رائے یا opinion،آ ایشی ءَ را لبزانکءِ کجام تہر یا ٹیکنیک ءَ وانوک ءِ دیم ءَ کاریت نبشتہ کارے وتی تب انت بلئے یک راستی ءِ ایش انت کہ لبزانک کار کہ ہر چیز نبشتہ کنت آ پہ وانوکاں یک کلہوئے یا کہ نوکیں حیالے پیداک کنت ۔

بلوچی زبان ءِ تہا نبشتہ کنوکانی یک مستریں بہرے فکشن یا شاعری ءِ بابت ءَ نبشتہ کنت سیاسی یا راجی معاملہ آں کس نئے کہ گپ جنت ءُُ نئے کہ نوشتہ کنت ۔

پرچاکہ مئے نبشتہ کار نعرہ وَ بلوچے جن انت بلئے آہاں ءَ بلوچ ءِ جیڑہ ءُُ بلوچ چاگرد ءِ پگر نیست انت اگاں پگر انت گڑا وتی گلا ءُُ ستا ءِ ءُُ وتی ذہنی حاکمی ءِ کہ من ءَ ابید دگہ کس نہ لبزانکی مردمے نئے کہ وانند ہے۔

بے مْقصدییں نبشتانک (فکشن یا کہ شاعری ) نہ ایوک ءَ وانوکانی وہد ءِ زوالی انت بلکن ءَ پہ راج یا چاگرد ءِ اڑ ءُُ جنجالانی راہشونی ءَ فائدگ مند نہ انت ۔بلئے بیا کہ بلوچی لبزانک ءِ یک نادراہی ءِ ہمش انت کہ مئے نبشتہ کاراں کتاب ءِ چاپگ ءَ پہ نام آوری ءُُ گلا ءُُ ستا ءِ وسلہیے جوڑ کتگ ۔

اے گپ ءَ کس نہ ماریت کہ منی کتاب پہ کیا سیت انت آئی ءِ کوشست بس ہمیش انت کہ منی کتاب مارکیٹ ءَ بئی ءُُ نوں منا مردم ادیب ءُُ لبزانت ءُُ دانشور لیک انت ۔

پدا مستریں بژن ءِ حبر ایش انت کہ اگاں لہتیں نبشتہ کار یک ءُُ دوکتاب ( ارزشت ءُُ اہمیت ؟؟) نبشتہ کنت ءُُ چاپ کنائینت گڈا پدا دگہ بیست سال ءَ ہرچ مراگش ءُُ دیواناں گلا ءُُ ستا ءِ صورت ءَ وتی مز ءِ طلبگار بیت ۔فکشن بہ بیت یا کہ شاعری اے ازم گوشگ بنت ۔

ہرکس لبزانی کماہگ نہ زانت ءُُ نئے کہ ہر مردم پہ آزمانک یا گدار کردار سازیتگ کنت۔ اے ازم ہرکسی گورا نہ بیت ( لہتیں انچنیں مردم ہم است کہ اے ازم ءَ پہ جہد ءُُ وانگ وتی تہا پیداک کن اَنت) بلئے ہمے کتابے مارکیٹ ءِ آرگ ءِ شوق ءَ بے سر ءُُ بُنیں نبشتانک یکجا کنگ ءُُ دیما آرگ ءِ ٹرینڈ گیش بوان انت یاکہ انچیں فکشن نبشتہ کنگ بوہگ ءَ انت کہ پہ لائق ء توسیپ نہ انت ۔

مئے لبزانکی چاگرد ءَ چوشیں مزن مزنیں نبشتہ کارانی یاد انشورانی لڑ دراج انت کہ آ وت یا کہ دگرانی گوشگ ءِ پدا دانشورانی کوہ گوشگ بنت بلئے اگاں ہرتی ءَ آہانی نبشتہاں بہ چارات گڑا یاوَ ایدگر راجی زبانانی نبشتگیں رجانک انت یادگرانی نبشتہ یکجا کتگ چاپ کنائینتگ انت ۔

یک زبانے ءِ شاہکاریں ساچستاں ( تخلیقاں) وتی زبان ءَ آرگ یا شریں نبشتہ کارانی پر ارزشتیں نبشتانکاں یکجا کنگ ءُُ چاپ کنائینگ حرابیں کارے نہ انت بلئے اے گپ یا حیال الم ءَ ذہن ءَ بہ بیت کہ من یک ساچست کار ،رجانکار یاکہ نز آر ءِ حیثیت ءَ وتی وانوک ءَ چے دئیگ ءَ آں ۔۔۔۔منی وانوک چیا منی کتاب ءَ بہ وانیت ؟ یاکہ من وتی وانوک ءَ را چے پیغام دئیگ لوٹاں ۔۔۔

بلئے چونکہ مئے ٹوہیں ادیب ، دانشور ،زانتکار ،شاعر ءُُ زبان زانتاں ( بلوچی لبزانک ءَ ہرچ چار لبز ءِ نبشتہ کنوک اے صفاتانی مالک انت ) گوش انت کہ ہما وہدا تو لبزانکی مردمے نئے کہ تئی بے سر ءُُ پادیں کتاب مارکیٹ ءَ نیا اَنت ۔۔۔

حالانکہ دنیائے ایدگہ پڑاں یک نبشتہ کارے بیست بیست سال یک کتاب ءِ نبشتہ کنگ ءَ جنت ءُُ بر ے برے آ تخلیق آئی ءِ زند ءَ ہم چاپ نہ بیت بلئے آ کتاب ءِ ارزشت پہ راجاں یا چاگرد ءَ ہمنچو بیت کہ راج وت آئی ءِ بستار ءَ گشینت ۔

چاہے آزمانک بہ بیت ،گدار یاکہ سپر نامگ ،اے درائیں حیال ءِ درشانی ءِ ٹیکنیک انت ءُُ یاشانی مقصد پہ وانوک ءَ راہ دربری ہیل کنگ یاکہ نوکیں حیال ءُُ جیڑہے ءِ باروا سرپدی دئیگی انت باید انت کہ مئے لبزانک مردم کتا ب ءِ مارکیٹ ءِ آرگ ءَ بل اَنت چہ وت ءَ پہریز انت ءُُ وتی مردمانی وتی راج ءُُ چاگرد ءِ باروا انچیں شاہکار دیم ءَ بیار انت کہ آ پہ راج ءَ سیت ءُُ فائدگ مند بہ بنت نیکہ وتی جندے گلا ءُُ ستا ءِ وسیلہ ۔بلئے مردم چے گوشت کنت کہ گپ پدا ہمودا کئیت اوشتیت کہ تو چے زانئے تئی وَ یک کتابے ہم مارکیٹ ءَ نیست۔۔۔۔۔!